ZAJ NYEEM HNUB TIM 15 LUB 7 HLI 2024
HNUB NCO TXOG LEEJ NTSHIAB NPOS NAS VEES TUS LAS
COV LUS NYOB HAUV MAS TAIS NTAWV MOO ZOO (MT 10: 34-11: 1)
Kwv tij Hmoob sawv daws, puas yog Huab Tais Yes Xus tab tom hais kom peb txhob lub niam hlub txiv, txhob hlub me tub me nyuam? Puas yog Huab Tais Yes Xus xav kom peb muaj kev sib ntaus sib tua, rhuav kev thaj yeeb?
Yog peb muab twm raws li cov lus peb nyeem, mas nyaj peb yuav xav zoo li ntawd tiag. Tab sis kom peb nco tias Huab Tais Yes Xus yog Tswv Ntuj Leej Tub, nws xa Tswv Ntuj txoj kev hlub tuaj rau ntiaj teb neeg. Huab Tais Yes Xus nyiam peb npaum cas, nws thiaj yeem tuag saum Ntoo Cuam. Huab Tais Yes Xus qhia tas niaj tas xyoo kom sawv daws ua neej nyob sis nyiam sis hlub.
Yog li ua cas Huab Tais Yes Xus thiaj hais cov lus peb hnov hauv hnub no?
Lub Koom Txoos qhia peb tias thaum peb yuav twm cov lus hauv Ntawv Ntshiab, mas peb txhob twm raws li cov lus peb tau nyeem xwb, peb tsum soj ntsuam txog lub caij thaum ub Huab Tais Yes Xus ua neej nyob, peb soj ntsuam saib tus sau cov lus ntawd, nws lub tswv yim xav li cas, cov neeg tiam thaud lawv nyob zoo li cas, mas peb thiaj tsis yuam kev.
Yog peb muab saib kom txhij txhua, peb yuav pom tias lub caij ua ntej Huab Tais Yes Xus yuav tshaj lub Moo Zoo, hauv His Xas Lais daim av mas muaj ntau tus neeg sawv saub los txhib thiab ntxias tsoom pej xeem kom sawv khaj cai rau cov Los Mas. Zoo li niaj hnub no peb pom tias muaj ntau tus sawv los hais tias lawv yog tus Yes Xus tshiab, muaj ib txhia hais tias lawv thiaj yog Yes Xus lub tseem Koom Txoos.
Huab Tais Yes Xus xav qhia nws cov thwj tim tias lawv xav kom txoj kev raws nws nrhau cag khov kho mas lawv yuav tau ua siab ruaj nreb tiag tiag, lawv yuav tsum xaiv txoj kev raws nws ua qhov loj tshaj txhua yam. Thaum cov thwj tim tej swm neeg sawv los tiv lawv, mas lawv txhob tso txoj kev ua Yes Xus thwj tim pov tseg. Luag tej yuav ntxub thiab hiam cov thwj tim los cov thwj tim txhob ntxib thiab hiam luag rov.
Kwv tij Hmoob, Huab Tais Yes Xus cov thwj tim yuav tau ua cuag li hais, mas lawv thiaj tsis tso lawv txoj kev raws Huab Tais Yes Xus qab. Niaj hnub no, peb tab tom ntsib tej xwm li ntawd thiab, tsis yog cov cov swm neeg tiv yus, tab sis yog muaj ntau txoj kev ntseeg cuav sawv los ntxias peb. Peb yuav ua siab ruaj cuag li Huab Tais Yes Xus cov lus ntuas hauv hnub no.
