Vaj Qhia Fas Ntshis Kus ceeb toom txog Xyoo Ntshiab huv, thov kom peb muaj kev cia siab puv npo.

Vaj Qhia Fas Ntshis Kus ceeb toom txog Xyoo Ntshiab huv, thov kom peb muaj kev cia siab puv npo. (Pope proclaims Jubilee: ‘May hope fill our days!’)

Nyob hauv lub thaj txi Ntuj hauv lub tsev teev Ntuj hwm Leej Ntshiab Pob Zeb hnub xya tag los, uas yog hnub hwm Niam Mab Liab nce mus saum ntuj. Vaj Qhia tau tshaj tias : xyoo 2025 los yuav txog no, yog Xyoo Ntshiab Huv. Vaj Qhia tau xa lo lus tshaj tawm hais txog kev cia siab tsis ua kom peb tag kev cia siab, mus rau cov Txiv Plig thiab cov Tswv Qhia nyob thoob ntiaj teb.

“Kev cia siab” yog lub ntsiab lus hauv Xyoo Ntshiab Huv uas yog xyoo 2025. Lub ntsiab lus no ua kom pom txog lo lus qhib nyob hauv cov lus tshaj tawm “kev cia siab tsis ua kom tag kev cia siab”. Vaj Qhia tshaj tias : xyoo tsuj xeeb yog pib nyob hauv kev qhib lub qhov rooj tsev teev Ntuj hwm Leej Ntshiab Pob Zeb, nyob hauv lub Caij Yes Xus Yug Los xyoo 2024. Tom qab ua hmoov tsuj xeeb tag, hnub tim 29 lub 12 hlis xyoo no, Vaj Qhia yuav qhib lub qhov rooj ntshiab ntawm lub tsev teev Ntuj hwm Leej Ntshiab Zam Lateran, uas yog lub tuam tsev teev Ntuj nyob Los Mas.

Tib hnub ntawd, tas cov tsev teev Ntuj loj nyob thoob ntiaj teb Tswv Qhia yuav ua thaj txi Ntuj tsuj xeeb qhib Xyoo Ntshiab Huv. Hnub hwm Leej Ntshiab Mab Liab ua Yes Xus niam uas yog hnub tim 1 lub 1 hlis xyoo 2025, Vaj Qhia yuav qhib lub qhov rooj ntshiab hauv tsev teev Ntuj hwm Leej Ntshiab Mab Liab Major. Lub qhov rooj ntshiab ntawm lub tsev teev Ntuj hwm Leej Ntshiab Paj Lug uas nyob sab nraud yuav qhib rau hnub tim 5 lub 1 hlis 2025. Yog hnub tsuj xeeb Epiphany. Vaj Qhia Fas Ntshis Kus sau tseg tias :

“Tas ib xyoos peb tsim nyog yuav ua txhua yam kom Tswv Ntuj cov neeg muaj feem cuam txog kev sib koom puv npo, nyob hauv kev tshaj Tswv Ntuj txoj kev cia siab. Thiab yog lub cim zeem tseeb txog lawv cov txiaj ntsim.”

Kev tsuj xeeb ntawm tas cov tsev teev Ntuj nyob thoob ntiaj teb, yuav xaus rau hnub tim 28 lub 12 hlis xyoo 2025. Cov qhov rooj ntawm cov tsev teev Ntuj loj xws li ; tsev teev Ntuj hwm Leej Ntshiab Zam Lateran, tsev teev Ntuj hwm Leej Ntshiab Mab Liab Major thiab tsev teev Ntuj hwm Leej Ntshiab Paj Lug uas nyob sab nraud yuav raug kaw tseg tib hnub ntawd. Qhov kawg lub xyoo tsuj xeeb yuav xaus nyob Los Mas rau hnub tsuj xeeb Yes Xus yug los, uas yog hnub tim 6 lub 1 hlis 2026. Yog lub caij yuav rov tau txais kev cia siab, vim sawv daws paub tias kev cia siab yog dab tsi.

Vaj Qhia tau sau tseg nyob hauv nws thawj lo lus qhib tsab ntawv tias : “Nyob hauv txhua leej txhua tus lub siab, kev cia siab yog qhov xav tau yam zoo zoo uas yuav tshwm sim tuaj. Tab txawm peb tsis paub tias yav tom ntej yuav zoo li cas kuj xij.”

Vaj Qhia Fas Ntshis Kus cia siab tias : xyoo ntawm kev tsuj xeeb yuav yog lub zoo caij rau peb rov tau txais kev cia siab. Thiab kom nco tias kev tsim koob hmoov yog kev nco txog txhua yam tshwm sim nyob hauv lub xyoo tsuj xeeb.   

Raws qhov tseeb mas yog kev nrhiav qhov tseeb nyob hauv neeg lub neej. Qhov zoo uas peb pom ntawd yog nyob hauv peb txoj kev cav txog Tswv Ntuj lub hwj chim.

Vaj Qhia tau caw tas cov tsev teev Ntuj nyob thoob ntiaj teb, kom npaj Txiv Plig thiab cov neeg ntseeg los daws txhaum thiab yuav ua mus kom thawm xyoo. Vaj Qhia tau caw cov neeg ntseeg nyob hauv lub Koom Txoos sab hnub tuaj thiab cov uas tau koom nrog Leej Ntshiab Pob Zeb lawm, kom lawv muaj kev sib koom tsuj xeeb Xyoo Ntshiab Huv ua ke. Nyob Los Mas lawv yuav muaj kev zoo siab tos txais.

Vaj Qhia ntsia pom tias muaj coob leej neeg uas lawv yuav tsum ua raws lawv txoj kev kwv ntoo cuam. Thiab raug yuam kom tso lawv lub teb chaws tseg, vim kev kub ntxhov thiab tsis muaj kev ruaj ntseg. Vaj Qhia thov ntuj tias : hauv nruab xyoos uas yog Xyoo Ntshiab no : “Qhov pom kev ntawm cov neeg ntseeg txoj kev cia siab, yuav ci mus rau cov poj niam thiab txiv neej txhua tus. Yog lub moo zoo ntawm Tswv Ntuj txoj kev nyiam kev hlub uas xa tuaj rau txhua leej. Thiab cov tsev teev Ntuj yuav zeem tseeb txog lub moo zoo no nyob tas txhua qhov chaw thoob ntiaj teb.”   

Thaum nyeem “cov cim ntawm lub sij hawm”, Vaj Qhia pom ntiaj teb txoj kev ntshaw kev thaj yeeb muaj kev kub ntxhov thiab kev sib txeeb heev zuj zus, kev xav muaj me nyuam kuj ploj mus. Ntau lub teb chaws tsoom pej xeem tab tom raug lub caij ntuj no. Vaj Qhia thov kom muaj kev sib txhawb nqa thiab txhawb kev cia siab. Vaj Qhia thov ntuj rau cov neeg raug txim tias : “Nws nco txog lawv txoj kev txo txim los zam txim nyob hauv lub Xyoo Ntshiab Huv. Nws vam tias nws yuav tuaj yeem qhib tau lub qhov rooj ntshiab hauv tsev loj faj, kom ua lub cim rau cov neeg raug txim pom txog lawv lub neej yav tom ntej muaj kev cia siab thiab rov tau txais kev cia siab.”

Vaj Qhia thov kom ua rau cov neeg raug txim raws qhov ncaj ncees thiab raws lawv lub meej mom. Thiab nws tseem thov kom txhob siv lub txim tua neeg ntxiv.

Nws thov kom muab kev cia siab rau cov neeg mob, cov tub ntxhais hluas thiab cov neeg laus xws li : pog yawg, niam tais yawm txiv, cov khiav ua thoj nam thiab cov neeg pluag. Vaj Qhia xam pom tias : cov txiv hmab txiv ntoo hauv ntiaj teb no yog sawv daws li, thiab nws txhib kom sawv daws los pab cov neeg pluag. Vaj Qhia tseem thov cov teb chaws nplua nuj kom zam nuj nqis rau cov teb chaws uas lawv tsis tuaj yeem them lawv tej nuj nqis tau. Nws xav txog xyoo 2025, uas yog hnub txwm 1,700 xyoo ntawm lub Rooj Ncauj Lus thawj zaug. Nws thov kom muaj kev sib koom tes thiab ncaj ncees hauv lub Rooj Ncauj Lus. Nws rov muab siab rau los txhawb nqa kev sib koom tes ntawm cov neeg ntseeg. Nws thov kom muaj kev ua hauj lwm nyob hauv hnub ua hmoov hla ua ke. Vaj Qhia hais tias : xyoo 2025 tas tsoom neeg ntseeg yuav tsuj xeeb qhov tob zais ntshis hauv lub Caij Hla tib hnub. Nws hais tias cov neeg ntseeg txoj kev cia siab hauv Yes Xus kev tuag thiab kev sawv rov los, yog qhia txog peb lub neej ntu kawg. Yog kev nrog Tswv Ntuj nyob sov siab mus ib txhis nyob saum ntuj. Peb tau txais kev cawm los ntawm Tswv Ntuj txoj kev khuv leej, yog qhov pom meej nyob hauv qhov paj tshab zam txim txhaum. Raws li kev lees txim ntxuav peb ntawm peb tej kev txhaum, kev zam txim ntawm kev txhaum nrog rau kev zam txim hauv Xyoo Ntshiab Huv. Nws yog ntxuav peb cov txhaum los ntawm lub Cim Ntshiab hauv kev txiav txim.

Vaj Qhia xaus cov lus hauv kev txiav txim, yog lo lus kev cia siab zaum kawg. Nws thov Ntuj tias : “Xyoo Ntshiab Huv uas los yuav txog yog Xyoo Ntshiab Huv uas muaj kev cia siab puv npo. Kev cia siab ntawm peb nyob hauv Tswv Ntuj. Thov kom Xyoo Ntshiab Huv pab peb rov muaj kev cia siab, kev cia siab uas peb xav tau los ntawm lub Koom Txoos thiab ib zeej tsoom neeg. Hauv neeg kev sib raug zoo, kev sib raug zoo hauv cov teb chaws thiab peb cov hauj lwm txhawb nqa txhua tus lub meej mom. Hwm qhov paj tshab kev txim kho ntawm Tswv Ntuj.”

Thov kom peb tau txais txoj kev cia siab tam sim no ! Vaj Qhia thov kom cov neeg ntseeg ua lub neej mus raws nyias txoj kev ntseeg. Ua tim khawv thiab caw sawv daws tso siab rau Tswv Ntuj. Thov lub zog ntawm kev cia siab nyob puv hauv peb. Thaum peb tab tom kub siab lug tos Yes Xus tus yuav tuaj, thov kom Tswv Ntuj lub koob meej ci ntsa iab tam sim no thiab mus ib txhis.

Xyoo Ntshiab Huv muaj tus piv txwv nyob hauv liv xwm thiab Ntawv Ntshiab. Peb pom tau nyob hauv ntawv Les Vis thiab ntawv Cog Lus Qub. Ib feem ntawm kev tsuj xeeb yog kev daws tso cov neeg raug ua qhev thiab cov neeg raug txim mus txog kev zam nuj nqis, puav leej yog los ntawm Tswv Ntuj kev khuv leej.

Vaj Qhia Npos Nis Fes tim 8 rov tsa cov kab ke Xyoo Ntshiab Huv nyob hauv xyoo 1300. Tiag tiag tsim nyog yuav hais txog kev daws tso cov qhev, tab sis cov neeg ntseeg hais kom daws txim txhaum thiab kev muab txim, vim kev txhaum uas yuav ntsib nyob hauv dab teb. Kev tsim koob hmoov uas tawm hauv tsev teev Ntuj mus, yog xaiv rau “collection”, ces mam mus rau tsev teev Ntuj. Qhov ntawd yog lub cim ntawm kev mus kev hauv kev cia siab uas pom kev nyob hauv Tswv Ntuj cov Lus sau cov neeg ntseeg los ua ke.

Xyoo Ntshiab Huv yuav xaus nyob hauv kev kaw cov qhov rooj ntshiab ntawm lub tuam tsev teev Ntuj hwm Leej Ntshiab Pob Zeb hnub tim 6 lub 1 hlis 2026, uas yog hnub Yes Xus yug los. Tas Xyoo Ntshiab Huv, thov kom qhov ci ntsa ntawm cov neeg ntseeg txoj kev cia siab, ci mus rau cov poj niam thiab txiv neej txhua tus uas yog xa Tswv Ntuj kev nyiam kev hlub mus rau txhua tus. Thov kom lub Koom Txoos ua tim khawv ncaj ncees nyob hauv lub moo zoo no mus thoob ntiaj teb.

Nov yog Vaj Qhia Fas Ntshis Kus cov lus hais !