ZAJ NYEEM HNUB TIM 1 LUB 7 HLI 2026
HNUB PLAUB, LIS PIAM 13 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 8: 28-34)
Lub Moo Zoo hnub no piav tias Huab Tais Yes Xus lawv hla mus txog Nkas Das Las teb, mas muaj ob tug neeg raug dab tawm hauv ntxa tuaj cuag Huab Tais Yes Xus. Ob tug dab ntawd thov kom Huab Tais Yes Xus cia lawv mus nyob hauv pab npua. Huab Tais Yes Xus kheev, mas cov dab thiaj li mus nkag rau hauv pab npua, ces tas cov npua dhia puag saum tsag rau hauv dej ntuj tas. Nyob hauv zaj no peb hnov cov dab hu Huab Tais Yes Xus ua ‘Tswv Ntuj Leej Tub’ thiab cov dab lees tias Huab Tais Yes Xus yog tus muaj hwj chim tsim txom lawv, mas thaum Huab Tais Yes Xus hais rau cov dab kom kav tsij mus, mas lawv cia li mus raws li Huab Tais Yes Xus hais.
Kwv tij, Huab Tais Yes Xus tsis khuv xwm npab npua coob coob tuag rau hauv dej ntuj, yam Huab Tais Yes Xus khuv xim, mas yog ob tus neeg raug dab tsis huv. Tab sis ntawm cov neeg nyob hauv thaj tsam ntawd, lawv saib lawv cov npua muaj nqis dua ob tus neeg raug dab tsis huv, lawv kuj tseem saib lawv cov npua muaj nqis dua Huab Tais Yes Xus txoj kev hlub thiab, ces lawv thov kom Huab Tais Yes Xus thiab cov thwj tim tawm hauv lub teb chaws mus.
Lub Moo Zoo no qhia peb tias Huab Tais Yes Xus hlub peb, nws xav kom peb dim ntawm kev txhaum kev phem cov saw hlau khi peb ib yam li Huab Tais Yes Xus hlub ob tug raug dab tsis huv. Tab sis muaj ntau zaus peb ua zoo li cov neeg nyob Nkas Das Las, peb thov kom Huab Tais Yes Xus txav mus deb ntawm peb vim peb ntshai tsam nyob ze Huab Tais Yes Xus ces peb yuav plam ntiaj teb cov cuab tam, peb yuav plam kev tau zoo. Peb xaiv ntiaj teb lub cuab tam ua ntej xaiv Huab Tais Yes Xus. Peb xaiv txoj kev txhaum ua ntej txoj kev ntshiab. Peb xaiv qhov phem ua ntej qhov zoo.
Kwv tij Hmoob, hnub no xav kom peb qhib siab txais Huab Tais Yes Xus los nyob ze peb, los ua hwj huam hauv peb lub neej, los ntiab tus dab phem ntxias neeg hauv peb nruab siab tawm mus, mas peb thiaj yuav rov tshiab dua tuaj.
Nyob zoo sawv daws.
