Zaj nyeem hnub tim 19 lub 4 hlis 2026
Hnub Chiv, Lis Piam 3 caij Hla
Cov lus nyob hauv Lus Kas Ntawv Moo Zoo (LK 24: 13-35)
Kwv tij zoo nyiam sawv daws, hnub no yog hnub chiv lis piam 3 hauv lub caij Hla. Lub Moo Zoo hnub no caw peb kom ras txog zaj uas qhia txog Huab Tais Yes Xus nrog ob tug thwj tim mus Es Mas Ws tham. Peb pom tias ob tug thwj tim no tab tom taug kev mus rau Es Mas Ws. Thaum ntawd, nkawd tu siab kawg vim luag muab nws tua, Huab Tais Yes Xus tsis nyob lawm. Lawv tu siab vim lawv vam tias Huab Tais Yes Xus yog tus yuav txhiv His Xas Lais. Tsis tas li ntawd, thaum nkawd paub tias muaj cov thwj tim pom Huab Tais Yes Xus tus sawv rov los, nkawd tseem tsis tau ntseeg lawv. Luag twm tus thwj tim ua tim khawv txog kev sawv rov los, nkawd tseem tsis tau ntseeg tias muaj tiag. Qhov no yog ib lo lus qhia rau peb thiab. Ntawv Ntshiab los lub Moo Zoo yog ib qhov ua tim khawv txog kev sawv rov los kom peb paub tias muaj Tswv Ntuj tiag thiab peb muaj kev vam ntawm Tswv Ntuj tau tiag. Li ntawd, siv lub Moo coj peb lub neej, coj lub Moo Zoo thiab Tswv Ntuj cov lus qhia coj peb lub neej kom peb paub tias peb tsim nyog ua neeg zoo li cas thiaj xis Tswv Ntuj siab.
Qhov tim ob, yog tias hauv thaj txi Ntuj peb tau txais koob hmoov zoo, peb tau txais lub txiaj ntsim ntawm Tswv Ntuj, peb tau txais lub zog ntawm Tswv Ntuj uas rau peb muaj kev ntseeg ruaj khov. Ob tug thwj tim nco tsis tau Huab Tais Yes Xus. Nyob hauv thaj txi Ntuj xwb, nkawd nco tau. Thaum Yes Xus nrog nkawd zaum ntawm rooj mov, nws tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd xwb, nkawd qhov muag thiaj qhib plho, nkawd thiaj zeem tau Yes Xus. Li ntawd, hauv thaj txi Ntuj xwb, peb thiab nyob ze Huab Tais Yes Xus thiab tau txais zog, tau txais lub txiaj ntsim loj ntawm nws.
Thov kom peb txhob ua xyem xyav ntawm kev mloog Tswv Ntuj Lo Lus thiab kev koom thaj txi Ntuj. Vim cov no yog peb qhov chaw pub zog ntawm kev ntseeg, yog qhov chaw pub peb txoj sia.
Nyob zoo.
