ZAJ NYEEM HNUB TIM 15 LUB 10 HLI 2024
HNUB NCO TXOG LEEJ NTSHIAB TES LES XAS NYOB AS VIS LAS
COV LUS NYOB HAUV LUS KAS NTAWV MOO ZOO (LK 11: 37-41)
Kwv tij Hmoob, peb ua neej nyob mas peb tau kawm thiab paub tias nyob ib puag ncig peb muaj tej kab mob ntau ntau, yog li mas peb tsum tau tu peb lub cev kom huv, ntxuav peb cov twj taig kom txhob khib liab, peb yuav tau ntxuav tes ua ntej yuav noj mov mas kab mob thiaj tsis nkag mus hauv peb lub cev. Cov Yus Das txheej thaud lawv tseem tsis tau paub txog tej no, tab sis lawv muaj txoj cai hais tias thaum lawv yuav chaws mus hauv tsev los yog noj ib pluag mov mas lawv yuav tsum xub ntxuav tes kom lawv lub cev tsis txhob lo tej yam tsis huv. Lawv muaj txoj cai li no vim lawv ntseeg tias neeg lub cev kev muaj mob yog vim neeg muaj txhaum, tus neeg muaj txhaum yog tus neeg tsis huv.
Hnub no, Huab Tais Yes Xus tab meeg hais rau cov Fas Lis Xais xav yuam kev ntawd tias tsis yog peb ntxuav tes ntxuav khob kom huv lawm, ces thaum peb noj mov haus dej caw mas tej yam tsis huv yuav tsis nkag mus nyob hauv peb. Ntxuav thiab tsis ntxuav los tsis muaj feem dab tsi txog qhov tsis huv. Tab sis qhov tsis huv tiag tiag mas yog yam tawm hauv neeg lub siab tuaj.
Kwv tij, Huab Tais Yes Xus hais li no mas ntob hlo cov Fas Lis Xais pob kub, vim lawv tab tom xav tej yam tsis zoo; lawv lub tswv yim tsis huv.
Huab Tais Yes Xus tsis yog tsawm lawv xwb, nws tseem ntuas lawv tias “Yog nej xav kom nej huv tiag, mas tsim nyog nej yuav muab yam nej muaj pub rau luag.”
Huab Tais Yes Xus lo lus no kuj yog nws hais rau peb nyob hauv hnub no thiab. Yog peb xav kom peb ua ib tug neeg huv, mas peb yuav xyaum pub yam peb muaj rau cov tsis muaj. Peb pub ces peb lub siab nqaim yuav dav, peb pub ces peb lub siab nkhaus yuav ncaj, peb pub ces peb lub siab qia dub yuav tshiab tuaj. Thaum ntawd mas peb lub siab thiaj yuav huv tau.
Kwv tij Hmoob, kev pub yam yus muaj mas tsis yog pub nyiaj pub txiaj los yog tej ris tsho, tej cuab tam uas qhov muag pom tau. Tab sis Huab Tais Yes Xus xav kom peb pub yam uas qhov muag pom tsis tau; yam li pub lo lus zoo, pub kev zam txim, pub lub tswv yim, pub lub siab zoo rau lwm tus.
Kwv tij, hais tau tias pub yam zoo zoo nyob sab hauv peb lub cev rau luag.
