Vaj Qhia rov thov dua ib zaug ntxiv, thov kom tso tseg kev ua phem rau neeg cov Pas Les Tis Nas nyob West Bank.
Vas Tis Kas zeem tseeb tas mus li tias ; kev daws teeb meem hauv ob lub xeev hauv kev ruaj ntseg thiab raug ntiaj teb lees txais, yog tib txoj kev yuav mus tau thiab ncaj ncees hauv kev thaj yeeb thiab nyob ntev hauv thaj av ntshiab. Raws li Tswv Qhia Gacias cov lus hais tseg rau lub Leej Haum Kuj lub 7 hli xyoo 2025. Tib xyoo ntawd, Vas Tis Kas cov neeg soj ntsuam xwm txheej hauv lub Leej Haum Kuj lub caij ntawd, kuj tau hais txog Vas Tis Kas txoj kev xav tias : “Cov His Xas Lais thiab cov Pas Les Tis Nas yuav nyob ua ke yam thaj yeeb thiab nyab xeeb, nyob hauv txoj cai uas thoob ntiaj teb lees paub.” Muaj ib hnub twg thiab nws qhia kom pom tias ; kev vam meej tseeb tiag thiab nyob ntev yuav tshwm sim tau, yog los ntawm kev sib koom siab, kev ua siab ntev sib tham thiab kev koom tes dav, tsis yog los ntawm kev siv tub rog.
‘Lub Cim qhia txog kev thaj yeeb thiab kev ua kwv ua tij.’
Hauv Vaj Qhia cov lus nthuav ntawv Moo Zoo nruab lis piam, mas nws nco txog qhov pib kev sib tw ncaws pob Mes Dis Tes Las Nes, uas yog kev sib tw ntau yam kev ua si. Muaj cov tub sib tw tuaj ntawm txhua lub teb chaws tuaj, xws li Africa, As Xias thiab Aws Los Pas uas nyob npuas lub hiav txwv Mes Dis Tes Las Nes kuj nkag mus koom kev sib tw. Kev sib tw xyoo no yog ua nyob hauv lub nroog Tharanto uas nyob Is Tas Lias qab teb. Vas Tis Kas lub Koom Haum tub ncaws pob (Athleta Vaticana) uas yog Vas Tis Kas lub Koom Haum raug cai kuj koom nrog thiab. Muaj 4 tug tub ncaws pob tuaj koom kev sib tw. Vaj Qhia cia siab tias : “Kev sib tw zaum no yog ua lub Cim ntawm kev thaj yeeb thiab kev ua kwv ua tij rau cov neeg nyob hauv xeev ntuj thiab nyob thoob ntiaj teb.”
Hais lus rau cov neeg tawm rooj fiv Ntuj.
Qhov kawg no, Vaj Qhia Leo 14 hais lus rau cov neeg tawm rooj fiv Ntuj uas tuaj qhov txhia chaw nyob thoob ntiaj teb tuaj. Nws hais lus tshwj xeeb rau cov neeg tuaj sib koom ua ke coob coob raws kev fiv Ntuj ntawm cov poj niam mus txog lub tsev teev Ntuj Piekary Śląskie hauv xeev ntuj Upper Silesia nyob Pos Kas (Poland) teb.
