Cov neeg ntseeg Kos Lim sib koom thov Ntuj thiab tawm tsam lub tuam tsev hluav taws xob Nuclear tshiab.
Hnub tim 27 lub 6 hli tag los no, pab neeg txuag txhua yam nyob ib puag ncig uas lawv yog Kav Tos Liv, nrog rau pab kav xwm txhua yam nyob ib puag ncig hauv lub Cheeb Koom Txoos, tau sib koom ua thaj txi Ntuj nyob ntawm kev tsheb hauv lub nroog Xes Us. Muaj cov neeg ntseeg ntau pua leej tuaj sib koom. Hauv lub thaj txi Ntuj Txiv Plig Yang Ki-seok tau xyav moo txog qhov tseem hwv tseem vam txog lub zog Nuclear ntxiv mus, tab sis nws yog qhov txaus ntshai. Thiab thov kom cov neeg ntseeg ua thwj tim ntawm txhua yam nyob ib puag ncig, thiab ua hauj lwm los rhuav tshem Nuclear. Cov neeg tuaj tawm tsam taug kev thoob lub nroog thiab thov kom tso tseg kev tsim lub tuam tsev hluav taws xob Nuclear.
Hnub tim 22 lub 6 hli tag los, lub Cheeb Koom Txoos Andong tau ua thaj txi Ntuj pub rau txoj sia thiab ntiaj teb kev thaj yeeb tsis muaj Nuclear. Thiab lawv cev ntawv rau cov nom tswv thov kom tseem hwv tso tseg kev tsim cov tsev hluav taws xob Nuclear loj thiab cov tshuab tshiab me me uas tsim Nuclear. Kev tawm tsam ntawm lub Koom Txoos tshwm sim tom qab lub Koom Haum Korea Hydro thiab Nuclear Power, uas yog lub Koom Haum lag luam xaiv lub nroog Yeongdeok-gun uas nyob hauv lub xeev Gyeongsang pej thiab lub nroog Gijang, lub nroog Busan ua qhov chaw tsim lub tsev Nuclear tshiab. Cov thawj coj lub Koom Txoos thiab cov tub tiv fab txhua yam nyob ib puag ncig tau xyav moo txog kev xaiv chaw tias; yog maj thiab tsis muaj kev tuav xam nrog tsoom pej xeem. Raws tej ntaub ntawv ntawm lub Koom Haum Atomic Energy Agency ntawm cov teb chaws hais tias ; Kos Lim Naj muaj 26 lub tsev tsim Nuclear thiab tseem tab tom txhim 2 lub. Xyoo 2024 lub zog Nuclear tsim hluav taws xob tau 31 feem pua nyob hauv lub teb chaws.
