Cov kws txawj ntse fab xov xwm hauv thaj av ntshiab thiab cov tub tshaj Ntuj Lus Online nyob As Xias, thov mus kom txog tib neeg hauv cov ntsiab lus ntawm lawv kev ua lub neej tiag tiag.
Miral Atik tus tub xov xwm hauv lub Cheeb Koom Txoos Yes Lus Xas Les ntawm lub Cheeb Koom Txoos Latin nyob Yes Lus Xas Les, tau hais txog qhov tseem ceeb hauv kev sib tham ntiag tug, hauv kev sib tham uas muaj lub ntsiab lus tias : “Ua kev nkag siab txog qhov tseeb nyob As Xias.” Hauv hnub tim 11 lub 9 hlis ntawm kev sau siab cov tub tshaj Ntuj Lus Kav Tos Liv Online nyob As Xias teb thawj zaug, hauv lub nroog Quezon City nyob Fis Lis Pees teb.
Miral Atik hais tias : “Qhov tseem ceeb yog kev mloog thiab kev lees paub tias; txhua tus neeg tab tom raug dab tsi ? Ua ntej yuav pib cov hauj lwm saib xyuas lawv.”
Nws hais tias qhov no tseem ceeb heev nyob hauv thaj av ntshiab, uas yog lub Cheeb Koom Txoos Yes Lus Xas Les ua tus saib xyuas cov neeg ntseeg Kav Tos Liv, tsis hais nyob Zos Das Nias, Pas Les Tis Nas, His Xas Lais thiab Kws Plos teb. Cov neeg ntseeg hauv txhua qhov chaw puav leej ntsib teeb meem qhov tseeb hauv tej kab lis kev cai, hauv zej zog thiab kev tseev tsim uas sib txawv. Tshwj xeeb tshaj yog nyob hauv kev tsis sib haum xeeb thiab kev txom nyem uas tab tom raug. Nws hais tias : “Cov neeg nyob qaum teb yog cov ntsib qhov tseeb uas txawv cov neeg nyob West Bank, thiab cov nyob GAZA.” Ntawm Atik mas tej kev sib txawv no yog qhov lub Koom Txoos cov tub xov xwm tej ntaub ntawv tsis tuaj yeem mus txog sawv daws nyob hauv tib lo lus tau. Lawv tsim nyog yuav mloog thiab xub ua kev nkag siab txog tib neeg lub neej tso. Tom qab ntawd mam nrhiav kev nyob ntawm lawv ib sab thiab qhia lub Moo Zoo rau lawv. Nws muab qhov no los xyaw nrog Yes Xus cov hauj lwm, tus uas mus ntsib ib tsoom neeg hauv ntiag tug thiab yoog raws kev ua lub neej ntawm lawv.
Atik hais tias : “Yes Xus mus ntsib lawv ntawm qhov chaw lawv nyob thiab hauv lawv cov hauj lwm.” Qhov no tseem ceeb heev rau cov tub tshaj Ntuj Lus Online kom tuaj yeem mus txog hauv tej pab neeg coob coob uas muaj ntau yam kab lis kev cai hauv cov ntsiab lus lawv tso tawm, cov xyam los yog kev tshaj lus. Yog tias tej kev nkag txog hauv digital tsis ua kom tau nrog neeg tham ntiag tug, mas kev nkag siab txog qhov tseem ceeb hauv zej zog kuj tsis tseem ceeb. Li ntawd, Atik thiaj hais tias kev xa xov hauv digital tsim nyog los ntawm tej kev paub, tej lus nug thiab tib neeg tej kev cia siab tiag. Hais txog ntawm cov tub tshaj Ntuj Lus Kav Tos Liv, mas kev tshaj lub Moo Zoo yog pib ntawm kev mloog thiab kev pub lub sij hawm rau qhov tseeb hauv tib neeg lub neej yog tus qauv uas lub Koom Txoos yuav siv hauv kev nyob ib sab thiab nrog lawv sib tham.
