Saib tej yam sib txawv (See things differently)
Cov phooj ywg thiab cov neeg ntseeg, thov kom nej saib tej yam sib txawv no.
Cov neeg ntseeg yuav ntsia pom tej yam txawv txav, thiab kuv tsis tau txhais tias lawv tab tom nyob hauv lub ntiaj teb cuav ntxias dag. Lawv ntsia pom lub ntiaj teb nyob ntawm lawv hauv ntej, lawv ntsia pom yam uas cov neeg ntseeg nyiam thiab cov tsis ntseeg kuj ntsia pom. Tseeb tiag uas cov muaj kev ntseeg zoo, lawv nyeem His Xas Lais liv xwm thiab saib tej xov xwm, lawv rua muag, lawv pom tias muaj dab tsi tshwm sim nyob hauv lub ntiaj teb thiab cov neeg ntseeg yuav pom ntau dua ntawd. Vim cov neeg ntseeg ntsia pom txog Tswv Ntuj lub hom phiaj thiab yam kawg uas Tswv Ntuj ua. Qhov ntawd ua kom cov neeg ntseeg lub zeem muag nthuav dav.
Cov neeg muaj ntsuj plig kheev kheev saib tias yog vwm, tab sis kuv xav pib ntawm lo lus no nyob hauv phau ntawv Es Xes Kias. Kuv xav tias kuv twb tau hais rau nej txog zaj no los lawm. Nws yog ib qho uas kuv nyiam thiab cov His Xas Lais txheej thaud kuj pom tias koj tsis tsim nyog yuav ntaus nqi rau Es Xes Kias mus txog koj muaj hnub nyoog 50 xyoo. Vim nws muaj ntau yam ntxhov sib xyaws thiab thaum kuv muaj 50 xyoo lawm, kuv kuj paub tias kuv tuaj yeem ntaus nqi rau nws tau. Thov nej mloog lo lus no tias : “Tswv Ntuj hais li no : kuv yuav rho tus kaus saum lub ntsis thuv Xis Das mus cog rau saum lub roob siab ntawm lub ncov roob His Xas Lais. Nws yuav nthaw kaus thiab ncau ceg txi txiv. Nws yuav yog tsob thuv Xis Das uas zoo nkauj thiab txhua hom noog yuav los nkaum hauv tsob thuv ntawd.”
Ua kom nthuav dav ces peb yuav rov mus rau qhov chaw thiab Es Xes Kias lub caij nyoog. Es Xes Kias yog ib tug yaj saub nyob hauv lub tsev teev Ntuj tiam 6 ua ntej xyoo 597. Yog xyoo cov Npas Npis Los tuaj txeeb Yes Lus Xas Les. Yog thawj zaug uas cov Npas Npis Los tuaj ntes cov His Xas Lais, lawv ntaus lub nroog thiab lwg qee yam mus lawm. Lawv kuj ntes Es Xes Kias mus thiab. 10 xyoo tom qab uas yog xyoo 587, lawv xuas hluav taws hlawv lub nroog Yes Lus Xas Les, lawv rhuav lub tuam tsev teev Ntuj thiab ntiab cov thawj coj tawm mus. Yog ib zaug kev piam sij loj kawg hauv kev sau cim nyob hauv Ntawv Ntshiab.
Qee ntu cov xwm tseem ceeb ntawm cov His Xas Lais raws li Ntawv Ntshiab, yog lawv txoj kev rhuav tshem cov nroog loj, Das Vis lub nroog, lub roob Xis Yoos thiab lub tuam tsev teev Ntuj uas cov His Xas Lais tus Tswv Ntuj nyob. Yog qhov kev piam sij loj uas suav tsis tau. Chiv thawj Es Xes Kias pom tias nws raug ntiab tawm mus txawv teb chaws, txawv chaw thiab tsis paub hom lus ntawd. Nws ua neeg nyob txheej qis hauv ib tsoom neeg. Nws poob tag nrho nws cov meej mom. Yog tig ntsia lub ntiaj teb lub zim txwv ntawd, yog ntsia txhua yam lub caij ntawd, mas koj yuav hais tias piam sij loj kawg nkaus. Tag kev cia siab thiab peb yog haiv neeg swb. Tam sim no peb tsis tshuav dab tsi kiag. Yog lawm uas nws hais li ntawd. “Tswv Ntuj yuav ntshua tus kaus ntawm tsob ntoo, Tswv Ntuj yuav muab cog rau saum His Xas Lais qhov chaw siab. Ib tsob ntoo yuav loj hlob tuaj thiab txhua hom noog yuav los ua zes nyob ntawd.”
Thaum cov His Xas Lais tsis tshuav dab tsi kiag, lawv raug ntiab tawm, lawv tag kev cia siab, lawv xav tias Das Vis loj, vim Das Vis tau muaj hwj chim ib zaug los lawm. Tsob ntoo me me ntawd yuav raug tshem mus cog dua tshiab kom loj tuaj, ces txhua hom noog yuav los ua zes rau. Qhov ntawd yog lub cim ntawm cov neeg txheej thaud, vim lawv tau hnov los ntawm Es Xes Kias. Lawv yuav hais tias puas yog koj puas hlwb thiab koj vwm ? Koj puas yog tab tom hais txog qhov ntawd yuav tshwm sim ? Koj puas paub txog lub keeb thiab yam uas nyob ntawm koj hauv ntej ? Qhov no yog kev tag kev cia siab thiab koj tab tom npau suav txog ib lub Ceeb Tsheej.
Cov neeg ntseeg ntsia pom txhua yam txawv txav, tsis yog tias yam nyob ntawm lawv hauv ntej xwb. Tsis yog yam uas ntsia pom tseeb nyob ntawm cov soj ntsuam xwb, lawv puav leej ntsia pom raws Tswv Ntuj lub tswv yim thiab lub hom phiaj. Das Vis lub theej kiab yuav rov sawv hauv lub ntiaj teb no tau li cas ? Cov noog ya saum ntuj thiab ib zeej tsoom neeg nyob thoob ntiaj teb yuav los sib sau ua nws cov ceg tau li cas ?
Es Xes Kias ntsia pom, ces peb yuav tig rov mus rau 600 xyoo tas los. Muaj ib tug neeg His Xas Lais tawm mus ncig tsham teb chaws, nws yog Xas Ws. Tam sim no yog Paj Lug thiab nws hu tus kheej ua tus tub txib tuaj ntawm Lean tuaj. Txhais tias nws raug xa mus ua hauj lwm thiab nws tab tom tshaj txog lub Cim Yug. Lub Moo Zoo uas muaj kev zoo siab rau txhua leej uas yuav mloog nws. Nyob hauv tsab ntawv no, yog zaj nyeem zaum 2 ntawm peb. Yog tsab ntawv 2 uas Paj Lug sau mus rau cov neeg ntseeg nyob Kos Lis Nthos. Nov yog yam nws hais : vim tias peb cov ntseeg ua lub neej raws kev ntseeg, tsis yog raws qhov peb pom. Sawv daws sawv nyob ntawm Es Xes Kias cov kab ke uas nws yog tus tshaj Tswv Ntuj lo lus. Es Xes Kias pom yam uas tshwm sim nyob ib ncig nws. Tab sis Paj Lug pom tseeb dua thiab nws pom qee yam nyob hauv kev ntseeg. Nws yog dab tsi ? Tseeb tiag nws yog txoj kev ntseeg. Nyob hauv Yes Xus nws pom dab tsi ? Pom Das Vis leej tub sau tas txhua haiv neeg los ua tub txib, sib sau nyob hauv cov neeg ncaj thiab cov neeg txhaum. 12 tug Thwj Tim los sib sau ua ke, yog lub cim hais txog 12 xeem neeg los sib sau ua ke. Lawv pom Yes Xus ntaus His Xas Lais tus yeeb ncuab, tsis yog siv ntiaj teb cov riam phom, siv ntaj, siv hmuv thiab lwm yam. Tab sis Yes Xus yeej tus yeeb ncuab nyob hauv kev kwv Ntoo Cuam thiab ris tas ntiaj teb neeg cov txhaum. Kev lim hiam kev ntxub ntxaug thiab kev ua phem, nws hais lo lus thov zam txhaum ntawm Leej Txiv. Thov koj zam txhaum rau lawv, vim lawv tsis paub tias lawv tab tom ua dab tsi. Nqos lub ntiaj teb kev tsim txom, kev txhaum thiab kev ntxub ntxaug nyob hauv kev khuv leej.
Dhau ntawd nyob ntawm txoj kev mus hauv nroog Das Mas, thaum nws tab tom hiam cov neeg ntseeg txog Yes Xus, nws kuj pom Yes Xus tus sawv rov los muaj txoj sia.
Yes Xus hais tias : “Xauv ! Vim li cas koj hiam kuv ?”
Xauv teb tias : “Koj yog leej twg ?” Yes Xus hais tias : “Kuv yog tus koj tab tom hiam.” Xauv pom Yes Xus tus sawv rov los thiab nws nco tias Yes Xus yog tus daws tas ntiaj teb neeg cov txhaum. Yes Xus yog tus tseem Tswv Ntuj, yog cov His Xas Lais tus Mes Xias. Yog lawm, yog Das Vis leej tub thiab qhov kawg nws tau ntsib Yes Xus.
Yog lo lus uas Paj Lug siv tas mus li, yog Yes Xus tus uas Tswv Ntuj tsa nws ua lub Ceeb Tsheej tshiab. Paj Lug ua dab tsi ? Paj Lug tau sau tas cov noog ya saum ntuj los nyob hauv tsob ntoo loj cov ceg raws li Es Xes Kias cov lus. Tus hluas Xas Ws mus ntawm lub nroog Thas Xas mus rau Yes Lus Xas Les, kom tau kawm txog Nkas Mas Lis Es uas nws yog ib tug neeg nto npe lub caij ntawd.
Vim Nkas Mas Lis Es kev saib xyuas zoo, ces nws thiaj kawm paub txog yam nws xav hais txog His Xais, Yes Les Mias, Das Nias thiab Es Xes Kias. Nws yeej paub txog qhov txawv txav no, vim Es Xes Kias ua npau suav tias ib hnub twg cov His Xas Lais yuav raug ntiab tawm mus thiab raug caij tsuj, ces lawv yuav rais los ua ib lub teb chaws loj. Xauv tau nyeem zaj ntawd lawm, thiab nyob hauv zaj Yes Xus sawv rov los, nws pom dab tsi ? Tswv Ntuj tab tom yuav tshwm sim los tiag. Tswv Ntuj nyob hauv txoj kev ntseeg, tsis yog qhov ntsia pom xwb. Nov yog Yes Xus cov lus hais ua paj lug.
Peb yuav muab Tswv Ntuj lub Ceeb Tsheej los piv rau dab tsi ? Peb yuav muab piv rau ib co noob uas tseb rau hauv av, thiab nws yog ib co noob uas me dua tej nyob ntiaj teb no. Tab sis thaum peb muab tseb lawm, nws loj hlob thiab nws ciaj ua ib tsob ntoo loj tshaj plaws, nws nthaw kaus ncau ceg kom cov noog los nkaum nyob haud. Nws yog pib los ntawm qhov me me, thiab koj ntsia pom tias Yes Xus tab tom hais txog Tswv Ntuj lub Ceeb Tsheej raws li Es Xes Kias cov lus. Kuv paub tias cov His Xas Lais raug ntiab tawm, paub tias lawv tag kev cia siab. Tab sis Tswv Ntuj hais tias : Das Vis leej tub yog Yes Xus, nws yuav muab cog rau qhov nyob siab ntawm cov His Xas Lais. Yog thaum Neeg Leej Tub raug tsa nyob saum lub roob Xis Yoos thiab raug ntsia nyob saum Ntoo Cuam. Yes Xus ua kom ib zeej tsoom tig los cuag nws thiab muab cog rau saum cov His Xas Lais qhov chaw siab. Nws yuav rais ua tsob ntoo loj thiab tas txhua hom noog yuav los nkaum nyob hauv nws cov ceg. Koj yuav pom tej tus neeg tseem ceeb hauv kev tseev tsim, kev txhim kho kev lag luam thiab tej xwm txheej hauv zej zog. Koj yuav pom tas txhua yam ntawd tsis yog koj hla xwb, vim peb ua lub neej raws kev ntseeg. Li ntawd, peb pom lub ceeb tsheej ntawd tshwm nyob ib ncig peb hauv lub ntiaj teb no. Peb pom qhov loj hlob ntawm tsob ntoo ntawd. Peb pom tas txhua hom noog ya los nkaum nyob haud. Peb pom lub Koom Txoos thiab pom peb cov hauj lwm yog zoo li Paj Lug cov. Yog kev tshaj kom muaj tus Tswv Ntuj tshiab thiab caw tas sawv daws los nyob hauv Tswv Ntuj txoj kev kav. Kev pib lub neej nws yog zoo li no. Thaum peb mus kev tsis yog peb qhov muag pom xwb, nws yog vim kev ntseeg.
Thov Tswv Ntuj foom hmoov zoo rau koj !
