ZAJ NYEEM HNUB TIM 7 LUB 2 HLIS 2024
HNUB PLAUB LUB LIS PIAM 5 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 7: 14-23)
Kwv tij Hmoob sawv daws, lub Moo Zoo hnub no Huab Tais Yes Xus hais txog qhov huv thiab tsis huv. Raws li cov His Xas Lai sib txwm coj rawv Mais Xes txoj cai mas lawv hais tias cov tsiaj zoo li cas yog cov tsis huv, cov txhiam xws zoo li cas thaum noj mus rau hauv lub cev yuav ua rau tus noj ntawd tsis huv tuaj, cov thaj tsam twg los tsav neeg twg thaum yus chwv los nyob ze ces ua rau yus tsis huv tuaj. Yam ua kom neeg tsis huv mas lawv yuav txwv tsis pub noj tsis pub mus kov; lawv yeej coj li ntawd. Tab sis hnub no Huab Tais Yes Xus qhia ib yam tshiab rau lawv tias tsis yog li lawv xav ntawd. Yam ua kom neeg tsis huv mas yog yam txhawv hauv neeg lub siab lub tswv yim tuaj, ces coj neeg mus ua qhov phem qhov tsis zoo.
Cov kwv tij Hmoob, yog peb lub siab xav qhov phem qhov tsis zoo, ces ntev mus qhov phem ntawd yuav maj mam phwj tuaj puv npo peb lub siab ua rau thaum kawg peb cia li txiav siab nqes tes ua raws lub siab phem ntawd. Huab Tais Yes Xus hais tias cov hauj lwm phem tawm hauv peb lub siab phem siab tsis huv tuaj mas yam li: kev ua dev ua npua, kev ua tub sab, kev tua neeg, kev deev luag txij nkawm, kev cuaj khaum, kev lim hiam, kev ua cuav, kev ntxias luag mus ua plees, kev khib luag tej, kev xyav luag moo, kev muab hlob, kev ua ywj fab ywj fwj.
Yog li mas cov kwv tij Hmoob, hnub no peb sim muab xav saib nyob hauv peb nruab siab los hauv peb cov hauj lwm puas muaj raws li Huab Tais Yes Xus tau hais los ntawd. Yog muaj mas peb kav tsij muab rho tawm hauv nruab siab mus, peb yuav muab cov tshuaj muaj lub npe tias ‘ua neeg me’ los tua cov nroj fab peb lub siab no, ces peb cog ‘kev sib nyiam sib hlub’ rau hauv nruab siab’ thiab niaj hnub muab Tswv Ntuj Lo Lus los ua dej ywg kom lub siab nyiam loj hlob tawg paj txiv tau cov hauj lwm zoo.
Nyob zoo sawv daws.
