ZAJ NYEEM HNUB TIM 4 LUB 6 HLI 2026
HNUB TSIB, LIS PIAM 9 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 12: 28-34)
Kwv tij Hmoob sawv daws, thaum tus kws Ntawv Ntshiab hnov Huab Tais Yes Xus teb cov Xas Dus Kais lo lus nug txoj kev sawv rov los tas, mas nws pom tias Huab Tais Yes Xus yog ib tug Xib Hwb qhia Tswv Ntuj qhov tseeb tiag. Nws xav paub tias nyob hauv Mais Xes txoj cai 365 lo lus qhia uas cov Yus Das coj, mas lo lus qhia twg tseem ceeb thiab loj tshaj, mas nws thiaj li nug txog qhov ntawd.
Xav kom peb rov ras tias thaud Tswv Ntuj tau pub 10 lo lus rau Mais Xes coj los qhia cov His Xas Lais coj xwb, tab sis ntev mus thiab ntev mus, mas cov kws Ntawv Ntshiab cia li muab txhab ntxiv ua 365 lo lus rau cov His Xas Lais coj; lawv hais tias yog Mais Xes txoj cai. Tswv Ntuj 10 lo lus qhia yog li no:
1. Koj yuav teev Huab Tais Ntuj ib tug xwb, thiab koj yuav nyiam Huab Tais Ntuj tshaj tas puas tsav yam.
2. Koj yuav hwm Huab Tais Ntuj lub npe.
3. Koj yuav caiv Huab Tais Ntuj hnub.
4. Koj yuav hwm koj niam koj txiv.
5. Koj tsis txhob tua neeg.
6. Koj tsis txhob zes luag txij luag nkawm
7. Koj tsis txhob ua tub sab tub nyiag.
8. Koj tsis txhob dag rau luag tej.
9. Koj tsis txhob tso koj lub siab ntshaw zes luag txij luag nkawm.
10. Koj tsis txhob tso koj lub siab ntshaw ua tub sab tub nyiag.
Tas nrho 10 lo lus qhia no Huab Tais Yes Xus muab xaus tau ua 2 lo lus qhia:
1. Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.
2. Koj yuav nyiam tus nyob ze koj ib yam li koj nyiam koj.
Kwv tij Hmoob, yog peb nyiam Tswv Ntuj, mas peb yuav teev Tswv Ntuj ib tug xwb, peb yuav tsis saib lwm yam ua Tswv Ntuj thiab mus teev tej yam ntawd; yam li mus teev tej ntoo faj khaum, teev tej hnub tej hli, los teev cov dab. Yog peb nyiam Tswv Ntuj, mas peb yuav hwm Tswv Ntuj lub npe, tsis lam tau lam hais, tsis muab Tswv Ntuj lub npe ua chaw cog lus dig dim. Yog peb nyiam Tswv Ntuj, mas txog Hnub Chiv peb yuav kub siab mus teev Ntuj, txais Tswv Ntuj Lo Lus.
Yog peb hwm niam hwm txiv, hwm tus hlob tus yau hub tib si, yog peb xav qhov zoo rau luag lwm tus, yog peb tsis muab siab dai ncuv rau tej cuab tam hauv ntiaj teb no, mas Huab Tais Yes Xus hais tias yog peb tab tom nyiam tus nyob ze peb ib yam li peb nyiam peb.
Hnub no peb paub li ntawd lawm, mas Huab Tais Yes Xus hais rau peb tias “Koj nyob tsis deb ntawm Tswv Ntuj lub Ceeb Tsheej lawm.”
Kwv tij Hmoob, yog peb xav nyob ze Tswv Ntuj lub Ceeb Tsheej, mas peb tsis txhob cia kom peb paub xwb, peb tsum khaws coj mus ua kom txi txiv nyob hauv peb cov hauj lwm, hauv peb lub neej thiab.
Nyob zoo sawv daws.
