Lub Cheeb Koom Txoos Vees Cas muaj ib tug Tswv Qhia tshiab.
Tsoom neeg ntseeg tsawg tsawg uas nyob Los Tsuas teb, lawv zoo siab tos txais tus Tswv Qhia tshiab.
Txiv Plig Anthony Adoun Hongsaphong uas yog ib tug Txiv Plig nyob hauv lub Cheeb Koom Txoos Pakse, nws raug xaiv ua tus Tswv Qhia kav lub Cheeb Koom Txoos Vees Cas, hauv lub tuam tsev teev Ntuj hwm Lub Siab Ntshiab nyob Vees Cas. Cov kab ke tsuj xeeb tus Tswv Qhia tshiab, yog ua nyob hauv hnub tim 25 lub 3 hlis xyoo 2025. Lub 12 hlis xyoo 2024 tsaib no, Vaj Qhia Fas Ntshis Kus tau tsa Txiv Plig Anthony ua tus Tswv Qhia tshiab saib lub Cheeb Koom Txoos Vees Cas.
Nyob hauv cov kab ke tsa tus Tswv Qhia tshiab, muaj cov Tswv Qhia ntawm lub rooj sab laj nyob Los Tsuas teb thiab Khas Phus Chas teb (CELAC) tuaj sib koom ua ke, kom tau koom lub rooj sab laj uas lawv niaj xyoo muaj.
Muaj cov Tswv Qhia nyob Thaib teb thiab Vaj Qhia tus tiam lis uas yog Tswv Qhia Peter Bryan Wells, cov neeg ntseeg tuaj ntawm cov tsev teev Ntuj uas nyob ib cheeb tsam sib ze ntau txhiab leej thiab cov tub tseem hwv coob leej kuj tuaj koom thiab.
Tswv Qhia Anthony Adoun Hongsaphong muaj 61 xyoos, nws yog tus Tswv Qhia tshiab hloov Tswv Qhia Louis-Marie Ling Mangkhanekhoun uas nws txwm 80 xyoo hauv lub 4 hlis 2024. Yav tag los Tswv Qhia Anthony yog ib tug Xib Hwb ntawm National Major Seminary nyob Thakeh, thiab nws yog tus saib xyuas fab ntsuj plig ntawm cov tub tshaj Ntuj Lus 11 qhov chaw nyob hauv lub Cheeb Koom Txoos Pakse uas yog qhov chaw nws yug los. Nws tau txais lub Cim Tiag Tes ua Txiv Plig xyoo 1994. Nws kawm tiav txheej siab nyob hauv lub tsev kawm ntawv txheej siab Fribourg nyob Xus Is teb (Switzerland), thiab hauv lub tsev kawm ntawv txheej siab Pontirical Angelicum nyob Los Mas (Rome).
Nws ua hauj lwm fab kev ntseeg nyob Thaib teb thiab xyoo 2005 nws pib ua hauj lwm rau cov neeg ntseeg nyob Los Tsuas teb uas muaj li ntawm 51,000 leej. Nws txoj hauj lwm yog qhia cov tub ntxhais hluas uas lawv npaj siab ua Xib Hwb nyob Pakse.
Hauv cov Txiv Plig uas tuaj ntawm Khas Phus Chas teb tuaj, muaj tus Txiv Plig Yes Xus Is hu ua Enrique Figaredo Alvargonzález, nws yog tus thawj coj cov Tswv Qhia nyob Battambang. Nws hais txog “kev cia siab ntawm lub Koom Txoos nyob Los Tsuas teb” thiab hais txog “kev ua lub neej ntawm cov neeg ntseeg tsawg tsawg, tab sis muaj sia”.
