Zaj nyeem hnub tim 12 lub 1 hlis 2026
Nco txog Txiv Plig Nis Kos Las Npoos Kawm, tus Tim Khawv Thaib.
Cov lus nyob hauv Mas Kos Ntawv Moo Zoo (MK 1: 14-20)
Kwv tij sawv daws, nyob rau hauv phau Ntawv Ntshiab qhia peb tias, Tswv Ntuj ib txwm xa nws lub txiaj ntsim tuaj rau neeg thiab nrog neeg sib fim, nws xa nws cov Zaj Saub tuaj ua nws lub ncauj nrog neeg sib txuas lus. Los txog ntua rau lub caij Huab Tais Yes Xus tuaj, uas yog Huab Tais Leej Pleev tus cawm seej tau nqes los. Huab Tais coj lub Moo Zoo uas qhia txog Tswv Ntuj lub Ceeb Tsheej tuaj rau peb neeg ntiaj teb sawv daws. Yog lub txiaj ntsim uas Tswv Ntuj xav cawm neeg sawv daws kom taut xais kev dim, thiab yog lub luag hauj lwm uas Leej Txiv tso rau Leej Tub, thiab Leej Tub tub tau xaiv ib cov neeg los txais txoj hauj lwm tshaj lub Moo Zoo txuas ntxiv mus. Uas peb hu tias yog Yes Xus cov Thwj Tim, kom tau tshaj txog Tswv Ntuj lub Moo Zoo rau txhua txhia haiv neeg, ces nyem no lub Moo Zoo thiaj tuaj txog peb sawv daws. Li ntawd, peb thiaj tau lub npe tias yog tsoom neeg ntseeg Ntuj, uas yog Tswv Ntuj haiv neeg tshiab. Peb yuav tsum nco ntsoov lub txiaj ntsim uas Tswv Ntuj pub rau peb, thiab lub luag hauj lwm uas nws xav kom peb ua, yog qhov tshaj txog Tswv Ntuj lub Moo Zoo rau neeg ntiaj teb sawv daws, txhua leej txhua tus, kom tau txais Tswv Ntuj txoj kev hlub. Peb yuav coj Tswv Ntuj lub Moo Zoo mus txog txhua txhia tus neeg uas nyob ze peb, peb yuav ua kom lawv pom txog Tswv Ntuj lub siab nyiam thiab hlub neeg. Mas thiaj tsim nyog peb yog Tswv Ntuj cov me nyuam.
