ZAJ NYEEM HNUB TIM 21 LUB 6 HLIS 2024
HNUB NCO TXOG LEEJ NTSIAB LUS IS KOOS NTXAS
COV LUS NYOB HAUV MAS TAIS NTAWV MOO ZOO (MT 6: 19-23)
Kwv tij Hmoob sawv daws, hnub no nej hnov Huab Tais Yes Xus hais cov lus ntuas kom sau tej lub cuab tam nyob saum ntuj vim tias nej lub cuab tam nyob qov twg mas nej lub siab yuav dai ncuv nyob qhov ntawd.
Muaj li Huab Tais Yes Xus hais tiag, peb pom tias ib tug neeg twg yog nws muab siab dai ncuv rau ib yam dab tsi mas nws yuav tsis quav ntsej txog lwm yam, nws yuav muab tas nws lub sij hawm rau yam ntawd.
Huab Tais Yes Xus xav kom peb ua zoo li ntawd nyob hauv peb txoj kev ntseeg. Txoj kev ntseeg xwb thiaj yuav coj tau peb mus cuag Tswv Ntuj, txoj kev ntseeg xwb thiaj yog lub teeb ua rau peb lub siab pom kev tuaj. Thaum peb lub siab pom kev mas peb thiaj yuav nyob tau kaj lug. Qhov ntawd yog lub cuab tam nyob saum ntuj.
Kwv tij Hmoob, peb yuav muab lub siab dai ncuv rau peb txoj kev ntseeg puas tau? Los peb yuav xaiv muab siab dai rau ntiaj teb tej kev haub kev ntxias?
Huab Tais Yes Xus hais tias lub txhab cuab tam nyob ntiaj teb muaj kab rws kab lia txo thiab muaj tub sab thov qhov tsev tuaj nyiag cov cuab tam mus tau. Zoo ib yam li tej kev lom zem, kev deev siab uas tsheej xeeb tuaj rau peb lub siab ib pliag xwb ces twb yuav yaj mus. Tej ntawd pab tau peb me ntsis xwb yuav ab kom peb zoo siab xyiv fab mus ib txhis tsis tau.
Hnub no, peb kav tsij los sau peb tej cuab tam tso rau hauv lub txhab nyob saum ntuj mog. Nyob zoo sawv daws.
