ZAJ NYEEM HNUB TIM 25 LUB 9 HLI 2024
HNUB PLAUB LUB LIS PIAM 25 CAIJ NYOB NRUAB XYOO
COV LUS NYOB HAUV LAS KAS NTAWV MOO ZOO (LK 9: 1-6)
Kwv tij Hmoob sawv daws, Tswv Ntuj hu peb los ua nws haiv neeg, Huab Tais Yes Xus hu peb los ua nws cov thwj tim. Yog li peb yuav ua dab tsi rau Leej Txiv Tswv Ntuj, thiab rau Huab Tais Yes Xus. Hnub no lub Moo Zoo qhia peb tias thaum peb ua Huab Tais Yes Xus cov thwj tim lawm, nws pub lub hwj huam rau peb kom yuam tau cov dab thiab kho tau cov neeg mob. Yog li mas cov kwv tij Hmoob, peb txoj hauj lwm yuav ua pub rau Huab Tais Leej Txiv thiab pub rau Huab Tais Yes Xus mas thiaj yog 2 yam no: tshaj Tswv Ntuj lub Ceeb Tsheej, thiab kho cov neeg mob.
Yog peb hais rau luag tej txog Tswv Ntuj kev nyiam peb, nws pub nws Leej Tub ua nqe txhiv peb; tab sis peb tsis ua cov hauj lwm hlub neeg, mas puas tsim nyog peb tau lub npe tias ‘Huab Tais Yes Xus cov thwj tim’, ‘cov neeg ntseeg txog Yes Xus’.
Cov lus no yog txhais tias peb tsis txhob tshaj lub Moo Zoo ntawm lub ncauj xwb; tab sis peb yuav tshaj lub Moo Zoo hauv peb cov hauj lwm thiab. Peb tshaj Tswv Ntuj lub Ceeb Tsheej nyob hauv peb txoj sia.
Ib tug neeg txawj ntuas, txawj qhuab qhia lwm tus ua neej; tab sis nws tsis ua tus piv txwv zoo rau luag yoog, mas puas tsim nyog peb yuav ntseeg tau nws?
Kwv tij, peb tsis yog kws tshuaj los kws kho mob yuav pab tau ib tug neeg mob kom rov zoo tuaj tau. Tab sis peb tau txais Tswv Ntuj lub txiaj ntsim kho tus mob hauv hauv neeg tus plig, kom lawv tus plig txhob tuag mus rau dab phem cov hluav taws.
Huab Tais Yes Xus hais tias “Nej txhob nqa dab tsi taug kev”, mas yog Huab Tais Yes Xus xav qhia peb kom txhob muab lub neej no khuam rau ntiaj teb txoj kev ntshaw, tsam tej ntawd yuav kuav peb lub sij hawm cia.
