Kev phem ntawm cov tub ntxhais hluas nyob Khas Phus Chas teb, hais txog luam yeeb hluav taws xob.
75 Kev phem ntawm cov tub ntxhais hluas nyob Khas Phus Chas teb, hais txog luam yeeb hluav taws xob.
Tab txawm lub teb chaws yuav txwv tu nrho, tsis kav luam yeeb hluav taws xob kuj yog qhov zoo li tej qab zib uas cov tub ntxhais hluas tab tom nyiam heev. Tau ib tiam neeg ntau tom qab Khas Phus Chas teb txwv luam yeeb hluav taws xob, ntawm qhov laij thawj muaj neeg coob thiab fab kev nyab xeeb. Tsis kav lub teb chaws tseem nrhiav kev rhuav tshem cov kev phem no uas tab tom phem heev zuj zus. Vim cov tub ntxhais hluas nyob hauv lub teb chaws no tig los siv tus yam ntxwv zoo li no coob tuaj.
Tseem hwv tab tom txwv thiab ntsia nruj kawg ua ntu zus, vim xav kom cov tub ntxhais hluas txo tus cuj pwm no los yog ua kom zoo tuaj. Qhov ntawd yuav tsum yog pib ntawm lub hauv paus thiab hauv cov neeg zej zog, xws li cov tsev teev Ntuj Kav Tos Liv kuj koom nrog kev tawm tsam zaum no. Hauv kev cheb ntxuav zaum tas los uas yog lub 10 hli tsaib no, thiab yog lub Cim qhia txog tseem hwv kev txhawj xeeb hais txog cov tub ntxhais hluas kev haus luam yeeb hluav taws xob. Tus thawj pwm tsav Hun Manet tau tshaj txog txoj cai nruj nruj no, nrog rau kev txwv tu nrho mus txog kev ua tus tswv ntawm luam yeeb hluav taws xob. Hauv cov lus tshaj tawm zaum kawg los ntawm lub pwm tsav kev kawm, cov tub ntxhais hluas thiab kev ncaws pob hauv hnub tim 29 lub 4 hlis no, tau thov kom cov tsev kawm ntawv thiab lwm cov tsev kawm, xws li cov tsev xyaum hauj lwm. Kom ua nruj hais txog kev nyab xeeb thiab qhia rau cov me nyuam kawm ntawv kom paub. Thiab ua tej qho program tshwj xeeb los qhia kom paub txog. Cov tseem hwv pom tias luam yeeb hluav taws xob thiab tej twj haus luam yeeb, yog qhov tsis zoo rau kev nyab xeeb hauv zej zog. Vim pom tias yog lub qhov rooj mus rau kev quav tshuaj txhaum kev cai, ua kom quav yeeb quav tshuaj thiab muaj kev tua neeg. Dhau no lawm, tseem hwv tseem pom tias kev haus luam yeeb hluav taws xob ua kom cov tub ntxhais hluas hauv lub teb chaws lub neej tom ntej puas tsuaj. Tsis yog lawv lub cev ntaj ntsug puas tsuaj xwb. Thov txhob xav tias kev haus luam yeeb hluav taws xob yog qhov zoo saib. Cov lus no yog tus thawj pwm tsav Hun Manet hais thaum nws qhib cov hauj lwm tiv tus kab mob Cancer 5 xyoos hauv lub 5 hlis tsaib no. Thov muab siab rau tig mus rau kev kawm thiab maj mam ua tus neeg zoo rau luag tej qhuas tias yus ua tiav. Yawg Saroeun Sorn tus thawj coj cov tub ntxhais hluas hauv lub Cheeb Koom Txoos Phnom Penh hais tias :
“Cov thawj coj hauv lub Koom Txoos Kav Tos Liv txhawj xeeb hais txog kev haus luam yeeb hluav taws xob ntawm cov tub ntxhais hluas muaj coob zuj zus, thiab nws yog qhov txaus poob siab.” Nws hais ntxiv tias : “Cov tub ntxhais hluas raug txw mus rau qhov yuam kev tau sai heev. Lawv ua raws tej phooj ywg. Ua yam phooj ywg qhia uas tsis paub tias yog yam tsis zoo. Tom qab tawm tsev kawm ntawv, lawv kuj nrog tej phooj ywg mus ua si thiab tej zaum tej yam phem tshwm sim rau lawv kuj muaj.”
Yawg Sorn yog tus saib xyuas cov tub ntxhais hluas hauv lub Koom Txoos, nws saib tas nrho cov hnub nyoog 5 xyoos mus txog 30 xyoo hauv lub Cheeb Koom Txoos nyob Khas Phus Chas qab teb. Qhov ntev ntawm ciam teb, yog txij ntawm Phnom Penh mus txog ntug dej hiav txwv Thaib xib fab naj thiab Nyab Laj toob fab naj. Nws hais tias : “Tus thawj pwm tsav Hun Manet thiab nws cov nom yog cov ua nruj nruj hais txog tej yam no. Thiab lub Koom Txoos kuj koom ua cov hauj lwm no ib yam. Nov yog qhov txaus txhawj kawg. Peb lub Koom Txoos tab tom qhuab qhia cov tub ntxhais hluas kom paub txog qhov txaus ntshai, teeb meem lub cev ntaj ntsug thiab kev kawm. Qee zaus lawv muaj kev ntseeg nyob hauv Tswv Ntuj thiab hauv lub Koom Txoos, tab sis lawv tseem yuam kev. Peb yuav pab lawv thiab lawv cov tsev neeg.” Vim cov xwm txheej no, Sorn thiaj tsis tau sib txuas nrog leej twg ntau pes tsawg. Tab sis nws kuj nco txog qhov txaus ntshai hauv zej zog uas muaj rau cov tub ntxhais hluas siab tsis tus. Tab txawm luam yeeb hluav taws xob tsis txaus ntshai li tej luam yeeb uas neeg nyiam haus kam, tsis kav kuj muaj feem txog kev nqus nicotine uas yuav ua rau muaj tus kab mob Cancer, thiab nws yog qhov txaus txhawj txog lub cev ntaj ntsug ib yam li kev haus luam yeeb. Cov luam yeeb hluav taws xob uas siv roj teeb tsis yog hlawv luam yeeb, tab sis nws muaj qhov kub ua kom cov kua nplaum nicotine thiab cov kob tshuaj rais ua pa ncho. Luam yeeb hluav taws xob tuaj yeem zais thiab ua cuav tau yooj yim, vim yog qhov uas cov tub kawm lawv zais tau xws li tej cwj mem, me nyuam roj hmab thiab yam nyob hauv lawv lub neej niaj hnub uas cov me nyuam nqa tau nrog lawv. Zoo ib yam li cov qab zib thiab dej qab zib. Cov kua nplaum nyob hauv luam yeeb hluav taws xob, muaj qhov qab zib xws li cov zia thiab dib liab.
Dhau no lawm kev txhawj xeeb uas tseem hwv ntsia pom, yog qhov tseeb uas muaj tsoom pej xeem Khas Phus Chas hnub nyoog qis siv ntau dua. Kwv yees ib nrab ntawm tsoom pej xeem uas hnub nyoog 26 xyoo los qis dua ntawd. Kev haus luam yeeb hluav taws xob nws tsis zoo rau cov tub ntxhais hluas lub siab uas tab tom txhim kho, yog qhov laij thawj tias vim li cas neeg thiaj nyiam siv coob zuj zus nyob hauv cov tub ntxhais hluas, ces yog qhov txhawj xeeb ntawm cov tseem hwv, cov kws fab kev noj qab haus huv thiab tus neeg zoo li Sorn. Lub Koom Haum tswj hwm thiab tiv thaiv ntawm As Mes Lis Kas los yog CDC ceeb toom tias : “Kev haus luam yeeb thiab luam yeeb hluav taws xob, nws ua teeb meem rau cov neeg loj uas hnub nyoog tsawg.”
CDC hais tias : “Kev siv nicotine thaum tseem yau nws yuav ua rau cov paj hlwb uas tswj tus kheej, kev kawm, kev xav thiab kev tswj tus kheej dhia ceev. Cov tub hluas uas siv nicotine, tej zaum yuav muaj qhov txaus ntshai ntau dua kev quav lwm hom tshuaj yav tom ntej.” Cov kws tshawb fawb tseem soj ntsuam ntxiv mus hais txog qhov yuav ua teeb meem sai thiab tsis sai ntawm luam yeeb hluav taws xob.
Luam yeeb hluav taws xob tsis yog tias ua teeb meem rau tsoom pej xeem lub cev xwb, nws tseem ua teeb meem rau txhua yam nyob ib puag ncig thiab. Cov luam yeeb hluav taws xob uas siv lawm raug muab pov tseg ntau kawg, thiab cov roj hmab uas siv ua luam yeeb ntawd nws siv sij hawm ntev heev thiaj yaj tau. Ib yam li teeb meem lub cev ntaj ntsug hauv zej zog thiab ntawm tej tshav puam nyob Khas Phus Chas teb, tseem hwv txoj cai uas vam meej thiab tsim nyog ntawd hla dhau lub peev xwm kev siv txoj cai. Tab txawm luam yeeb hluav taws xob yog qhov txhaum kev cai txij xyoo 2014 los, tsis kav kuj tseem muaj muag nyob hauv tej kiab khw nyob Phnom Penh nrog rau cov tsev muag luam yeeb hluav taws xob, thiab hauv cov Website los tsev vas nyob Online ntau kawg. Luam yeeb hluav taws xob thiab tej twj siv tseem muaj muag thiab yuav nyob hauv ntau txoj kev. Telegram uas yog qhov chaw sib tham ntawm ib tsoom neeg nyob Online yog qhov neeg nyiam tshaj plaws nyob hauv lub teb chaws, nrog rau lwm yam Platform xws li; Tiktok, Facebook thiab Instagram.
Pa Chanroeun uas nws yog tus thawj ntawm Khas Phus Chas kev muaj vaj huam sib luag hais tias : “Qhov teeb meem loj tshaj tsis yog tsis muaj txoj cai, tab sis yog kev txwv tsis muaj zog txaus. Yog muaj kev siv txoj cai kom nruj tiag tiag thiab txhob pub muaj kev cuam tshuam, mas luam yeeb hluav taws xob yuav raug txwv tau raws li pom nyob hauv qee lub teb chaws. Tab sis kev txwv tsis muaj zog txaus thiab kev nyiag noj nyiaj ua kom muaj kev nyiag muag tej yam txhaum kev cai ntau zuj zus.”
Kev ua nruj hauv kev siv txoj cai tib yam xwb, kuj tsis yog kev tawm. Nws hais ntxiv tias : “Kev txwv tej teeb meem no thaum ntxov, tsim nyog yuav vam txog kev koom tes ntawm cov tsev neeg, cov tsev kawm ntawv thiab tej zej zog.”
Kwv tij Hmoob sawv daws ! Hnub no peb tham txog teeb meem ntawm kev haus luam yeeb hluav taws xob los xaus li no xwb. Zim txwv no nyob Los Tsuas teb, Thaib teb thiab lwm cov teb chaws uas muaj peb cov Hmoob nyob, pom tau tias cov tub ntxhais hluas nyiam haus luam yeeb hluav taws xob coob kawg. Ces peb yuav sib pab qhia thiab sib pab daws cov teeb meem no kom ploj mus. Peb yuav sib tuav xam seb yuav ua li cas thiaj pab tau cov tub ntxhais hluas kom tso tej kev phem no tseg, kom lawv lub neej thiab txheej neeg tom ntej tau nyob kaj siab lug thiab vam meej.
Thov Huab Tais Yes Xus Pleev lub txiaj ntsim pab txuag, kom peb cov me tub me nyuam dim ntawm cov xwm txheej no.
Lwm zaus peb mam sib ntsib dua, nej sawv daws nyob zoo
