ZAJ NYEEM HNUB TIM 17 LUB 7 HLI 2024
HNUB PLAUB LUB LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 11: 25-27)
Cov kwv tij, nej hnov Huab Tais Yes Xus hais tias ‘Txiv, koj zais tej yam ntawd rau cov neeg thoob tsib thiab cov neeg ntse, koj qhib rau cov me nyuam yaus.”
Huab Tais Tswv Ntuj zais dab tsi? Yog zais txoj kev paub txog Huab Tais Tswv Ntuj.
Cov kwv tij, peb muab ua tib zoo xav mas yuav pom li Huab Tais Yes Xus hais. Cov neeg lawv khav tias lawv ntse txaus lawm, lawv hais tias lawv muaj tswv yim thoob tsib to nrog mas lawv tsis kam ntseeg tias muaj Tswv Ntuj. Muaj tej tus lawv nyeem thiab xawb nrhiav txog Huab Tais Yes Xus lub neej, tab sis lawv tsis paub Huab Tais Yes Xus.
Tsis zoo li cov neeg lees tias lawv yog neeg me, lawv tsis muab hlob. Cov neeg me lawv xav paub Huab Tais Yes Xus, lawv xav txais kev cawm ntawm Huab Tais Yes Xus, mas lawv ntseeg tias muaj Tswv Ntuj tiag.
Cov neeg txawj ntse hais tias cov neeg me ntseeg tias muaj Tswv Ntuj mas yog cov neeg vwm, yog cov neeg qaug qav. Tab sis qhov tseeb yog vim lawv tsis xav kom muaj dua lwm tus thoob tsib dua lawv, loj dua lawv. Lawv rov dag lawv.
Kwv tij, tus nyiam ua neeg me xwb nws thiaj yuav qhib siab paub tau Huab Tais Yes Xus, thiab ntseeg tau tias muaj Tswv Ntuj tiag. Niaj hnub, peb thiaj yuav thov Ntuj tas zog kom peb nyiam ua neeg me, kom peb txhob ua neeg khav theeb tsis kam txais Huab Tais Tswv Ntuj.
Peb tseem yuav thov Ntuj rau cov neeg muab hlob, cov tsis kam qhib siab mloog Huab Tais Yes Xus los, tsis kam lees tias muaj Tswv Ntuj. Thov Huab Tais Tswv Ntuj qhib lawv lub siab lub tswv yim kom lawv pom qhov zais ntshis hauv Tswv Ntuj, kom lawv hloov tau lub siab tshiab los ntseeg txog Tswv Ntuj.
