ZAJ NYEEM HNUB TIM 3 LUB 4 HLIS 2025
HNUB TSIB LIS PIAM 4 CAIJ PLAUB CAUG
(Z 5: 31-47)
Kwv tij Hmoob, cov Yus Das yog lawv xav kom luag ntseeg cov lus lawv hais, mas lawv tsum nrhiav li 2 tug los ua tim khawv txog lawv cov lus mas luag thiaj yuav ntseeg tias cov lus nws hais ntawd yog lus tiag lus tseeb.
Cov Yus Das txhib Huab Tais Yes Xus tas zog kom rov zeem tseeb tias nws yog Leej Pleev, yog tus tuaj cawm cov His Xas Lais. Muaj ntau tus neeg Huab Tais Yes Xus kho lawv zoo, lawv lees nyob ntawm zeej tsoom xub ntiag tias Huab Tais Yes Xus yog Leej Pleev; tus Ntxuav Plig Zam kuj hais tias Huab Tais Yes Xus yog Leej Pleev, tab sis cov Yus Das tsis xav ntseeg vim Leej Pleev raws li lawv xav tsum yog ib tug vaj muaj koob meej, yog ib tug neeg txawj ntse muaj hwj chim coj sawv daws ntaus tsam ntiab cov Los Mas tawm hauv lawv lub teb chaws mus.
Leej Pleev raws li lawv lub tswv yim yog zoo li ntawd.
Cov Yus Das lawv twm Ntawv Tos Las, lawv coj Txoj Cai kom lawv tau txoj sia nyob mus li. Huab Tais Yes Xus hais tias nws yog txoj sia, yog cov dej pub txo sia, yog tus ntseeg thiab ua raws li cov lus Huab Tais Yes Xus qhia mas tus ntawd yuav muaj txoj sia nyob mus li; ces Huab Tais Yes Xus tuaj nyob nruab nrab hauv lawv, tsis kav lawv tsis txais.
Kwv tij Hmoob, ntau zaus peb ua li cov Yus Das. Peb tsis nco pom cov hwj huam Huab Tais Yes Xus ua rau peb, peb tsis nco tias peb muaj Huab Tais Yes Xus nrog nraim peb, ces peb tsis tso siab rau Huab Tais Yes Xus, peb tsis ua raws li Huab Tais Yes Xus kom peb ua.
Lub caij Plaub Caug no peb nyob ntsiag ntsiag, peb muab ua zoo xav txog Huab Tais Yes Xus lub neej thiab cov hauj lwm, saib peb puas yuav pom Huab Tais Yes Xus thiab ntseeg txog Huab Tais Yes Xus zoo dua tuaj. Nyob zoo.
