ZAJ NYEEM HNUB TIM 3 LUB 6 HLI 2026
HNUB NCO TXOG LEEJ NTSHIAB TSHAS LAS AAS NKAS
COV LUS NYOB HAUV MAS KOS NTAWV MOO ZOO (MK 12: 18-27)
Kwv tij Hmoob, nyob hauv cov Yus Das thaud lawv txoj kev ntseeg, lawv muaj 2 pab. Ib pab yog cov Xas Dus Kais, lawv hais tias neeg tuag lawm, mas neeg tus plig nrog lub cev zaj ntshis mus. Ib pab yog cov Fas Lis Xais, lawv hais tias neeg tuag, mas neeg tus plig yuav mus nrog Has Nplas Has nyob mus txog hnub ntiaj teb kawg, ces neeg tus plig yuav sawv rov los txais txoj sia tshiab nyob mus li. Nyob hauv lub Moo Zoo hnub no, peb pom tias ib cov Xas Dus Kais tuaj nug Huab Tais Yes Xus txog qhov no. Lawv hais tias yog ntseeg tias neeg tuag lawm yuav sawv rov los, mas thaum tus poj niam yuav 7 tus txiv tuag sawv rov los, nws yuav yog leej twg poj niam.
Huab Tais Yes Xus teb li cas? Huab Tais Yes Xus hais tias thaum neeg tuag sawv rov los, lawv yuav zoo li cov Tshiab, lawv tsis sib yuav ua niam txiv ntxiv, lawv tsuas muaj kev sib nyiam sib hub li ib pab kwv tij ib pab phooj ywg lawm xwb. Huab Tais Yes Xus tseem hais ntxiv tias Tswv Ntuj tsis yog cov neeg ciaj tus Tswv Ntuj. Li ntawd, yog peb ntseeg tias neeg tuag lawm, lawv yaj ntshis mus, mas yuav muaj Tswv Ntuj ua tus dab tsi.
Kwv tij Hmoob sawv daws, Huab Tais Yes Xus cov lus no qhia peb tias peb txoj sia tsis yog tas rau lub ntiaj teb no xwb, tsis yog peb tuag ces cia li tas li ntawd. Peb tseem muaj txoj sia nyob ntxiv mus lawm tom ntej thiab. Li ntawd, thaum peb tseem ua neej nyob, mas peb muaj caij nyoog hloov siab tshiab, muaj caij nyoog ua cov hauj lwm zoo tsim koob hmoov tseg, mas peb kav tsij hloov siab thiab tsim koob hmoov cia.
Huab Tais Yes Xus cov lus no zoo txhawb siab rau peb, kom peb muaj chaw tso siab txog lub neej fab lwm tiam. Tshwj xeeb rau peb cov Hmoob uas nej muaj tus txheeb ze tau ncaim nej mus, nej nyob hauv txoj kev tu siab. Thov kom nej tso siab tias nej cov txheeb ze tso lub ntiaj teb no tseg, lawv tsis yog yuav ncaim nej mus li, lawv xub ua nej ntej mus nrog Tswv Ntuj nyob xwb, muaj ib hnub nej thiab lawv yeej yuav rov tau sib ntsib dua. Tsuav yog nej ntseeg txog Huab Tais Yes Xus, nej coj rawv Huab Tais Yes Xus cov lus qhia xwb.
Nyob zoo sawv daws.
