ZAJ NYEEM HNUB TIM 17 LUB 10 HLI 2024
HNUB NCO TXOG LEEJ NTSHIAB IS NYAS XYUS
COV LUS NYOB HAUV LUS KAS NTAWV MOO ZOO (LK 11: 47-54)
Kwv tij Hmoob sawv daws, nag hmo nej hnov cov lus Huab Tais Yes Xus hais los tsawm cov Fas Lis Xais lawm, hnub no nej hnov cov lus Huab Tais Yes Xus hais los tsawm cov Kws Lij Choj los yog cov Kws Ntawv Ntshiab.
Cov Kws Lij Choj los yog Kws Ntawv Ntshiab mas yog cov neeg kawm phau Ntawv Cog Lus Qub, ces lawv paub Mais Xes txoj cai zoo hauj sim, lawv yog cov neeg paub txuj thiab paub txoj cai zoo.
Cov Kws Lij Choj tau kawm phau Ntawv Cog Lus Qub mas lawv paub tias txheej thaud cov His Xas Lais tau ua li cas los hiam cov Yaj Saub uas Tswv Ntuj xa tuaj ceeb toom Tswv Ntuj cov lus rau Tswv Ntuj haiv neeg. Lawv paub tias tus tuaj ntawm Tswv Ntuj tuaj yog tus neeg zoo li cas. Lawv saib Huab Tais Yes Xus cov hauj lwm thiab cov lus qhia mas lawv yeej mem tau tias Huab Tais Yes Xus yog tus tuaj ntawm Tswv Ntuj tuaj, tab sis lawv tsis kam ntseeg. Lawv tab tom taug lawv cov yawg koob tus lw muab Tswv Ntuj cov Yaj Saub tua. Lawv paub tab sis lawv yeej tab meeg ua txhaum, ces lawv thiaj yuav tsum ris lawv thiab lawv cov poj yawm lub txim tau muab cov Yaj Saub tua.
Huab Tais Yes Xus thiaj hais tias “Vim li ntawd, tiam neeg no yuav tsum ris lub txim them cov yaj saub tej ntshav uas tau nchuav txij thaum ntuj tsim teb raug los.”
Tseem muaj ib lo lus Huab Tais Yes Xus hais tsawm cov Kws Lij Choj, yog lo lus tias “Nej txoj hmoov phem, vim nej rho tus yawm sij qhib kev txawj ntse, tab sis nej tsis nkag mus hauv. Cov xav nkag mus hauv, los nej tsis pub lawv nkag.”
Tos Huab Tais Yes Xus hais li, vim cov Kws Lij Choj tau kawm phau Ntawv Cog Lus Qub mas lawv paub tej xwm cov Yaj Saub hais txog Huab Tais Yes Xus, tab sis lawv tsis yog tsis ntseeg xwb, lawv tseem tsis nthuav qhia tsoom sid thiab. Lawv muab tus yawm sij qhib kev txawj ntse, kev to taub Tswv Ntuj pov tseg kom sawv daws txhob tau nkag mus txais kev to taub Tswv Ntuj.
Kwv tij Hmoob, niaj hnub no peb cov neeg ntseeg piv tau rau cov Kws Lij Choj vim peb yog cov paub Tswv Ntuj lawm. Peb muab coj los xav saib peb puas muab peb kev paub ntawd npog cia, muab ntim hauv phij xab ces muab ntsuas phoo xauv. Los peb nthuav txog Tswv Ntuj rau cov neeg tsis paub, thiab peb qhib lub phij xab ntim Tswv Ntuj kev thoob tsib kom sawv daws to taub txog Tswv Ntuj.
Hnub no, nej hnov cov los no mas nyob ntawm nej saib nej yuav xaiv qhov twg.
