ZAJ NYEEM HNUB TIM 24 LUB 5 HLIS 2025
HNUB XYA, LIS PIAM 5 CAIJ HLA
COV LUS NYOB HAUV ZAM NTAWV MOO ZOO (Z 15: 18-21)
Kwv tij Hmoob, Zam siv lo lus tias ‘qab ntuj neeg’ los hais txog neeg zaj tswv yim nyiam nrhiav tej yam los yug neeg lub cev ntshaw kom tau txaus siab; yam li neeg ntshaw tau zoo ces neeg ua tiag nrhiav nyiaj kom ntau ntau cia, neeg ntshaw noj kom tsau plab ces neeg huas noj yam li npua huas qhauv, neeg lub cev ntshaw lom zem ces neeg thiaj nriav kev ua plees. Hnub no Huab Tais Yes Xus thiaj qhia cov thwj tim tias cov neeg muab tswv yim ib rau kev ntshaw fab cev nqaij mas lawv yuav tsis nyiam Huab Tais Yes Xus zaj tswv yim vim Huab Tais Yes Xus qhia ib zaj tswv yim tsis haum lub tswv yim ntshaw ntawd. Huab Tais Yes Xus cov thwj tim kuj yuav Huab Tais Yes Xus zaj tswv yim thiab; lawv txhob npuab niaj teb zaj tswv yim.
Muaj ntau zaus Huab Tais Yes Xus muab ntiaj teb zaj tswv yim piv rau qhov tsaus ntuj, hos nws zaj tswv yim piv rau qhov pom kev; kom cov thwj tim pom tias ob zaj tswv yim no mus ua ke tsis tau. Los Huab Tais Yes Xus hais tias ib tug neeg twg yuav tsob hwb nyiaj txiag thiab Tswv Ntuj ib txhij tsis tau.
Huab Tais Yes Xus xav qhia cov thwj tim ntxiv tias tos qab ntuj neeg ntxub lawv, vim qab ntuj neeg twb xub ntxub Huab Tais Yes Xus ua ntej lawm, yog li mas cov thwj tim tsis txhob xav ntau ntau txog tej yam lawv yuav ntsib yog lawv yuav Huab Tais Yes Xus zaj tswv yim.
Kwv tij Hmoob sawv daws, peb yeej pom muaj tseeb li ntawd tiag. Peb pom tias nyob hauv peb haiv Hmoob mas muaj ntau leej tsis nyiam txoj kev ntseeg Ntuj, lawv thuam thiab hais tau yam tsis zoo txog Huab Tais Yes Xus. Yog peb nrog cov neeg ntxub txoj kev ntseeg sib cav, mas tsis muaj qhov zoo dab tsi tuaj. Txawm li ntawd, los thov peb tsis txhob npau taws rau lawv, txhob ntxub lawv; peb thov Ntuj rau lawv kom muaj ib hnub twg lawv pom qhov tseeb, pom tias kawg yog Huab Tais Yes Xus xwb thiaj ua tau txoj kev rau lawv taug, kawg yog Huab Tais Yes Xus xwb thiaj kaj tau lawv lub tswv yim kom pom kev tuaj.
Peb pom tias tus neeg ua zoo, mas nws nyiam raug cov neeg phem hiam; txawm li ntawd los peb txhob tag siab rau kev ua zoo. Peb pom tias tus neeg hlub zeej tsooom, mas nws nquag raug sawv daws ntxias siv; txawm li ntawd los peb txhob tso tseg kev hlub lwm tus pov tseg. Peb pom tias cov neeg siab ncaj nyiam raug ntxeev siab; txawm li ntawd los peb txhob ua siab nkhaus pauj.
Txhua yam no peb pom nyob hauv Huab Tais Yes Xus lub neej, nws yog tus zoo txhij tsis kav nws raug cov Fas Lis Xais thiab pej xeem cov laus neeg hiam tias nws vam txog dab tuaj pab tsoom sid, lawv hiam tias nws tsa nws txij Tswv Ntuj. Huab Tais Yes Xus hlub tas ib zeej tsoom tab sis tsoom sid tsuas vam kom nws pab lawv tau raws li lawv lub siab ntshaw. Huab Tais Yes Xus ua siab ncaj rau cov thwj tim tab sis lawv ntxeev siab rau nws nyob hauv hmo kawg. Txawm tias Huab Tais Yes Xus raug zoo li ntawd, tsis kav nws kuj yeem tuag kom tau cawm sawv daws, Huab Tais Yes Xus tsis tso sawv daws pov tseg, nws zoo siab ua qhov pom kev kaj lub qab ntuj neeg. Yog li mas peb tsoom neeg ntseeg sawv daws kuj yuav taug Huab Tais Yes Xus tus lw no vim Huab Tais Yes Xus xaiv peb thiab thau peb hauv lub qab ntuj neeg los. Nyob zoo sawv daws.
