Txhua yam tau hloov mus lawm. Everything Has Changed
Peb los txog Hnub Chiv Ob hauv lub Caij Hla lawm. Nov yog qhov kuv xav hais rau sawv daws paub tias : peb kheev kheev nkag siab yuam kev hais txog lub Caij Hla, vim peb xav txog lub Caij Nplooj Ntoos Hlav yog qhov tseem ceeb tshaj. Yog tias koj tsis nkag siab txog lub Caij Hla tias yog kev rov pib dua tshiab, txhais tias koj tsis nkag siab nws tiag. Tshwj zias koj yuav nkag siab tias lub Caij Hla yog zoo li av qeeg uas hloov txhua yam, koj kuj yuav tsis nkag siab txog thiab.
Nws ua rau kuv xav tas li, tab txawm kuv nyeem zaj no los ntau xyoo thiab tau nthuav txog zaj no los lawm. Nyob hauv lub Caij Hla, thaum peb nyeem cov zaj tseem ceeb hauv lub Caij Hla thiab nyeem cov Hauv Paus Xa Lus tej hauj lwm, nyeem ntawv Qhib Yav Tom Ntej, mas koj yuav ceeb txog nws. Cov neeg no xav qhia tias lub ntiaj teb tau hloov mus lawm. Nws tsis yog lub Caij Nplooj Ntoos pib hlav me me uas leej twg los qhuas. Qhov ntawd yog zoo kawg, vim nws tsis yog lub Caij Hla uas txhua yam nws deeg mus txog tus cag. Txhua yam hloov mus, vim kev sawv hauv cov tuag rov los ntawm Yes Xus. Kuv xav qhia kom pom txog qhov no nyob hauv kev nyeem 3 zaj nyeem ntawm peb hnub no, vim 3 zaj nyeem ntawd zoo heev.
Ib zaj yog Zam ntawv Moo Zoo, ib zaj yog cov Hauv Paus Xa Lus tej hauj lwm, thiab ib zaj yog nyob hauv ntawv Qhib Yav Tom Ntej. Peb yuav los pib nyob hauv Zam ntawv Moo Zoo. Zam coj peb mus rau txheej tsev saud hauv Hmo Hla, lawv poob siab thiab ntshai kawg. Cov Hauv Paus Xa Lus thiab peb paub tias : yog vim li cas lawv tus thawj coj thiaj raug tua tuag txom nyem ntsuav. Kuv tsis tau hais tias nws nyuam qhuav tuag, kuv yog hais txog nws xub raug tua nyob ntawm ib tsoom neeg xub ntiag txom nyem ntsuav los ntawm cov tub rog Los Mas uas lub xeev xa tuaj.
Cov His Xas Lais, cov Los Mas lawv xaiv nees yuam kev. Lawv tus neeg raug tua tuag. Thaum zaj yeeb yaj duab The Passion of the Christ raug tso tawm hauv ntau xyoo ua ntej no. Thiab muaj kev tawm tsam hais txog kev lim hiam nyob hauv zaj yeeb yaj duab no, xav tias zaj yeeb yaj duab no koj tau pom txog kev lim hiam uas cov Los Mas muab neeg ntsia saum Ntoo Cuam. Qhov ntawd yog qhov tshwm sim rau Yes Xus, ntawd yog qhov tshwm sim rau lawv tus thawj coj.
Lawv puas raug kev ntxhov siab ? Yog qhov meej tseeb tias lawv ploj ib tug phooj ywg thiab lawv tus thawj coj uas yog neeg zoo mus lawm. Qhov loj tshaj ntawd, yog lawv ntshai heev. Koj yuav pom tias lawv nyob saum ib kem tsev thiab tej qhov rooj qhov rais kaw tag. Lawv ntshai tsam muaj neeg phem nkag los, tom qab Yes Xus tuag. Lawv tsis yog lam ntshai, tab sis yog kev ntshai uas lawv ntshai tiag tiag. Koj sim xav txog ib zaug uas koj ntshai nyob hauv koj lub neej thiab ntshai tiag tiag seb, nws yog muaj qee yam tshwm sim, muaj qee yam poob siab. Koj tus yeeb ncuab tuaj koj tog thiab txhua yam hauv koj lub neej tab tom puas tsuaj. Ces ntawd yog qhov lawv tab tom ntsib. Txhua yam kev tsaus ntuj uas peb tab tom raug, lawv kuj tab tom raug loj kawg thiab. Peb hnov hais txog dab tsi ? Yes Xus yees tawm tuaj thiab nws sawv nyob nruab nrab hauv lawv thiab hais tias : “Nej nyob kaj lug !” Tam sim no Yes Xus Pleev tus sawv hauv cov tuag rov los, nws tsis zoo li Las Ntxas Los. Koj puas xav tias Yes Xus sawv hauv cov tuag rov los thiab yuav rov tuag dua. Yes Xus puas zoo li tus poj ntsuam nyob Nas Ees tus tub, uas sawv rov los thiab rov tuag dua ib zaug ntxiv.
Tsis yog ! Yog tias zoo li ntawd, mas Yes Xus kuj yog sawv rov los kom tau tuag dua. Lub ntiaj teb kuj nyob xws li qhov qub. Tam sim no peb pom dab tsi nyob hauv Yes Xus tus sawv rov los ? Yog kev yeej txoj kev tuag, Yes Xus sawv hauv cov tuag rov los, nws nyob qhov chaw siab lawm. Nws muaj hwj chim tshaj txhua yam nyob ntiaj teb no. Tsis muaj dab tsi yuav piv tau lub hwj chim sawv rov los ntawm Yes Xus. Lawv pom dab tsi nyob ntawm no ? Pom Yes Xus yeej txoj kev tuag.
Li ntawd, txhua yam thiaj sib txawv, txhua yam thiaj hloov mus. Lub hwj chim uas peb xav kuj ploj mus lawm.
Tam sim no Tswv Ntuj txoj kev nyiam kev hlub muaj zog dua txhua yam nyob ntiaj teb. Qhov tseeb tiag kev nyiam kev hlub yeej peb txoj kev ntshai. Li ntawd, thaum Yes Xus sawv hauv cov tuag rov los thiab hais rau lawv tias : “Shalom”. Shalom yog kev thaj yeeb, yog kev nyob zoo, yog qhov peb txhua tus xav tau. Yam uas kev ntshai tiv, yog Shalom. Thaum Yes Xus sawv hauv cov tuag rov los thiab hais Shalom rau lawv, mas txhais tias peb yeej txoj kev ntshai lawm. Qhov tsaus ntuj tab tom khiav. Tswv Ntuj yog lub ntiaj teb tus Tswv Ntuj. Kuv yog hais txog tas txhua yam ntawd tab tom sawv rov los. Yes Xus rov hais rau lawv tias : “Nej nyob kaj lug ! Kuv xa nej mus xws li Leej Txiv xa kuv tuaj.” Yes Xus hais li ntawd tas, nws tshuab pa rau saum lawv thiab nws hais tias : “Nej txais Leej Ntuj Plig Ntshiab.”
Saib ma, nov yog lub Koom Txoos. Yog txoj sia hauv Leej Ntuj Plig Ntshiab xws li Leej Txiv xa kuv tuaj, kom ua tus xa kev thaj yeeb mus thoob ntiaj teb. Tam sim no kuv xa nej mus nrog tib txog hauj lwm, tib lub Moo Zoo. Peb lub Koom Txoos tsis yog muaj cia rau peb xwb, nws yog muaj rau tas lub ntiaj teb. Nej mloog lo lus no puas muaj txiaj ntsim qab hau ? Kuv xav tias nyob hauv lub Caij Hla no, peb puas yuav pib xav txog peb lub neej ua neeg ntseeg hauv tus yam ntxwv ntawd ? Thaum kuv tseem ua lub neej nyob hauv txhua txhia hnub, kuv lub hom phiaj yog dab tsi ?
Yog tus xa Yes Xus kev thaj yeeb mus rau txhua tus uas kuv tau ntsib. Kuv xa nej mus xws li Leej Txiv xa kuv tuaj. Yes Xus tshuab pa rau saum lawv.
Saib seb peb tau txais Leej Ntuj Plig Ntshiab thaum twg ? Yog thaum peb txais lub Cim Ntxuav hauv cov Cim Ntshiab. Thaum ntawd peb tau txais Leej Ntuj Plig Ntshiab, thiab peb rais ua tus xa Leej Ntuj Plig Ntshiab mus rau lub ntiaj teb.
Li ntawd, thaum hais txog ntawv Moo Zoo lawm, peb yuav nyeem cov Hauv Paus Xa Lus tej hauj lwm. Lo lus Apostellane txhais tias xa. Nov yog zaj hais txog peb txhua tus, peb txhua tus yog thwj tim, peb txhua tus raug Yes Xus tus sawv hauv cov tuag rov los xa tuaj nyob hauv ntiaj teb. Peb tau hnov dab tsi ? Hnov cov Cim thiab ntau yam hwj huam yees ntxwv tshwm sim nyob hauv neeg, los ntawm cov Hauv Paus Xa Lus txhais tes. Leej Ntuj Plig Ntshiab lub zog nyob hauv tus tshaj lub Moo Zoo. Peb tau hnov ib zaj zoo kawg los ntawm Pob Zeb. Thaum Pob Zeb hla thaj chaw ntawd, muaj neeg coj tus neeg mob thiab tus tuag ceg tuaj tso ntawd kom Pob Zeb tus duab hla ob tus neeg mob. Txhais tias lawv tau txais lub zog kho mob los ntawm cov Hauv Paus Xa Lus, kom Leej Ntuj Plig Ntshiab lub zog ri mus thoob ntiaj teb.
Zim txwv no muaj coob leej neeg uas lawv muaj peev xwm kho mob ntawm lub cev ntaj ntsug. Peb txhua tus sim xav seb, yog koj tau txais Leej Ntuj Plig Ntshiab lawm, koj txoj hauj lwm yog xa Leej Ntuj Plig Ntshiab lub zog mus rau lub ntiaj teb.
Leej Ntuj Plig Ntshiab muaj lub zog kho mob, kho lub siab, kho lub tswv yim thiab kho kev sib raug zoo ntawm tib neeg. Kuv tsis yog khav theeb, tab sis kuv xav tias thaum peb hla ib qho chaw twg, mas luag tej yuav ntsia pom Leej Ntuj Plig Ntshiab uas peb tau txais nyob hauv peb. Kuv yuav hais ntxiv txog cov Hauv Paus Xa Lus tej hauj lwm nyob hauv lub Caij Hla no, thiab peb yuav los saib txog zaj nyeem ob hauv ntawv Qhib Yav Tom Ntej. Yog phau ntawv kawg nyob hauv ntawv Cog Lus Tshiab. Peb yuav nyeem mus kom tas lub Caij Hla. Kuv thov caw nej muab phau Ntawv Ntshiab tawm los, thiab muab siab rau nyeem nyob hauv lub Caij Hla no puas tau ? Yuav nyeem phau ntawv Qhib Yav Tom Ntej kom tas, nws yog qhov uas 4 phau ntawv Moo Zoo tab tom yuav tiav. Kuv xav qhia kom nej pom txog ob peb yam uas peb hnov nyob hauv ntawv Qhib Yav Tom Ntej hnub no. Zam yog tus sau phau ntawv Qhib Yav Tom Ntej, Zam pom nws tus kheej nyob hauv lub pov txwv Potmos. Peb yuav los tham me me txog keeb kwm txheej thaud. Potmos yog qhov chaw kaw cov neeg raug txim, thiab nyob ze ntawm ntug hiav txwv As Xias me. Yog qhov chaw uas Los Mas xa lawv cov yeeb ncuab mus ua qhev, nws yog ib lub nkuaj kaw neeg phem kawg. Qhov ntawd yog qhov pib ntawm phau ntawv no. Tus neeg sau yuav tsum mus nyob hauv nkuaj, vim Los Mas lub hwj chim ntes nws. Yog vim li cas ? Zam hais qhia peb tias : “Vim kuv tshaj Tswv Ntuj lub Moo Zoo thiab ua tim khawv txog Yes Xus.” Dab tsi ua kom cov nom Los Mas lub siab nphau npog ? Yog lub moo Yes Xus sawv rov los. Tab sis qhov tiag cov xwm ntawd tsis tau ua kom cov nom Los Mas ntxhov siab, vim lawv tsis tau quav ntsej txog. Qhov lawv ntxhov siab yog Yes Xus sawv rov los, yog Tswv Ntuj cov lus thiab yog qhov Zam ua tim khawv txog Yes Xus. Lawv ntshai, ces lawv thiaj ntes Zam xa mus kaw nkuaj nyob Potmos. Tab sis tsis txwv Tswv Ntuj cov lus puas yog ? Leej Ntshiab Paj Lug paub txog zaj no zoo. Lawv xa Zam mus kaw hauv tsev loj faj, tab sis lawv tsis xauv Tswv Ntuj Lo Lus. Ces lub Moo Zoo hais txog Yes Xus sawv rov los thiaj tawm los ntawm thawj tug tim khawv. Yam no tau hloov lub ntiaj teb thiab yeej peb txoj kev ntshai. Kev ua tim khawv ntawm Zam muaj los txog niaj hnub no. Nws piav rau peb hais txog kev nyob hauv lub pov txwv Potmos. Nws muaj lub Cim ntawm Yes Xus sawv rov los nrog nws nyob. Yog lub Cim tsev teev Ntuj, nws hnav Txiv Plig cev khaub ncaws nyob hauv tsev teev Ntuj. Nws tab tom mus kev ncig 7 tug ncej txawb tswm ciab. Nws hnov Tswv Ntuj hais rau nws tias : “Txhob ntshai”. Rov muaj lo lus ntawd dua, yog lo lus tias Shalom, kev thaj yeeb. Txhob ntshai, kuv yog thawj tug thiab yog tus kawg. Tus uas tseem muaj txoj sia nyob. Kuv twb tuag ib zaug los lawm, tab sis tam sim no kuv tau txoj sia nyob mus li. Kuv tsis yog tuag xwb, kuv tseem raug tua txom nyem ntsuav los ntawm cov Los Mas uas nrog cov His Xas Lais muaj hwj chim sib koom siab. Kuv tuag lawm, kuv raug tua, tab sis tam sim no kuv muaj txoj sia. Kuv nyiam nws, vim nws ua rau kuv tau txoj sia nyob mus li.
Hais dua lwm lo lus tias : Yes Xus yog Tswv Ntuj hauv keeb kwm, tsis yog cov nom tsiv tsaim nyob hauv ntiaj teb no. Yes Xus yog tus ua kom Leej Ntuj Plig Ntshiab tuaj nyob hauv lub Koom Txoos. Lub Koom Txoos txoj hauj lwm tam sim no, yog ua kom Leej Ntuj Plig Ntshiab ri mus thoob ntiaj teb.
Peb los nyeem 3 zaj no ua ke, ces koj yuav pom tias av qeeg, yog hu ua lub Caij Hla, thiab koj kuj yuav pom yam rov ua dua tshiab uas hu ua lub Caij Hla.
Kwv tij Hmoob sawv daws ! Hnub no peb tham txog txhua yam tau hloov mus lawm, los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug ! Lwm zaus peb mam sib ntsib dua, nej sawv daws nyob zoo !
