Hnub tim 3 lub 7 hli, hwm Leej Ntshiab Tos Mas, Yes Xus tus thwj tim.
Lub npe Tos Mas yog lus As Las Mais, txhais tias : ‘Tub ntxaib’. Vim li no Zam thiaj hu nws ua lus Hes Laas tias : ‘Dis Dws Mos’.
Tos Mas yog neeg siab tawv thiab muaj lub siab kub lug, nws siv nws txoj sia los pab luag tej. Thaum Yes Xus hais rau nws cov Thwj Tim tias : “Nws yuav maj rov mus xyuas Las Ntxas Los nyob Yus Das teb,”
Tos Mas hais tias : “Peb nrog Yes Xus mus ua ke thiab zoo siab tuag nrog Yes Xus.” (Z 11 : 16)
Hmo uas Yes Xus tsim Lub Cim qhia cov thwj tim ua nws Rooj Qav, Tos Mas hais rau Yes Xus tias : “Peb tsis paub koj yuav mus qhov twg, peb yuav ua cas paub txoj kev ?”
Yes Xus teb ntxiv rau Tos Mas tias : “ Kuv yog Txoj Kev, yog Qhov Tseeb, yog Txoj Sia.”
Tom qab Yes Xus tuag thiab sawv rov los, nws yees tawm tuaj rau cov Thwj Tim pom, mas cov Thwj Tim hais rau Tos Mas tias : “Peb pom Huab Tais lawm.”
Tos Mas tsis ntseeg nws hais tias : “Yog kuv tsis pom lub qhov txhab ntsia hlau nyob hauv nws ob txhais tes, thiab kuv tsis tau muab ntiv tes ntxig lub qhov ntsia hlau, kuv tsis tau muab kuv phab tes rau ntawm nws phab tav, mas kuv tsis ntseeg.”
Tau 8 hnub tom qab, Tos Mas tab tom nrog cov Thwj Tim nyob ua ke. Yes Xus tawm los nyob nruab nrab hauv lawv thiab hais rau Tos Mas tias : “Cev koj ntiv tes rau ntawm no, koj ntsia kuv ob txhais tes. Cev koj txhais tes los, muab rau hauv kuv phab tav. Koj txhob ua neeg tsis ntseeg ntxiv, koj ntseeg mog !” (Z 20 : 27)
Yes Xus kuj tau hais rau Tos Mas tias : “Cov uas lawv tsis tau pom los lawv xub ntseeg mas lawv txoj hmoov zoo.”
Tos Mas tau mus tshaj Ntuj Lus nyob hauv ntau qhov chaw hauv Aws Los Pas teb thiab hauv lub xeev Kes Las Las nyob Is Ntias teb. Qhov kawg Tos Mas tau tuag ua Yes Xus tim khawv.
Zim txwv no sawv daws cav tias Tos Mas lub ntxa nyob hauv lub nroog Mas Nras.
Cov neeg ntseeg nyiam tus Hauv Paus Xa Lus Tos Mas, vim cov ntseeg pom tias lawv zoo li Tos Mas : Lawv tso siab rau Yes Xus tab sis muaj tej ntus uas lawv ua xyem xyav li Tos Mas.
