Tswv Ntuj puas rau txim rau peb ? (Does God Punish Us?)
Ntawv Moo Zoo ntawm peb hnub no, yog lo lus nug uas Yes Xus kheev kheev nug nws cov Thwj Tim tias : “Pes tsawg leej thiaj yuav tau txais kev cawm ?”
Kuv paub tias nov yog lo lus uas peb txhua tus nyiam, tab sis kuv xav taw mus rau zaj nyeem ob. Yog nyob hauv tsab ntawv Hes Nplaws uas peb tau nyeem ntau zaus, thiab nws yog lo lus tseem ceeb uas muaj kev sib cav heev kawg. Ntawd yog lo lus hais txog kev rau txim ntawm Tswv Ntuj, Tswv Ntuj puas rau txim rau peb ?
Thaum kuv loj hlob tiav hluas, mas kuv tsuas xav txog Tswv Ntuj nkaus xwb. Vim Tswv Ntuj muaj kev nyiam, kev khuv leej thiab kev hlub tshua uas peb tsis tau hais txog dua li. Tsis ! Tswv Ntuj tsis rau txim los tsis muab txim. Qhov ntawd yog lub tswv yim kev xav qub qub thiab txaus ntshai. Txhob hais txog zaj no ntxiv lawm ! Tswv Ntuj yog kev nyiam kev hlub. Lub ntsiab ntawm kev nyiam kev hlub, yog kev xav txog qhov zoo rau lwm tus. Yog peb chim thiab npau taws, mas txoj kev hlub ntawd yuav phem heev. Raws li Dostoevsky hais tseg tias : “Kev hlub yog kev phem, thiab qee zaus nws yog qhov txaus ntshai heev.” Li ntawd, kev rau txim ntawm Tswv Ntuj, puas yog tsis muaj nyob hauv Ntawv Ntshiab ? Tsis yog ! Qhov tseeb tiag peb zam tsis dhau lub ntsiab hais txog kev rau txim ntawm Tswv Ntuj nyob hauv Ntawv Ntshiab.
Kuv yuav hais ob peb yam ua piv txwv rau nej mloog. Sim xav txog ntau yam kev txom nyem uas peb tau ntsib hauv yam Ntuj tsim, uas peb nyeem nyob hauv ntawv Hauv Paus tias ; Tswv Ntuj rau txim vim peb cov txhaum. Sim xav txog tus pej thuam Npas Npes uas ua rau tib neeg sib tawg ua sab ua sua. Qhov neeg hais ntau xeem lus, yog kev pauj kev txhaum. Sim xav txog Nos Hes lub nkoj seb, dej nyab ntiaj teb uas Ntawv Ntshiab hais tias yog vim peb cov txhaum. Sim xav txog kev ua qhev nyob Hais Nkws Tos teb seb, raug ntaus nqi tias yog kev rau txim ib yam li kev mus hauv teb chaws suab puam ntau pua xyoo. Thaum cov His Xas Lais swb rog, lawv kheev kheev raug ntsia tias yog raug rau txim los ntawm lawv tej kev phem. Sim xav txog Xas Ws txoj kev swb thiab tsis mloog Tswv Ntuj lus. Sim xav txog Es Lias txoj kev tuag seb, yog los ntawm nws thiab nws tus tub cov kev txhaum. Sim xav txog kev rau txim ntawm Das Vis seb, tom qab cov xwm txheej nyob Npes Ntxes Npas. Sim xav txog kev raug txim thiab raug ntiab nyob Npas Npis Los seb, cov Yaj Saub hais tias yog kev pauj cov His Xas Lais kev txhaum. Thiab kuv thov muab ob peb qho piv txwv tas hauv cov Ntawv Cog Lus Qub, Tswv Ntuj puas rau txim rau cov His Xas Lais ?
Yog ! Saib zoo li kuv yuav pom tseeb kawg. Peb tuaj yeem pom nyob hauv txhua yam, tsis hais tej kev phem uas cov His Xas Lais tab tom raug, puas yog kev rau txim ? Nws tsis yog tas nrho, tab sis muaj qhov hais txog tas mus li.
Tej zaum koj yuav hais tias : “Ntawd yog nyob hauv Ntawv Cog Lus Qub xwb.”
Thov rov qab xav dua, kuv yog hais txog rov saib qhov Paj Lug hais rau cov ntseeg nyob Kos Lis Nthos tias : “Nej coob leej mob thiab tab tom yuav tuag, vim nej hla lub Cim Yug thiab lub thaj txi Ntuj tej kev cai.” Sim saib As Nas Nias thiab Xas Fis Las ob tug neeg hauv cov Hauv Paus Xa Lus tej hauj lwm uas raug tua tuag seb, vim yog qhov nkawd siv nyiaj rau tej yam tsis muaj qab hau. Sim xav txog ntawv Qhib Yav Tom Ntej, uas yog phau ntawv kawg nyob hauv Ntawv Ntshiab seb. Txoj kev rhuav tshem uas txaus ntshai no tshwm sim hauv ntiaj teb kom tau pauj kev txhaum. Kuv nkag siab txog cov lus cov nyom hauv cov Ntawv Ntshiab no thiab kev nyeem uas sib txawv. Tab sis kuv xav tias nws nyuab heev uas yuav hais txog kev rau txim ntawm Tswv Ntuj, tsis yog kev txhawb siab nyob hauv Ntawv Ntshiab. Kuv xav tias tsis yog li ntawd. Qhov tseeb tiag nws tsis yog kev txhawb siab me me, tab sis yog kev txhawb siab uas tseem ceeb. Kev sib txawv ntawm cov txuj kev ntseeg hais txog kev txhaum, hais txog txiaj ntsim thiab Ntawv Ntshiab, yog ntawv nco txiaj ntsim. Tab sis kuj muaj cov txuj kev ntseeg hais txog kev txhaum ib yam. Hais dua ib yam tias : tus yam ntxwv uas tsis zoo ntawd, tau txais kev pauj hauv ib yam kev rau txim twg.
Yog ! Hauv Ntawv Ntshiab kuj zoo li ntawd. Peb nkag siab zaj no tau li cas, uas tsis xav tig mus ntsia Tswv Ntuj hauv qhov tsis zoo ntawm tus neeg ywj nws siab. Sim xav seb ! Kuv tab tom ua lub neej nyob hauv kev ua yuam kev, kuv ua txhaum thiab tam sim no kuv yuav ntsib kev rau txim hnyav nyob hauv kuv. Los puas yog Tswv Ntuj zoo li tus moj zeej tso dag nrog peb thiab ua si nrog peb ? Peb yuav nkag siab cov lus no tau li cas, uas tsis yog poob nyob hauv Tswv Ntuj txoj kev nkag siab ?
Kuv thov hais me ntsis nyob hauv tsab ntawv Hes Nplaws hnub no rau nej mloog puas tau ? Cov lus no yog tus yawm sij hauv kev mem lub ntsiab thiab yog cov lus uas muaj txiaj ntsim qab hau heev. Thov nej mloog ! “Kuv cov me nyuam, nej sawv daws yuav tsis thuam Tswv Ntuj txoj kev ntaus kev qhia, thiab txhob qaug zog thaum Tswv Ntuj qhia nej. Vim Tswv Ntuj hlub leej twg, Tswv Ntuj yuav ntaus yuav qhia thiab nplawm txhua tus me nyuam uas yog nws tug.” Nov yog cov lus tseeb tiag, vim cov lus no hais txog cov lus paj lug ntawm Tswv Ntuj nyob hauv Ntawv Ntshiab. Thiab nws xaus rau Yes Xus lo lus thov Ntuj loj. Ntawd yog Tswv Ntuj cov lus thov. Tswv Ntuj tsis yog raug mem tias yog tus ywj nws siab, tab sis raug mem tias yog Leej Txiv zoo li niam thiab txiv. Li ntawd, ntawm niam thiab txiv “kuv tus tub yuav tsis thuam kev ntaus kev qhia ntawm Tswv Ntuj.” Lo lus no raug siab kawg. “Disciplina” yog los ntawm lo lus Latin uas hais tias “Discere” los “Disciple”. Yog los ntawm tib lo lus uas hais txog kawm kom paub txoj cai, tsis yog kev quab yuam ywj siab. Kev ntaus uas yog, yog kev kawm kom paub. Ntau zaus kev kawm kom paub ntawm peb, yog los ntawm peb kev txom nyem siab ntsws. Thov muab lawv los sib sau ua ke. Tswv Ntuj ntaus thiab qhia tus uas Tswv Ntuj nyiam. Rov hais dua tias : kev nyiam kev hlub yog kev xav kom lwm tus tau txais qhov zoo. Tswv Ntuj xav qhuab qhia, Tswv Ntuj nyiam tus neeg uas poob nyob hauv kev txhaum, vim saib zoo li yog nws raug rau txim.
Cov niam cov txiv sawv daws ! Nej puas nkag siab txog qhov kuv tab tom hais txog, los yog leej twg kuj xij puas tseem nco tau thaum nws tseem yau. Sim xav txog ib tug me nyuam me me tsis paub tab, thiab pib txij thaum nws tseem me me uas txhoj pob heev. Txhoj pob txhais tias tsis paub txog dab tsi li. Nws tej kev ua si zoo zoo raug txwv los ntawm lwm tus neeg. Niam thiab txiv kheev kheev hais tias : “Txog sij hawm so lawm.” Kuv tau pom niam thiab txiv ua li no rau kuv. Kuv xav tias cov me nyuam yuav koom tes tau li cas. Sij hawm tag lawm, ces lawv muab tus me nyuam mus tso rau tim kaum tsev, thiab tus me nyuam yuav tsum nyob ntawd 5 fiab. Lawv ua dab tsi nyob ntawd ? Lawv tab tom cheem thiab tiv me nyuam txoj kev muab siab rau. Lawv tab tom yuam kom me nyuam tso tseg tus yam ntxwv phem uas rhuav tshem tus kheej thiab lwm tus. Lawv tab tom qhuab qhia me nyuam nyob ntawm no. Cov niam cov txiv uas lawv tsis tau ua li ntawd yuav hais tias : “Oh, txhua yam uas kuv tus me nyuam ua mas zoo heev. Kuv yuav tsis muaj hnub tau so.”
Ces lawv zoo siab tos txais qhov yuam kev ntawm tus me nyuam ntawd.
Sim mus saib nyob hauv Ntawv Ntshiab seb ! Yos Nas tau txais lus txib ntawm Tswv Ntuj kom nws ua dab tsi ? Tswv Ntuj kom Yos Nas “mus rau sab hnub tuaj, thiab mus saum nruab nqhuab mus”, tab sis Yos Nas mus rau sab hnub poob, thiab nws mus hauv hiav txwv mus. Nws tab tom yws thiab npau taws heev. Tswv Ntuj ua dab tsi ne ? Tswv Ntuj ua kom ib tug ntses loj loj tawm tuaj nqos Yos Nas. Yos Nas yuav nyob hauv tus ntses lub plab 3 hnub 3 hmos. Ntawd yog qhov xyaum raws Tswv Ntuj lub hom phiaj, yog zoo li cheem Yos Nas kom txhob ntxeev siab. Thiab txwv kev twj lij kom tau coj Yos Nas rov mus rau thaj chaw uas Tswv Ntuj xav muab rau nws nyob.
Kwv tij sawv daws ! Qee zaus peb puas nkag siab txog tej kev txom nyem uas peb tab tom raug, tias yog kev txwv peb txoj kev twj lij kom tau coj peb rov los rau qhov chaw tsim nyog peb nyob ? Tam sim no sim muab pauv ntawm tus me nyuam me me tsis paub tab los rau cov hlob zog seb. Kuv nco tau tias thaum kuv kawm nyob qib 6, uas muaj 11 xyoos. Thaum ntawd kuv yog ib tug me nyuam mloog lus thiab muab kev koom tes zoo kawg. Kuv mloog cov thawj coj lawv tej lus. Tab sis muaj ib zaug hauv lub caij ntuj no, peb muaj kev sib tw txawb daus npu. Nws yog kev sib tw txawb daus npu ntawm cov me nyuam kawm ntawv qib 6 thiab qib 7. Raws li kuv nco tau thiab nws yog ib yam hauj lwm uas sawv daws yuav tsum muaj feem cuam. Muaj te thiab daus npu los loj heev, ces peb tawm mus nrhiav daus npu. Tab sis muaj neeg nyiag muab dej khov coj mus zais rau hauv cov daus npu, ces muaj ib tug me nyuam raug thooj daus npu ntawd txawb raug los ntshav heev. Qhov kawg tus thawj xib hwb thiaj tawm tuaj, nws yog ib tug poj niam. Tus thawj xib hwb thiaj hais tias : “Ua li, kuv xav kom cov me nyuam tub hauv qib 6 thiab qib 7, sawv daws nkag los hauv kuv kem tsev tam sim no.” Kuv nco tau tias peb sawv ua kab sab thiab ntshai tsam yuav muaj dab tsi tshwm sim ? Tus thawj xib hwb nqa ib rab pas los, thiab nws nplawm peb ib leeg ib nplawg. Thaum raug nplawm tsis tshua mob, tab sis peb txaj muag kawg. Kuv nco ntsoov los txog niaj hnub no, tab txawm dhau los tau ntau xyoo, tsis kav xav txog kuj tseem txaj muag. Thiab hais ncaj tias kuv tsis tau ua si, sib txawb daus npu nyob hauv tsev kawm ntawv los dua. Nws rau txim rau kuv ua kom kuv nco ntsoov tias :
“Kuv yuav tsis ua li ntawd ntxiv lawm.”
Yog tias nws tsis tau rau txim li ntawd dua, mas nws yuav tsis nplawm cov me nyuam. Peb los xav txog cov me nyuam tub 16 thiab 17 xyoo seb ! Lawv nyiam haus cawv thiab nyiam tsav tsheb, nws yog qhov txaus ntshai thiab ua teeb meem rau lwm tus neeg. Niam txiv puas yuav muab tus yawm sij coj mus zais cia ? Yog ua li ntawd, mas koj yuav tsis tau tsav tsheb ib lub hlis. Koj raug txwv tsis pub tawm mus deb thiab koj tsis muaj tsheb caij. Koj hmoov phem, vim koj tsis tau kev ua ywj koj siab. Qhov ntawd yog kev rau txim uas raug siab, yog txwv kev twj lij thiab yog kev rau txim uas mob siab, ua kom tus me nyuam ntawd rov qab los nyob hauv lub ntuj Online.
Peb tshais ib kauj ruam ntxiv mus rau qhov siab dua no. Tam sim no koj yog niam yog txiv thiab tej me nyuam loj lawm. Me nyuam muaj 20 tawm xyoo los yog ze 30 xyoo tej. Tab sis me nyuam poob nyob hauv kev quav yeeb quav tshuaj uas yog tej yam raug txwv. Tej yeeb tej tshuaj ntawd yuav rhuav tshem lawv lub neej thiab lwm tus lub neej, ces rais ua teeb meem rau lub cev ntaj ntsug thiab fab ntsuj plig loj kawg. Thaum ntawd niam thiab txiv yuav siv kev nyiam kev hlub nruj nruj los kav, ces tus me nyuam rov los tib tug qaug duj de, muaj mob, tag kev cia siab thiab hais tias : “Niam thiab txiv, neb pab coj kuv mus hauv tsev puas tau ?” Koj yuav hais rau tus me nyuam tias :
“Tsis tau, koj yuav tsum xub daws cov teeb meem no tso.” Lawv tab tom ua dab tsi ? Raws li lub ntsiab hauv cov lus no uas tau hais tseg, nws yog ua tawm txog kev nyiam kev hlub. Kev nyiam kev hlub, yog xav qhov zoo rau lwm.
Qee zaus kev rau txim hnyav yog kev sib cais, kev tsis lees txais thiab kev rau txim hnyav no yog yam uas cov neeg quav yeeb quav tshuaj xav tau, kom lawv lub neej rov los zoo li qub. Peb thiaj ntsia pom txog tej yam no meej tseeb. Vim li cas peb thiaj ntsia tsis pom xws li qhov Tswv Ntuj pom. Tus tsis yog teeb meem los yog lub zog nyob deb thiab tsis quav ntsej, tab sis nws yog zoo li niam thiab txiv. Peb Txiv tus nyob saum Ntuj. Peb txhua tus puav leej yog nws cov me nyuam. Peb yuav ntsia pom meej tseeb los yog qee zaus Tswv Ntuj kuj muaj feem cuam cia kom txhua yam tshwm sim, los yog rau txim tiag tiag kom tau coj peb rov los rau lub ntuj Online.
Nej yuav khaws lo lus no tseg, “Thov ua tiag nyiaj txhua yam kev sim ntawm nej, nyob hauv Tswv Ntuj kev ntaus thiab kev qhia. Tus ua rau nej xws li nej yog nws me nyuam. Vim tus me nyuam twg, ces Leej Txiv thiaj ntaus thiab qhia nej.”
Yog ib lo lus nug uas zoo kawg. Yog tias koj yog tus me nyuam uas Leej Txiv tsis ntaus tsis qhia, koj kuj yuav rais ua tus me nyuam tsis muaj qab hau. Ntseeg kuv seb puas yog ? Tswv Ntuj teeb tau meej tseeb tias, puas muaj tus niam tus txiv zoo twg uas nws tsis ntaus tsis qhia me nyuam ?
“Thaum raug quab yuam, txoj cai zoo li yog teeb meem ntawm kev tu siab. Tab sis ntxiv mus nws yuav coj kev thaj yeeb thiab kev ncaj ncees los rau tus raug xyaum thiab tus kawm.” Yog lawm, thaum koj tab tom uv dab tsi kuj xij. Tsis hais kev tsaus ntuj, kev txom nyem los yog lwm yam kev txwv txiav, los saib zoo li nws yog ib tug neeg ruam nyuab siab. Tswv Ntuj cia kom yam no tshwm sim tau li cas ? Tab sis thaum sij hawm dhau mus thiab peb tig rov mus saib, peb yuav pom tias nws yog dab tsi ? Nws yog txoj cai, yog kev kawm kom paub txoj cai, nws yog kev kawm uas kuv xav tau. Tej zaum yuav tsis tau txais qhov ntawd los ntawm lwm txoj kev. Tsis yog tias peb yuav nyeem cov lus kev txom nyem hauv lub ntsiab lus no xwb, kuv xav tias nws yog qhov yuam kev. Puas nco tau thaum lawv nug Yes Xus tias :
“Leej twg yog tus yuav lees qhov dig muag ntawm tus txiv neej no ? Yog nws cov txhaum, los yog nws niam nws txiv ?” Yes Xus teb tias : “Ob yam puav leej tsis yog.” Qhov no nws siv tsis tau rau txhua yam kev txom nyem, tab sis qee zaus hauv lub caij nyoog, peb txoj kev txom nyem yog ib tug piv txwv hauv kev xyaum. Nws yog qhov uas peb yog tus tub leej txiv xav tau.
Kwv tij Hmoob sawv daws ! Hnub no peb tham txog zaj “Tswv Ntuj puas rau txim rau peb ?” los xaus li no xwb. Nco ntsoov tias thaum peb yuam kev, Tswv Ntuj tsis muab txim rau peb, vim Tswv Ntuj yog kev nyiam kev hlub thiab kev khuv leej. Tswv Ntuj xav kom peb tig los cuag nws, thiab ua nws cov me nyuam hauv kev khuv leej luag tej. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug.
Lwm zaus peb mam sib ntsib dua, nyob zoo nej sawv daws !
