ZAJ NYEEM HNUB TIM 13 LUB 8 HLI 2024
HNUB NCO TXOG LEEJ NTSHIAB VAJ QHIA POOS XIS AS NOS
COV LUS NYOB HAUV MAS TAIS NTAWV MOO ZOO (MT 18: 1-5, 10, 12-14)
Kwv tij Hmoob sawv daws, Huab Tais Yes Xus hais tias yog peb xav ua tus loj nyob saum Ntuj lub Ceeb Tsheej mas peb yuav rov saib peb me xws li cov me nyuam.
Lo lus no tsis yog kom peb rov ua ib tug me nyuam, tab sis yog kom peb ua tus neeg me tsis muab hlob, thiab tso siab tuag nthi rau Huab Tais Tswv Ntuj xws li cov me nyuam tso siab rau lawv niam lawv txiv.
Huab Tais Yes Xus tsis hais kom peb ua ib tug me nyiam vim peb pom tias muaj ib txhia me nyuam lawv lub hlwb laus, lawv txawj ua tus neeg dag luag tej, txawj zais lawv zaj tswv yim. Li ntawd, Huab Tais Yes Xus thiaj tsis hais kom peb ua xws li tus me nyuam. Peb tsuas ua xws li ib tug me nyuam xwb, tsis yog ua ib tug me nyuam.
Huab Tais Yes Xus hais tias “Tus twg txais ib tug me nyuam vim kuv lub npe, mas yog nws txais kuv”, yog txhais tias thaum peb pom ib tug neeg tsis muab hlob mas peb yuav hwm tus neeg ntawd thiab saib nws muaj tsim, ces peb yuav nyiam yuav hlub tus neeg tsis muab hlob.
Huab Tais Yes Xus tseem ntuas peb kom tsis txhob thuam cov neeg tsis paub dab tsi, xws li cov kwv tij tseem coj kev cai dab qhuas uas lawv tsis tau paub txog Tswv Ntuj. Huab Tais Yes Xus qhia kom peb mus nrhiav lawv thiab coj lub Moo Zoo mus txog lawv, mas muaj ib hnub lawv yuav to taub txog Tswv Ntuj ces lawv yuav tig los nyob hauv txoj kev ntseeg; Huab Tais Yes Xus thiaj hais tias “Nej Txiv nyob saum ntuj kuj yuav zoo siab thaum nws nrhiav tau ib tug yaj poob zoo, vim nej Txiv tsis xav kom nws ib tug yaj ncaim npoj mus.
Kwv tij Hmoob sawv daws, hnub no nej yuav nco ntsoov ua tus neeg me, nej yuav tsis txhob thuam lwm tus. qhov nej yuav ua mas yog tsob hwb luag thiab coj lub Moo Zoo mus kom txog nej cov kwv tij tseem tsis tau paub txog Tswv Ntuj.
