Xyoo 1531, muaj ib yam txawv txav tshwm sim tuaj hauv teb chaws Mev Xis Kos. Teb chaws Mev Xis Kos ntawd kuj nyob ntawm As Mes Lis Kas Nrab. Lub caij ntawd mas cov neeg hauv lub teb chaws ntawd feem coob tseem coj dab qhuas. Cov neeg ntseeg txog Huab Tais Yes Xus lawv tseem tsis tau coob li lub zim txwv no.
Nyob ze ntawm lub nroog Mev Xis Kos muaj ib tug neeg As Mes Lis Ntias nws yog ib tug neeg ntseeg nyob hauv lub Koom Txoos Kav Tos Liv. Nws lub npe hu ua Dias Nkaus. Thaum nws tab tom mus tsev teev Ntuj kom tau teev Tswv Ntuj, nyob ntawm tog kev muaj ib lub me nyuam roob hu ua Tes Pes Yas. Cas txawm muaj ib yam nrov txawv txawv saum lub ncov roob tuaj. Dias Nkaus thiaj li nres thiab nyob twj ywm mloog zoo zoo. Dis Nkaus txawm hnov ib lub suab nrov saum lub ncov roob tuaj tias : “Dias Nkaus ! Dias Nkaus !”
Dias Nkaus thiaj li khiav nce mus saum lub ncov roob ntawd, saib yog leej twg hu nws. Thaum nws mus txog saum lub ncov roob, nws pom ib tug poj niam lub ntsej muag thiab tej ris tsho ci ntsa iab. Muaj qhov pom kev nyob ib ncig ntawm nws, cov pob zeb pob tsuas nyob ze ntawd kuj ci ntsa iab thiab.
Dias Nkaus ntshai thiab nws xav zoj tias : "Qhov ntawd yog dab tsi ?”
Tam sim ntawd tus poj niam ntawd maj mam hais lus rau Dias Nkaus tias : “Koj txhob ntshai ! Kuv hais rau koj tias kuv yog tus Nkauj Tsim Txiaj Mab Liab, tus tseem Tswv Ntuj uas tau nqes los ua neeg Leej Niam. Koj yeej paub tias tus tsim lub ntuj lub teb yog peb tus Huab Tais Tswv Ntuj puas yog ? Li ntawd, mas koj mus hais kom cov ntseeg tuaj txhim ib lub tsev teev Ntuj nyob ntawm no mog !”
Thaum Leej Ntshiab Mab Liab hais lus tag nws cia li ploj ntais lawm, ces Dias Nkaus thiaj rov qab los tsev. Nws mus piav tas txhua yam nws tau pom thiab tej lus nws hnov rau nws tus Tswv Qhia nyob hauv lub nroog Mev Xis Kos. Tswv Qhia poob siab loj kawg. Ntawm Dias Nkaus mas nws rov qab mus saum lub ncov roob ib zaug ntxiv thiab.
Hnub tom qab uas yog Hnub Chiv. Dias Nkaus rov mus xyuas Tswv Qhia ib zaug ntxiv. Nws hais rau tus Tswv Qhia tias : “Nag hmo thaum hnub qaij, kuv rov mus pem lub roob Tes Pes Yas. Tus poj niam uas kuv hais ntawd nws rov yees tawm tuaj rau kuv pom thiab tiag. Kuv hais rau tus poj niam ntawd tias : kom nws mus hais nws cov lus rau cov neeg paub txuj, nws txhob hais rau kuv ! Yog vim nyob hauv peb lub zos kuv yog tus pluag thiab lub tswv yim ruam dua cov, kuv tsis paub ib tug ntawv li."
Thaum kuv hais li ntawd tas, mas tus poj niam ntawd hais lus luag ntxhi rau kuv tias : “Me tub ! Tab txawm koj yog ib tug me dua cov, tsis kav koj yog tus kuv xaiv kuv hu los mas."
Dias Nkaus hais nws cov lus tas, nws thiaj nug Tswv Qhia tias : "Txiv Tswv Qhia, koj yuav hais dab tsi rau kuv ?”
Thaum ntawd Tswv Qhia xav twj ywm nyob hauv nruab siab tias : “Tus neeg no nws yog ib tug neeg xav tom ntej tom qab tiag. Nws tsis yog neeg vwm. Nws yog ib tug neeg ntseeg nyob hauv peb lub Koom Txoos thiab. Tiam sis yuav ua li cas thiaj paub tias qhov nws hais ntawd yog tseeb los cuav ne ?”
Tswv Qhia thiaj hais rau Dias Nkaus tias : “Koj yuav rov qab mus saum lub ncov roob ib zaug ntxiv. Yog tias koj nqa tau ib yam dab tsi tseem ceeb ntawm lub roob Tes Pes Yas los mas kuv thiaj ntseeg qhov koj hais !”
Ces Dias Nkaus thiaj rov mus pem lub ncov roob Tes Pes Yas. Thawj hnub tsis pom muaj dab tsi tshwm sim li. Hnub tom qab kuj tsis pom muaj dab tsi thiab. Hnub peb yog hnub tim 12 lub 12 hlis xyoo 1531, mas Dias Nkaus rov pom tus poj niam ntawd yees tawm tuaj. Nws thiaj nug tus poj niam ntawd tias : "Koj ua puas tau ib yam dab tsi los zeem tseeb tias koj yog tus Nkauj Tsim Txiaj Mab Liab tiag ? Yog tias koj ua tau, mas tsoom ntseeg hauv lub nroog Mev Xis Kos yuav ntseeg kuv thiab lawv zoo siab txhim ib lub tsev teev Ntuj nyob ntawm no." Ces Leej Ntshiab Mab Liab kom Dias Nkaus nce mus pem ncov roob thiab mus khaws ib co paj ntoos. Dias Nkaub xav tias : nyem no twb yog lub caij ntuj no lawm, mas ntshe kuv yuav tsis pom ib lub paj ntoo li. Tiam sis Dias Nkaus lam ua ib siab mus, ua cas thaum nws mus txog saum lub ncov roob, nws pom muaj ntau hom paj ntoos tawg ntau tsos thiab cov paj ntoos ntawd tsw qab tas nrho. Cov paj ntoos nyob puv tas lub ncov roob. Dias Nkaus tsis tau pom muaj paj ntoos zoo nkauj nyob hauv lub caij ntuj no ib zaug li. Tam sim ntawd nws thiaj khaws ib hom paj ob peb lub los khi ua ib tauv paj loj loj.
Nws thiaj muab nws lub tsho tiv no los kauv cov paj ntawd kom txhob zeeg nyob ntawm tej kev. Thiab nws nqa rov los rau Tswv Qhia saib.
Zaum no yog zaum peb uas Dias Nkaus mus xyuas Tswv Qhia. Thaum nws mus txog hauv Tswv Qhia tsev mas nws qhib nws lub tsho tiv no, ces cov paj ntoo cia li poob rau hauv pem teb. Tswv Qhia xav tias : "Tej paj ntoos zoo nkauj cuag no, nyob hauv lub caij ntuj no mas kuv tsis tau pom ib zaug li !” Tab sis muaj ib yam uas ua rau Tswv Qhia zeem tseeb, qhov ntawd yog nyob hauv Dias Nkaus lub tsho tiv no sab hauv qab mas cia li muaj Leej Ntshiab Mab Liab ib tug duab. Leej Ntshiab Mab Liab tus duab mas luag ntxhi thiab ci ntsa iab xwb.
Ces Tswv Qhia tsis ua xyem xyav li yav tas lawm. Nws ntseeg tias Leej Ntshiab Mab Liab tau yees tawm tuaj rau Dias Nkaus pom tiag. Tswv Qhia thiaj hais kom Dias Nkaus coj Tswv Qhia mus pem lub roob Tes Pes Yas.
Tib hnub ntawd mas Tswv Qhia hu cov ntseeg nyob hauv lub nroog Mev Xis Kos tuaj thiab hais kom lawv pib txhim lub tsev teev Ntuj nyob saum lub roob ntawd. Ces txij hnub ntawd lod Mab Liab daim duab ntawd thiaj nyob hauv lub tsev teev Ntuj hauv lub nroog Mev Xis Kos los txog tav no.
Txij xyoo 1531 los, mas cov neeg As Mes Lis Ntias hauv teb chaws Mev Xis Kos tig los yuav lub siab tshiab coob heev.
Tus sau : TP. Txhiaj Foom
