Zaj nyeem hnub tim 22 lub 3 hlis 2026
Hnub Chiv, Lis Piam 5 caij Plaub Caug
Cov lus nyob hauv Zam Ntawv Moo Zoo (Z 11: 1-45)
Kwv tij zoo nyiam sawv daws, hnub no yog hnub chiv, lub lis piam 5, hauv lub caij Plaub Caug. Tshuav ib lis piam xwb, peb yuav nkaj mus hauv lub lis piam ntshiab, peb yuav nrog Huab Tais Yes Xus hauv txoj kev txom nyem mus kom txog hnub uas nws yuav sawv rov los.
Hnub no, hauv lub Moo Zoo, peb hnov tias Huab Tais Yes Xus tsa kom Las NTxas Los rov muaj txoj sia nyob ib zaug dua. Hauv zaj no, Huab Tais Yes Xus hais lo lus tseem ceeb tias “Kuv yog Txoj kev sawv rov los thiab yog txoj sia. Tus ntseeg txog kuv tab yog nws tuag lawm, nws yuav muaj txoj sia nyob. Tiam sis, txoj sia nyob mus li uas peb yuav tau txais tsis yog zoo yam li Las Ntxas Los, tab sis yog txoj sia nyob mus li pem Ntuj lub Ceeb Tsheej.
Tsis tas li ntawd, Huab Tais Yes Xus mus xyuas Mab Liab thiab Mas Tas hauv tsev. Mab Liab tab tom tu siab kawg vim nws tus nus tuag lawm. Nws quaj thiab cov nyob ntawd kuj nrog Mab Liab quaj thiab. Huab Tais Yes Xus kuj tu siab kawg nyob hauv nruab siab vim nws kuj hlub Las Ntxas Los kawg thiab.
Ntam peb sawv daws, tej zaum mas peb kuj zoo li Mab Liab thiab. Peb tu siab, hauv kev tu siab, peb tsis pom kev vam, tsis pom qhov pom kev, tsis paub yuav taug hauv txoj kev twg. Mab Liab kuj xav zoo li peb thiab. Vim muaj kev tu siab, tej zaus ua rau peb tsis hnov qab Huab Tais Yes Xus thiab nws Lo Lus ib pliag. Zoo li Mab Liab tsis hnov qab lawm tias Huab Tais Yes Xus nyob ntawm nws tsev.
Tab sis, tom qab ntawd, Mab Liab kuj rov qab los tsob hwb Yes Xus. Muaj ntau yam tshwm sim hauv nws lub siab ua rau nws hloov nws cuj pwm, hloov nws kev xav, ua rau nws to tau tib neeg lub neej lub ntsiab lus, to taub yam uas tshwm sim ntawm nws lub neej.
Kwv tij sawv daws, lub sij hawm no peb nrog Huab Tais Yes Xus taug kev hauv txoj kev mus txog kev txom yem thiab kev tuag. Kuj thov kom peb saib ntawm kev txom nyem zoo li ntoo cuam peb yuav tsum kwv thiab peb kuj yuav tuag ntawm yus tus kheej, tuag ntawm yus kev txhaum kev tsis zoo, peb thiaj yuav nrog Huab Tais Yes Xus rov qab los muaj txoj sia tshia mus tas ib txhiab ib txhis.
Nyob zoo.
