ZAJ NYEEM HNUB TIM 4 LUB 10 HLI 2024
HNUB NCO TXOG LEEJ NTSHIAB FAS NTSHIS KUS NYOB AS XIS XIS
COV LUS NYOB HAUV LUS KAS NTAWV MOO ZOO (LK 10: 13-16)
Kwv tij Hmoob sawv daws, thaum Huab Tais Yes Xus xa cov thwj tim 72 tug mus tshaj lub Moo Zoo, Huab Tais Yes Xus hais rau lawv tias yuav muaj neeg coob tsis mloog lawv, tab sis lawv txhob ntaus siab yau, txhob me siab vim cov lus lawv hais tsis yog lawv lam hais, tab sis yog Huab Tais Yes Xus cov lus; ntawm lawv tsuas yog tus xa lus rau zeej tsoom xwb, yog li mas tus twg tsis mloog lawv mas yog tus ntawd tsis mloog Huab Tais Yes Xus, tus twg xyeej lawv mas yog nws xyeej Huab Tais Yes Xus. Tus twg tau hnov pab 72 cov lus tab sis lawv tsis mloog, mas thaum txog hnub txiav txim Ntuj yuav muab txim rau lawv, vim lawv hnov tab sis lawv tsis ntseeg, lawv paub tab sis lawv tsis ua raws.
Yog peb muab tig los piv rau peb cov neeg ntseeg sawv daws, niaj hnub mas peb hnov Huab Tais Yes Xus cov lus hauv Ntawv Moo Zoo, peb paub tias yam twg xis Tswv Ntuj siab thiab yam twg Tswv Ntuj tsis nyiam. Yog peb mloog thiab ua raws mas txog hnub txiav txim peb yuav tau txais kev cawm, tab sis yog peb tsis mloog thiab tsis ua mas hnub txiav txim peb yuav raug lub txim hnyav dua cov tsis tau hnov txog lub Moo Zoo, tsis tau paub Tswv Ntuj lub siab nyiam. Vim li no Huab Tais Yes Xus thiaj hais tias lub zos Kos Las Ntxis, lub zos Npes Xais Das, thiab lub zos Kas Fas Naus yuav tau hmoov phem dua lub zos Tws Los thiab Xis Doos uas yog cov neeg teev pej kum dab ob lub zos.
Kwv tij Hmoob, thaum ub cov tub tshaj Ntuj Lus mus txog As Mes Lis Kas teb, lawv tshaj lub Moo Zoo rau cov As Mes Lis Ntias kom hloov siab tshiab. Cov tub tshaj Ntuj Lus hais tias yog cov As Mes Lis Ntias hnov lub Moo Zoo lawd, lawv tsis yuav siab tshiab mas thaum tuag, lawv tus plig yuav mus rau dab teb. Cov As Mes Lis Ntias nug tias yog li lawv cov yawg koob tsis tau hnov lub Moo Zoo ne, lawv puas nyob hauv dab teb. Cov tub tshaj Ntuj Lus teb tias ib co kuj nyob hos ib co mas Tswv Ntuj txais mus nrog Tswv Ntuj nyob lawm. Tab sis ntawm nej mas hnub no nej tau hnov txog lub Moo Zoo lawm, nej yuav tau hloov siab tshiab tiag tiag, nej thiaj yuav mus tau saum ntuj.
Cov As Mes Lis Ntias hais tias zaum no ces ntshe lawv yuav mus rau dab teb tag lawv haiv neeg, yog lawv tsis xav poob rau dab phem teb mas kawg yuav tsum hloov siab tshiab xwb xwb, ces cov As Mes Lis Ntias thiaj tig los ua Ntuj kev cai, hloov tus yam ntxwv kom xis Tswv Ntuj siab.
Cov kwv tij, hnub no peb zoo li ntawd, tus twg hnov lub Moo Zoo thiab paub Huab Tais Yes Xus lawm, nws yuav hloov siab ua tus neeg tshiab nyob hauv qhov pom kev mog.
