ZAJ NYEEM HNUB TIM 16 LUB 11 HLIS 2025
HNUB CHIV, LIS PIAM 33 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 5-19)
Cov kwv tij hmoob sawv daws, hnub no Huab Tais Yes Xus hais txog tej xwv txheej uas yuav tshwm sim yav tom ntej. Lub tuam tsev teev Ntuj yuav raug xwv txheej. Luag yuav rhuav kom tas. Nyob ntiaj teb no yuav muaj tsov rog thiab kev kub ntxhov. Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. Nyob rau ntau qhov chaw yuav muaj mob aws, thiab muaj kev tshaib. Peb sim saib mas hauv lub zim txwv no puas muaj tseeb raws li Huab Tais Yes Xus hais ntawd? Kuv xav tias lub zim txwv no yeej tsis txawv thiab. Muaj kev ua tsov ua rog, muaj kev kub ntxhov kev tshaib, muaj mob muaj nkeeg zoo li Huab Tais Yes Xus hais tiag. Tiam sis, Huab Tais Yes Xus hais tias peb yuav tsum txhob ntshai, peb txhob ua xyem xyav vim cov no. peb yuav tsum taug hauv Tswv Ntuj txoj kev kom ruaj nreb mog.
Muaj ib yam tseem ceeb uas Huab Tais Yes Xus hais kom peb ceev faj yog tias txhob cia kom lo lus qhia tsis tseeb ua kom peb yuam kev. Peb yuav tsum mloog Tswv Ntuj lo lus, mloog lub Koom Txoos cov lus qhia xwb thiaj yog. Txhob mloog luag lwm tus lo lus qhia shwj xeeb yog cov lus qhia raws li lub ntiaj teb no xav. Peb lub neej nyob niaj teb no thiab peb txoj kev ntseeg yuav tsum raug kev ntxias, yuav tsum raug xwv txheej zoo li sawv daws thiab. Tiam sis, thov kom peb tso siab rau Tswv Ntuj. Peb yuav tsum ua tim khawv kom luag paub tias peb yog Yes Xus cov thwj tim ceeb tiag. Yog peb ntseeg txog nws thiab tso siab rau nws, Huab Tais Yes Xus cog lus tias “Tsis muaj ib txoj plaub hau saum nej taub hau yuav ploj. Nej ua siab ruaj kom tom thawj, ces nej yuav cawm nej txoj sia.” Huab Tais Tswv Ntuj yuav saib xyuas peb, thov kom peb txhob ntshai mog.
Nyob zoo sawv daws.
