ZAJ NYEEM HNUB TIM 18 LUB 10 HLI 2025
HNUB UA HMOOV TXOG LEEJ NTSHIAB LUS KAS
COV LUS NYOB HAUV LUS KAS NTAWV MOO ZOO (LK 10: 1-9)
Kwv tij sawv daws, lub Moo Zoo hnub no yog hais txog Huab Tais Yes Xus xa 72 tus thwj tim mus tshaj lub Moo Zoo rau cov zej zog. Lawv kho cov neeg muaj mob muaj nkeeg thiab lawv tshaj tias, Tswv Ntuj lub Ceeb Tsheej los txog ze lawm. Yog li ntawd, txoj kev cia siab thiaj rov tshwm sim tuaj nyob rau hauv cov neeg uas tag kev cia siab. Thiab lawv qhia tseeb tias, Tswv Ntuj nco ntsoov nws haiv neeg, cov uas muaj txoj kev ntseeg txog Tswv Ntuj, mas Tswv Ntuj hnov qab ntsoov mus li. Mas ib hnub twg, Tswv Ntuj yeej yuav rov los xyuas nws haiv neeg.
Nyob rau hnub no, Huab Tais Yes Xus cov thwj tim coj txoj kev kaj lug kaj nrig mus rau tsoom neeg, tsis yog mus qhia lawv. Lawv coj txoj kev cia siab mus rau tsoom neeg, tsis yog coj txoj cai rau lawv coj. Lawv coj txoj kev twj lij, tsis yog coj txoj kev caij tsuj. Vim zeej tsoom neeg ntshaw txog Tswv Ntuj txoj kev hlub thiab txoj kev ncaj ncees, tsis yog txoj cai quab yuam neeg, zoo li cov Fas Lis Xais thiab cov kws Lij Choj muab rau lawv coj.
Kwv tij sawv daws, cov tub tshaj Ntuj lus, yuav tsum tsis ntshaw lub hwj chim, yuav tsis quab yuam luag lwm tus, yuav tsis muaj kev sib cav sib ceg, tiam sis, lawv muaj txoj kev ntseeg ruaj khov thiab lawv tso siab rau Huab Tais Tswv Ntuj txoj kev saib xyuas, li ntawd, kev teev Ntuj thiab tso siab npuab Tswv Ntuj yog qhov lawv yuav tsum ua.
Li cas los xij, thov kom nco ntsoov tias cov tub tshaj Ntuj Lus yuav tsum coj Tswv Ntuj lub Moo Zoo mus txog luag lwm leej lwm tus. Thiab yuav tsum ua rau luag muaj kev kaj siab lug.
Kwv tij sawv daws, peb sawv daws yog Tswv Ntuj cov me nyuam, thiab peb yuav tsum tshaj Tswv Ntuj lub Moo Zoo rau cov nyob ib ncig peb kom lawv tau hnov thiab tau txais Tswv Ntuj lub Moo Zoo, uas yog txoj kev cawm neeg. Thov kom peb muab siab rau teev Ntuj thiab npuab Tswv Ntuj.
Hnub no kuv tuaj ntsib nej li no xwb, thov kom Tswv Ntuj nrog nej nyob thiab ua nej siab kaj lug.
Nyob zoo sawv daws.
