Zaj Nyeem Hnub Chiv tim lub 5 Hlis 2025
Lub lis piam 5 caij hla
Zam 13:31-33, 34-35
“Nej yuav rov sib nyiam sib hlub ib yam li kuv tau nyiam nej.”
Nyob zoo…
Hauv hmo ntawd, hmo uas sawv daws sib sau nyob noj mov ua ke los yog “hmo kawg,” ua ntej Huab Tais Yes Xus yuav raug lawv ntes nws mus. Huab Tais Yes Xus muab lo lus qhia kawg rau cov thwj tim, “Nej yuav rov sib nyiam sib hlub ib yam li kuv tau nyiam nej.” Cov lus no ua rau kuv ras txog Txiv Plig Nyiaj Pov cov lus hais rau cov Hmoob Fab Kis mus xyuas nws hauv lub tsev so laus, nws ntuas lawv tias “Nej tsoom Hmoob yuav tsum sib hlub tiag tiag, mas yuav zoo xwb xwb.” Tos nws hais li ntawd, vim nws ntshai tsam yav tom ntej cov Hmoob tsis sib hlub. Kwv tij Hmoob, kuv xav tias hauv Ntawv Moo Zoo hnub no, Huab Tais Yes Xus kuj xav li ntawd thiab. Zoo xws li Txiv Plig Nyiaj Pov hlub peb hmoob, Huab Tais Yes Xus kuj hlub nws cov thwj tim. Nws txhawj siab tias yav tom ntej, nws cov thwj tim tsis sib nyiam sib hlub, tsis sib haum xeeb. Yog lawv tsis txawj sib hlub, lawv yuav tshaj Tswv Ntuj Lo Lus rau sawv daws to taub tau li cas? Vim tias Tswv Ntuj Lo Lus qhia loj yog kev sib nyiam sib hlub, yog cov thwj tim tsis sib nyiam sib hlub, leej twg yuav mloog lawv cov lus qhia, leej twg yuav mloog thiab ntseeg Tswv Ntuj Lo Lus Qhia, yog lawv tsis pom kev sib nyiam sib hlub hauv Yes Xus cov thwj tim lub neej? Qhov no yog qhov tseem ceeb tshaj plaws, cov kwv tij. Yog peb tsis txawj sib nyiam sib hlub, yog peb tsis txawj sib zam txim, yog peb tsis sib haum xeeb, mas leej twg yuav ntseeg tias peb yog Yes Xus cov thwj tim. Ces, peb txoj kev ntseeg txog Yes Xus muaj qab hau dab tsi?
Huab Tais Yes Xus hais ntxiv tias “Cov me nyuam me, kuv yuav nrog nej nyob me ntsis ntxiv xwb. Nej yuav nrhiav kuv.” Lub cuab tam uas Huab Tais Yes Xus tso rau peb pov tseg yog Lo Lus Qhia Loj kev sib nyiam sib hlub. Peb yuav nrhiav tau nws kuj thaum peb pom kev sib hlub tshwm sim tiag tiag hauv peb lub neej.
Li ntawd, peb yuav tsum sib hlub ib yam li Huab Tais Yes Xus tau hlub peb. Huab Tais Yes Xus hlub peb li cas? “Huab Tais Yes Xus nyiam peb yog qhov tias thaum peb tseem yog neeg txhaum, leej Pleev tuag kom tau pab peb.” Txhais tau tias txawm tias peb yog neeg txhaum, peb tseem ua txhaum, peb tseem hais tsis zoo rau luag, Tswv Ntuj kuj nyiam peb. Peb tseem npau taws thiab cem luag, Tswv Ntuj kuj nyiam peb. Peb tseem ua txhaum ua qhov phem, Tswv Ntuj kuj nyiam peb li qub. Li ntawd, kwv tij hmoob sawv daws, thov kom peb sib nyiam sib hlub ib yam li Huab Tais Yes Xus nyiam peb. Thov peb txawj sib zam txim, thov peb txawj ua siab ntev rau luag. Peb ua li no, mas peb tab tom ua raws li Huab Tais Yes Xus qhia peb. Peb thiaj yog Yes Xus tseem thwj tim.
Nyob zoo sawv daws.
