Nyob hauv qhov hloov pauv kev lag luam zaum tim 4 uas yog siv Digital. Vaj Qhia Leo 14 hais txog qhov tseem ceeb hauv kev txuag lub meej mom ntawm cov neeg ua hauj lwm. Hauv kev tawm tus qauv lag luam thiab Technology uas neeg yog qhov nruab nrab. Tsis yog hais txog qhov zoo los yog qhov tau los ntawm kev tsim tawm xwb.
Vaj Qhia sau tias : “Kev ua hauj lwm tshiab tsis tau txhais tias yuav zoo dua tas mus li.”
Tab txawm AI lub tswv yim tsim tawm yuav pab kom kev tsim tawm mus tau zoo, hauv kev ua hauj lwm xws li qub thiab dhuav, tsis kav hauv ntau qhov cov tub zog tseem yuav daws kho tus kheej kom haum nrog qhov sai thiab qhov tshuab ua. Tiag tiag mas cov tshuab raug ua tawm los kom tau pab cov neeg ua hauj lwm.
Technology tuaj yeem pab kom neeg dim ntawm cov hauj lwm hnyav los yog ua tej hauj lwm qub tau tiag. Tab sis tsis tsim nyog yuav muab siv ua chaw tib kev ntiav zog, kom tau txuag peev nyiaj txiag thiab txhab tej nyiaj khwv tau. Qhov no Vaj Qhia cia siab tias ; yuav pom kev txhim kho ntawm cov Koom Haum tub zog kom rov los muaj zog dua hauv kev thaj yeeb thiab kev txhim kho.
Vaj Qhia hais tias : txog sij hawm lawm uas lub ntiaj teb yuav hla dhau kev siv yam tsim tawm hauv lub teb chaws. GDP yog tus ntsuas txog kev txhim kho thiab tig los saib qhov tseem ceeb thiab lub meej mom hauv kev ua hauj lwm, kev nplua nuj uas ri mus thoob txhua txhia qhov, txo qhov tsis sib luag thiab kev saib xyuas txhua yam nyob ib puag ncig. Vaj Qhia hais tias peev nyiaj txiag tsim nyog yuav cia txhawb nqa kev ua hauj lwm, kev txhim kho cov tub zog thiab kev txhim kho neeg lub neej ntau dua kev nrhiav kom tau nyiaj nkaus xwb.
Ua raws Leej Ntshiab Paj Lug 6 lub tswv yim, tsab ntawv no thiaj xyaw nrog kev thaj yeeb thiab kev txhim kho. Thiab thov kom tas ntiaj teb tsim kev sib koom tes ntawm cov teb chaws. Tshwj xeeb tshaj yog kom tau pab cov teb chaws thiab cov pej xeem uas pluag txom nyem tshaj. Vim kev vam meej yuav mus txog kev thaj yeeb tau, yog thaum kev vam meej kav tas qhov txhia chaw thiab ruaj khov.
Tsev neeg thiab cov txiaj ntsim qab hau tseem ceeb hauv zej zog.
Vaj Qhia zeem tseeb txog qhov muaj nqis hauv tsev neeg, yog kev sib raug zoo ruaj khov ntawm poj niam thiab txiv neej. Nws hu tsev neeg tias yog ‘thawj yam txiaj ntsim qab hau hauv zej zog.’ Thiab yog ‘lub hauv paus tseem ceeb uas zej zog pauj tsis tau.’ Vaj Qhia thov kom cov tseem hwv thiab zej zog pab txhawb nqa cov tsev neeg hauv kev ua tub zog, uas txhawb nqa kev ua hauj lwm ruaj khov thiab tsim nyog hauv lub neej, kom tau txuag zej zog lub peev xwm hauv kev tsim lub neej tom ntej.
Kev tsim tus qauv ntawm qhov ntsia pom thiab kev pheej hmoo hauv kev ywj pheej.
Vaj Qhia Leo 14 hais txog tib neeg kev ywj pheej hauv txheej neeg Digital uas raug ua kom ntxim cov neeg siv lub siab. Yog siv txiaj ntsim qab hau los ntawm tib neeg qhov tsis muaj zog thiab pluag txom nyem. Vaj Qhia thov kom nyias txhawb nqa kev ywj pheej nyob hauv nyias tus kheej, thiab yuav tsum xav txog qhov txaus ntshai hauv kev khaws zej zog cov lus thiab kev siv Algorithms.
Kev tshuaj xyuas tej ntaub ntawv ntiag tug, kev kwv yees tus cuj pwm thiab kev qhia lwm tus neeg txiav txim siab, tau rais ua ‘tus qauv tshiab ntawm lub hwj chim’ uas yuav coj mus rau kev tsis muaj zog hauv zej zog. Vaj Qhia xyav txog yam hu ua ‘kev tsim tus qauv ntawm qhov ntsia pom’, yog qhov tawm suab ntawm yam ntsia pom thiab neeg nyiam. Txog qhov cuam tshuam rau kev tsim cov pej xeem lub tswv yim.
Tus qauv tshiab hauv kev ua qhev thiab kev tswj hwm.
AI thiab Technology txheej tshiab yog kev ua qhev txheej tshiab. Tshwj xeeb tshaj rau cov tub zog uas ua hauj lwm hnyav thiab raug teeb meem hauv kev khawb cov ntxhia nrhiav nyuab. Yog tej yam nyoos tseem ceeb hauv cov twj Digital. Vaj Qhia qhia tias : “Kev tiv nrog kev ua qhev txheej tshiab no, yog kev sim tseem ceeb ntawm kev ncaj ncees hauv txheej neeg Digital. Lub Koom Txoos tiv txog kev ua qhev, kev ua luam neeg thiab kev ua rau neeg xws li tej toob xib. Vaj Qhia thov zam txim hauv lub siab txog yav tag los uas lub Koom Txoos qeeb thiab tsis tau tiv txog kev ua qhev tiag thiab tam sid. Dhau no lawm, Vaj Qhia tseem hais txog txoj cai tshiab uas cov teb chaws muaj zog siv, tshwm sim nyob hauv Digital tej ntaub ntawv.
Thaum cov ntaub ntawv hais txog kev noj qab haus huv, tsoom pej xeem los yog ntiag tug tej ntaub ntawv raug coj mus siv ua txiaj ntsim qab hau hauv kev lag luam. Ua rau tib neeg lub neej rais ua cov ntaub ntawv nrhiav txiaj ntsim qab hau.
Hla dhau tus txheej txheem thiab tsov rog uas ncaj ncees.
Hauv zaj 5, txoj cai ntawm lub hwj chim thiab lub neej vam meej hauv kev nyiam kev hlub. Vaj Qhia tig rov los xav txog teeb meem tsov rog thiab nws hais tias ; kev hloov Digital tab tom hloov pauv cov xwm txheej ntawm kev tsis sib haum xeeb. Vaj Qhia hais tias ; yog tsis muaj kev ncaj ncees ruaj khov, kev txiav txim siab hais txog lub neej thiab tib neeg txoj kev tuag yuav nyob nrug deb ntawm kev ua neeg heev. Thaum kev siv lub zog tab tom raug ntsia tias yog qhov yooj yim thiab ua tau tas mus li.
Lub ntsiab ntawm cov teeb meem no, yog kev cai ntawm lub hwj chim uas ua rau tsov rog rais ua qhov xwm yeem. Thiab raug ntsia tias yog ib yam twj hauv kev tseev tsim ntawm cov teb chaws, ua kom muaj kev sib tw fab riam phom thiab sau tub rog.
Vaj Qhia pom tias lub ntiaj teb zim txwv no, tib neeg tab tom raug tej xov xwm uas kom sib tawg thiab piam sij hauv liv xwm. Ua rau zej zog tsis muaj yav tom ntej mus ntev, txog qhov kev thaj yeeb raug ntsia tias yog kev ncua tsov rog ib ntus dhau ib ntus. Vim li no Vaj Qhia thiaj thov kom txhob xav txog tsov rog ncaj ncees. Tab txawm yuav lees txais txoj cai hauv kev tiv thaiv tus kheej, npaj txhij hauv kev sib hais haum, muaj tiam lis thiab kev zam txim yog kev daws kho kev tsis sib haum xeeb.
Algorithms tsis ua kom tsov rog rais ua kev ncaj ncees.
Vaj Qhia xyav moo txog kev loj hlob ntawm cov tsev tsim riam phom, kev sib tw tsim hoob pob Nuclear thiab kev tshwm sim ntawm cov tuav riam phom txheej tshiab, uas siv tsov rog ua lub hwj chim thiab kev nrhiav nyiaj txiag. Vaj Qhia ceeb toom heev kawg txog tej riam phom uas siv nrog AI tias : “Tsis muaj ib qho Algorithms twg tuaj yeem ua kom tsov rog rais ua kev ncaj ncees tau.” AI tsis tau rhuav tshem kev tsis ncaj ncees hauv tsov rog tawm mus, tab sis nws ua kom kev tsis sib haum xeeb tshwm sim sai tuaj. Nrug deb ntawm neeg dua qub thiab siv kev phem tsawg dua qub, vim tib neeg saib cov neeg raug tua zoo li tej ntaub ntawv ntau dua yog neeg. Vaj Qhia thiaj thov kom tas ntiaj teb neeg teeb txoj cai ncaj ncees kom nruj rau cov tub rog hauv kev siv Technology, uas yog siv kev lees txais ntiag tug thiab pov hwm tsoom pej xeem.
Kev kub ntxhov ntawm ntau lub teb chaws.
Vaj Qhia hais tias : “Txoj cai ntawm lub hwj chim tseem tshwm sim nyob hauv ntau lub teb chaws tej kev kub ntxhov. Thiab tshwm sim nyob hauv lub ntiaj teb ntau qhov chaw uas tsis muaj kev tso siab thiab kev tsis sib haum xeeb.”
Vaj Qhia tu siab txog kev ncaj ncees uas tab tom raug cov neeg muaj zog dua kav. Vim li no Vaj Qhia thiaj thov kom muaj kev daws kho lub Leej Haum Kuj dua tshiab, kom tuaj yeem daws tau lub ntiaj teb zim no tej kev kub ntxhov thiab ua tub txib rau ib tsoom neeg tiag tiag.
Kev tseev tsim uas cov hauj lwm tsis muaj kev saib xyuas.
Hauv Vaj Qhia tsab ntawv tseem hais txog tsov rog txheej tshiab uas tsis yog tshwm sim nyob hauv tshav rog, tab sis yog tshwm sim nyob hauv kev sib tw lag luam, peev nyiaj txiag thiab Cyber. Tej ntaub ntawv tsis meej tseeb thiab ua kom kev ntshai raug siv ua tsoom pej xeem txoj kev xav. Ua kom kev txhab nyiaj rau cov tub rog raug ntsia pom tias ; yog tib txoj kev tawm rau yav tom ntej uas tsis ruaj khov. Vaj Qhia hu yam no ua ‘tus txheej txheem cuav’, ua rau tib neeg lees txais tias tsov rog yog qhov zam tsis dhau, thiab saib kev thaj yeeb yog qhov tib neeg xav uas tsis muaj hnub yuav tshwm sim tiag.
Kev ua neej hauv kev nyiam kev hlub.
Hauv kev ua neeg ntseeg, Vaj Qhia Leo 14 thiaj thov kom tiv thaiv “txoj cai ntawm lub hwj chim’ uas yog tsim kev ua lub neej hauv kev nyiam kev hlub. Vaj Qhia nco txog cov Leej Ntshiab uas lawv yog cov neeg ncaj ncees thiab yog cov tsim kev thaj yeeb. Yog pov thawj tias Tswv Ntuj lub txiaj ntsim tsis tau ntxuav kev tsis sib haum xeeb, tab sis pab kom neeg txawj tiv kev phem thiab txawj ua yam zoo.
Vaj Qhia thiaj hais 5 yam tseem ceeb : xws li 1, yuav tsum hais cov lus tseeb los hloov riam phom. 2, tsim kev thaj yeeb hauv kev ncaj ncees. 3, sawv nyob ib sab ntawm cov neeg tau txais kev tsis ncaj ncees. 4, txhob ua tus neeg nyob nruab nrab hauv kev tsis ncaj ncees. 5, nrhiav txoj kev thaj yeeb tseeb tiag thiab ua kom tau.
Qhov tseem ceeb hauv kev sib tham ntawm cov kev teev hawm.
Vaj Qhia hais tias : “Kev khiav tawm ntawm txoj cai lub hwj chim mus rau kev sib hais haum, tsim nyog yuav vam txog kev sib tham ntawm cov kev teev hawm. Vaj Qhia zeem tseeb tias ; tus siv Tswv Ntuj lub npe los tsim kev ncaj ncees rau kev kub ntxhov, rau kev phem thiab tsov rog, mas tus ntawd tab tom ntxeev siab rau tus Tswv Ntuj ntawm kev thaj yeeb. Vim kev ua tsov rog hauv lub npe kev ntseeg, yog qhov ua kom kev ntseeg piam sij.
Kev ua tus loj ntawm tib neeg.
Hauv cov lus xaus thawj tsab ntawv, Vaj Qhia Leo 14 caw cov neeg ntseeg kom tab meeg ntsib lub ntuj tshiab uas yog Technology nyob hauv ntawv Moo Zoo qhov pom kev. Ua lub neej xwm yeem tsis ntshaw ub ntshaw no, tab sis paub lees txais kev saib xyuas thiab kev ntseeg. Vaj Qhia xaus cov lus tias : tab txawm tias nyob hauv lub caij uas yog AI lub tswv yim tsim tawm, tsis kav neeg tuaj yeem ua pov thawj txog kev ua tus loj ntawm neeg. Yog qhov chaw uas Tswv Ntuj nyob thiab tsis muaj yam Technology twg los pauv tau.
Kwv tij Hmoob sawv daws ! Hnub no peb xaus Vaj Qhia cov lus nyob hauv tsab ntawv Magnifica Humanitas los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug ! Peb mam sib ntsib dua, nej sawv daws nyob zoo !
