ZAJ NYEEM HNUB TIM 5 LUB 2 HLIS 2025
HNUB NCO TXOG LEEJ NTSHIAB AS NKAS THAS
HN 12: 4-7, 11-15; MK 6: 1-6
Kwv tij Hmoob, Mas Kos piav txog Huab Tais Yes Xus rov mus hauv lub zos Nas Xas Les, ces lawv cia Huab Tais Yes Xus mus nyeem Tswv Ntuj Lo Lus thiab nthuav rau sawv daws mloog. Mas Kos tsis piav tias Huab Tais Yes Xus nyeem thiab nthuav zoo li cas, tab sis nyob hauv Lus Kas Ntawv Moo Zoo peb paub tias Huab Tais Yes Xus nyeem tus Yaj Saub His Xais kauj ntawv hais tias “Huab Tais lub Tswv Yim nyob saum kuv vim nws pleev roj los qee kuv. Nws xa kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov ua neeg twj lij, kom kuv tshaj tias yog xyoo Huab Tais yuav pub txiaj ntsim.”
Huab Tais Yes Xus tsis nthuav cov lus no ntau thiab ntev, nws tsuas hais tias “Hnub no, cov lus nyob hauv zaj ntawv no tsheej xeeb raws li nej tau hnov.”
Cov neeg nyob Nas Xas Les tau hnov lub moo tias Huab Tais Yes Xus ua hwj huam kho tau cov neeg mob kom rov zoo, ntiab dab tawm hauv tus neeg raug dab, kho tau tus dig muag kom rov pom kev. Hnub no, lawv tseem tau hnov Huab Tais Yes Xus hais cov lus tseeb thiab meej kawg li ntawd, mas tas sawv daws thiaj qhuas txog Huab Tais Yes Xus lub tswv yim. Lawv hais tias “Yes Xus tau lub hwj huam thiab lub siab thoob tsib qhov twg los?”
Kwv tij, lawv qhuas tab sis lawv tsis ntseeg txog Huab Tais Yes Xus vim lawv ib txwm pom Huab Tais Yes Xus puag thaum yau los, ces lawv xav tias lawv yog cov paub Huab Tais Yes Xus zoo; Yes Xus yog tus kws ntoo Yos Xes thiab tus niam tsev Mab Liab nkawd tus tub, Yes Xus cov kwv tij, cov txheeb ze, cov tsev neeg twb nrog peb nyob koom zos. Lawv hais li ntawd.
Kwv tij Hmoob, Mas Kos piav ntxiv tias Huab Tais Yes Xus ua tsis tau ib yam hwj huam yees ntxwv nyob ntawd, nws tsuas tsa tes rau tus puav neeg tuag ceg los tuag tes kom zoo vim nyob hauv lub zos Nas Xas Les lawv tsis ntseeg.
Kwv tij, thaum peb hnov lub Moo Zoo no mas peb yuav xav li cas? Peb puas pom tias nyob hauv peb pawg ntseeg muaj ntau zaus sawv daws tsis pom Huab Tais Yes Xus lub hwj huam, los Huab Tais Yes Xus puas ua tau hwj huam nyob hauv peb?
Yog kawg, peb hnov cov neeg ntseeg tshiab hais tias lawv tau txais txiaj ntsim li ub li no ntawm Huab Tais Yes Xus, Huab Tais Yes Xus ua hwj huam nyob hauv lawv. Tab sis ua cas nyob hauv cov neeg ib txwm ntseeg txog Yes Xus thiab cov tig los ntseeg tau ntau xyoo, ua cast sis pom Huab Tais Yes Xus ua hwj huam, tsis pom Huab Tais Yes Xus lub txiaj ntsim.
Zoo ib yam li cov neeg nyob Nas Xas Les, lawv xav tias Huab Tais Yes Xus nrog lawv nyob tau 30 tawm xyoo, lawv paub Huab Tais Yes Xus zoo, ces lawv lub siab tsis ntseeg tias Huab Tais Yes Xus yog Tswv Ntuj Leej Tub, lawv tsis nco pom tias Huab Tais Yes Xus tau ua hwj huam nyob hauv lawv lub zos ntau zaus.
Cov neeg ntseeg los ntev, lawv xav tias lawv paub Huab Tais Yes Xus zoo lawm, lawv tsis nco tias Huab Tais Yes Xus ua hwj huam ntau yam nyob hauv lawv, lawv tsis nco pom tias Huab Tais Yes Xus pub txiaj ntsim li cas rau lawv lawm.
Kwv tij, yog peb yeem cia Huab Tais Yes Xus coj peb kev, peb qhib siab mloog Huab Tais Yes Xus cov lus, peb zoo siab coj Huab Tais Yes Xus cov lus mus ua raws; mas peb yuav rov pom tias niaj hnub Huab Tais Yes Xus pub txiaj ntsim ntau npaum cas rau peb, niaj hnub Huab Tais Yes Xus ua hwj huam ntau yam nyob hauv peb.
