ZAJ NYEEM HNUB TIM 18 LUB 11 HLIS 2025
HNUB CEV LEEJ NTSHIAB POB ZEB THIAB LEEJ NTSHIAB PAJ LUG LUB TUAM TSEV
COV LUS NYOB HAUV MAS TAIS NTAWV MOO ZOO (MT 14: 22-33)
Kwv tij hmoob sawv daws, hnub no yog hnub Koom Txoos cia peb hwm txog hnub lub tuam tsev teev Ntuj loj uas yog lub tuam tsev teev Ntuj Leej Ntshiab Pob Zeb thiab Paj Lug nkawd. Li ntawd, peb yuav los nyeem cov zaj uas piav txog Leej Ntshiab Pob Zeb.
Ntawv Moo Zoo nyob rau hauv hnub no piav tias, lub caij thaum Yes Xus ua hwj huam kom cov ncuav mov su tuaj thawj zaug tas, tom nqa ntawd Yes Xus kom cov Thwj Tim nce nkoj ua ntej lawm sab ntug dej tim ub, hos Yes Xus nrog tsoom pej xeem nyob ib me ntsis thiab tos tsoom pej xeem mus tsev tas ces Yes Xus mam caum qab mus. Thaum zeej tsoom rov mus tsev tas lawm Yes Xus nces mus pem roob thiab tom qab nws teev Ntuj tas, ces nws mam caum cov Thwj Tim qab mus.
Lub sij hawm ntawd, cov Thwj Tim kuj tseem caij nkoj mus tsis txawj txog, vim muaj ib co cua hlob pheem ntsawj pem hauv ntej tuaj tas zog, ces zoo li lub nkoj mus tsis qig chaw li. Thaum cov Thwj Tim pom Huab Tais Yes Xus mus ko taw saum nplaim dej thiab twb los yuav txog lawv. Ua rau cov Thwj Tim kuj ceeb me ntsis, lawv xav hauv siab tias ntshai yog dab, los yog poj ntxoog xwb? Huab Tais Yes Xus thiaj hais rau lawv tias “Nej txhob ntshai yog kuv xwb.”
Thaum Pob Zeb hnov dheev li ntawd nws teb loo tias Huab Tais yog koj tiag no, koj kheev kom kuv tsuj nplaim dej tuaj cuag koj puas tau?
Yes Xus thiaj teb tias tuaj mas! Ces Pob Zeb thiaj nqes loo saum nkoj rau hauv dej thiab tsuj saum nplaim dej mus cuag Yes Xus, ua ciav nws mus tau tiag. Tab sis, thaum Pob Zeb tab tom ua xyem xyav, ces nws pib tog rau hauv dej. Nws thiaj qw qw thov kom Huab Tais Yes Xus pab nws. Ces tam sim ntawd Huab Tais Yes Xus thiaj cev tes mus rub nws thiab hais tias “Neeg ntseeg tsawg ua cas koj ua xyem xyav.”
Kwv tij phooj ywg sawv daws, ntau zaus, peb kuj zoo ib yam li Pob Zeb nyob rau hauv hnub no thiab. Nej xav tias puas muaj qee zaus nej ua xyem xyav txog nej txoj kev ntseeg. Thaum nej mus teev Ntuj, nws xav tias nej mus teev Ntuj ua dab tsi? Leej twg kom nej mus, los yog nej xav mus nej. Muaj qee zaus nej siv nej lub zog thiab nej lub sij hawm los ua hauj lwm tshaj Ntuj lus dawb dawb, los yog nej pab cov hauj lwm tim tsev teev Ntuj, nej puas xav tias, nkim nej lub sij hawm, los yog nej puas xav tias nej ua hauj lwm rau Ntuj, es nej puas yuav tau txiaj ntsim dab tsi? Nej paus xav tias Huab Tais Yes Xus puas hlub nej, thiab puas cawm tau nej tiag.
Kwv tij sawv daws, thaum nej tab tom ua xyem xyav Huab Tais Yes Xus twb hnov nej cov lus uas nej tab tom xav hauv nej lub siab tas lawm. Nyob rau hauv cov zaj nyeem nej yuav pom tias, txhua txhia zaus cov Thwj Tim xav hauv siab xwb Huab Tais Yes Xus twb hnov thiab paub qhov lawv xav tas lawm.
Zoo yam li zaj nyob rau hnub no thaum Pob Zeb tab tom xav hauv siab Huab Tais Yes Xus twb xub hnov tas, nws thiaj hais rau Pob Zeb tias “Neeg Ntseeg tsawg, cas koj txoj kev ntseeg yuav me ua luaj!” Lo lus no yog ib lo lus uas Huab Tais Yes Xus hais rau nws cov Thwj Tim thiab nws kuj xav hais rau peb cov ntseeg sawv daws, tias, nej puas tseem muaj lub siab ntseeg ruaj khov tiag.
Kwv tijs awv daws, zaj no yog ib zaj zoo txhib peb siab tias yog thaum peb muaj txoj kev ntseeg ruaj txog Huab Tais Yes Xus, mas peb ua dab tsi los peb ua tau thiab peb yuav tsis ntshai, tab sis, yog thaum peb ua xyem xyav txog peb txoj kev ntseeg, ces peb zoo li Pob Zeb uas xyem xyav ces nws yuav maj ma tog rau hauv dej ntuj.
Nyob zoo sawv daws.
