Ntawv Moo Zoo hais tias muaj ib hnub Huab Tais Yes Xus tau ntiab 7 tus dab tawm ntawm Mab Liab Mas Ntas Las mus, ces nws thiaj txiav siab raws Huab Tais Yes Xus qab. Txij hnub ntawd los, Mab Liab Mas Ntas Las nrog nraim thiab muab nws lub cuab tam los tsob hwb Huab Tais Yes Xus thiab cov thwj tim xws li lwm tus poj niam.
Thaum lawv muab Huab Tais Yes Xus dai saum Ntoo Cuam mas cov thwj tim tso tes khiav tas, tshuav Mab Liab Mas Ntas Las, Mab Liab Yes Xus niam, Mab Liab uas yog Khos Pas poj niam, Xas Los Mes, thiab tus thwj tim Huab Tais Yes Xus nyiam thiaj sawv ze tus Ntoo Cuam xwb.
Thaum Huab Tais Yes Xus tuag tas, Mab Liab Mas Ntas Las yog ib tug nrog cov neeg coj nws lub cev mus tso hauv lub qhov ntxa. Txog hnub pib lub lis piam Mab Liab Mas Ntas Las thiab cov poj niam thiaj sawv ntxov ntxov npaj mus tu Huab Tais Yes Xus tus qauv tom lub qhov ntxa, tab sis lawv tsis pom Huab Tais Yes Xus lub cev lawm. Lawv khiav los hais rau cov thwj tim, ces Pob Zeb thiab Zam nkawd thiaj mus saib.
Pob Zeb thiab Zam tsis pom Huab Tais Yes Xus lub cev mas nkawd rov qab, tshuav Mab Liab Mas Ntas Las tseem nyob ntawd. Tus Tshiab thiab Huab Tais Yes Xus thiaj tawm los rau nws pom thiab hais kom Mab Liab los tshaj lub moo no rau cov thwj tim. Huab Tais Yes Xus hais tias “Koj mus cuag kuv cov kwv tij, koj hais rau lawv tias kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj.” Ces Mab Liab los hais rau lawv tias “Kuv pom Huab Tais lawm, nws hais cov lus no rau kuv.” (Z 20: 17-18)
Vim Mab Liab Mas Ntas Las yog thawj tus tau pom Huab Tais Yes Xus sawv rov los thiab tau coj Huab Tais Yes Xus cov lus mus hais qhia rau cov thwj tim, mas Mab Liab Mas Ntas Las thiaj tau lub npe tias ‘cov Hauv Paus Xa Lus tus Hauv Paus Xa Lus.’
Ntau tiam dhau los mas lub Koom Txoos cav tias Mab Liab Mas Ntas Las thiab Mab Liab Npes Tas Nias yog tib tug xwb, tab sis txog xyoo 2021, Vaj Qhia Fas Ntshis Kus tau txiav tias nkawd ob leeg nyias muaj nyias.
