ZAJ NYEEM HNUB TIM 19 LUB 5 HLIS 2025
HNUB OB, LIS PIAM 5 CAIJ HLA
COV LUS NYOB HAUV ZAM NTAWV MOO ZOO (Z 14: 21-26)
Kwv tij Hmoob, muaj ib zaug ib tug kws lij choj nug Huab Tais Yes Xus tias nyob hauv Txoj Cai, lo lus qhia twg loj dua cov. Huab Tais Yes Xus teb li no rau nws; “Koj yuav muab tas koj lub siab, tas koj tus ntsuj plig, tas koj lus tswv yim los nyiam koj tus Huab Tais Tswv Ntuj.” Lo lus no kuj yog lo lus qhia loj tshaj hauv peb txoj kev ntseeg txog Yes Xus thiab. Li ntawd, lub Koom Txoos thiaj ntuas peb tsis tseg kom niaj lis piam hnub chiv, peb mus koom lub Txoos Txi Ntuj, niaj hnub peb muab ib lub sij hawm los teev Ntuj mloog Tswv Ntuj Lo Lus. Vim lo lus hais ntawm ncauj tias “Kuv nyiam Tswv Ntuj, kuv nyiam Huab Tais Yes Xus’ mas tus twg yeej hais tau, tab txawm tus ntseeg thiab tus tsis ntseeg.
Tab sis hnub no, Huab Tais Yes Xus qhia tseeb kawg tias yog peb nyiam nws, peb yuav ua li cas. Huab Tais Yes Xus hais li no “Tus muaj kuv cov lus qhia thiab nws coj rawv kuv cov lus qhia, nws thiaj yog tus nyiam kuv”, txhais tias “Tus twg nyiam kuv, nws yuav ua raws li kuv cov lus.”
Yog li ntawm peb, peb puas nyiam Huab Tais Yes Xus tiag? Peb puas mloog thiab ua raws li cov lus niaj hnub Huab Tais Yes Xus hais rau peb nruab siab? Peb mus koom lub Txoos Txi Ntuj tas, peb puas khaws Huab Tais Yes Xus cov lust us Txiv Plig nthuav los ntuas peb coj los ua raws?
Kwv tij, peb yog me nyuam neeg, yog neeg muaj txhaum, yog neeg tsis muaj zog. Peb yuav tau vam txog Huab Tais Tswv Ntuj xa Leej Ntuj Plig tuaj ntxiv zog rau peb, tuaj pab peb kom nco tau cov lus Huab Tais Yes Xus hais rau peb, thiab ua lub neej raws li Huab Tais Yes Xus qhia peb.
Huab Tais Tswv Ntuj hlub peb, nws xa Leej Tub tuaj qhia txoj kev tshiab rau peb taug, nws xa Leej Ntuj Plig Ntshiab tuaj tsom kev rau peb siab kom peb txhob plam ntawm Tswv Ntuj txoj kev. Li ntawd, thiaj tsim nyog peb yuav kub siab twm Ntawv Ntshiab thiab thov Leej Ntuj Plig.
Ua cas thiaj yuav twm Ntawv Ntshiab, vim tias Ntawv Ntshiab yog phau ntawv ntim Tswv Ntuj lo lus. Yog peb tsis muaj sij hawm ntau, peb nyeem Ntawv Moo Zoo hauv Ntawv Ntshiab kuj tau. Ntawv Moo Zoo yog cov phau ntawv piav txog Huab Tais Yes Xus cov hauj lwm cawm neeg thiab cov lus qhia neeg ua lub neej xis Tswv Ntuj siab. Huab Tais Yes Xus cov lus yog Tswv Ntuj Lo Lus vim Huab Tais Yes Xus yog Leej Lo Lus tuaj ntawm Tswv Ntuj tuaj. Lub Moo Zoo hnub no Huab Tais Yes Xus twb hais tias “Lo lus uas nej hnov, tsis yog kuv lo lus; yog Leej Txiv uas xa kuv tuaj lo lus.”
Li ntawd, kom peb cov Hmoob ntseeg tau tias lub Moo Zoo nej niaj hnub hnov peb tshaj nyob hauv xov tooj cua no tsis yog peb lam xev tswv yim, tab sis yog lub Moo Zoo tuaj ntawm Tswv Ntuj tuaj. Nej mloog, nej coj mus xav, nej thov Leej Ntuj Plig kaj nej lub siab, ces nej khaws mus ua raws kom txi txiv hauv nej. Nej ua li mas nej thiaj yuav yog tus nyiam Huab Tais Yes Xus tiag tiag. Nyob zoo sawv daws.
