Lub Cij Plaub Caug: Lub Cim, tus yam ntxwv thiab cov lus hauv kev tig los yuav lub siab tshiab

Lub Caij Plaub Caug : Lub Cim, tus yam ntxwv thiab cov lus hauv kev tig los yuav lub siab tshiab.

Lub Caij Plaub Caug yog dab tsi ? Yuav suav li cas thiab muaj zaj nyeem twg ?

Vim li cas thiaj coj kab ke yoo thiab pub ? Lub Caij Plaub Caug yog pib hauv Hnub Plaub Txais Tshauv thiab npaj siab tos txais lub Caij Hla.

Xyoo 2026 no, lub Caij Plaub Caug yog pib txij hnub tim 18 lub 2 hlis. Yog ncaj rau Hnub Plaub Txais Tshauv. Yog lub caij tseem ceeb hauv kev npaj siab tos txais lub Caij Hla, uas yog xaus cov kab ke ntawm lub xyoo (Liturgical) thiab cov neeg ntseeg lub neej. Lub Caij Plaub Caug yuav xaus rau Hnub Tsib Ntshiab uas yog Yes Xus noj Pluas Hla, kom tau nco txog kev tsim lub Cim Yug thiab cov kab ke ntxuav taw.

Xyoo no lub Caij Hla yog ncaj rau hnub tim 21 lub 4 hlis.

Li ntawd, Leej Ntshiab Paj Lug thiaj hais tias : “Lub Caij Plaub Caug, yog lub caij tseem ceeb hauv kev tig los yuav lub siab tshiab tiag tiag. Kom tau tiv nrog tus ntsuj plig phem hauv kev tig los yuav lub siab tshiab.” Raws li thawj zaj nyeem hauv lub thaj txi Ntuj hnub plaub txais tshauv. Kev mus kev nyob hauv 40 hnub no yog qhov coj peb mus rau lub Caij Hla, kom tau nco txog Yes Xus kev txom nyem, kev tuag thiab kev sawv rov qab los. “Lub ntsiab tseem ceeb hauv kev cawm yog kev mus rau teb chaws suab puam hauv kev tsim, kom tau rov los koom nrog Tswv Ntuj.”

Nov yog cov lus Vaj Qhia Fas Ntshis Kus hais rau peb.

Tus zauv 40.

Hauv cov kab ke "Quadragesima" hauv xeem lus Latin, yog hais txog ntu sij hawm 40 hnub sib law. Lub Caij Plaub Caug yog nco txog Yes Xus yoo tshaib 40 hnub nyob teb chaws suab puam, ua ntej nws yuav pib tshaj lub Moo Zoo rau ib zeej tsoom. Hauv Mas Tais ntawv Moo Zoo uas peb nyeem, mas Leej Ntuj Plig Ntshiab coj Yes Xus mus rau teb chaws suab puam kom raug dab phem ntxias. Yes Xus yoo mov tau plaub caug hnub plaub caug hmo, ces nws tshaib plab kawg.

Tus zauv 40 yog lub Cim uas siv nyob hauv Ntawv Cog Lus Qub thiab Ntawv Cog Lus Tshiab, kom tau nco txog qhov tseem ceeb hauv Tswv Ntuj haiv neeg. Yog tus zauv qhia txog lub caij tos, caij ntxuav txim txhaum, caij rov mus cuag Tswv Ntuj thiab nco tias Tswv Ntuj ncaj ncees rau nws cov lus cog. 40 hnub hauv Ntawv Cog Lus Qub, yog hais txog dej nyab ntiaj teb thiab 40 hnub uas Mais Xes nyob saum lub roob Xis Nais. 40 xyoo uas cov His Xas Lais mus los hauv teb chaws suab puam, ua ntej yuav mus txog daim av Tswv Ntuj cog lus yuav muab rau lawv. 40 hnub yog hais txog tus yaj saub Es Lias kev nce mus saum lub roob Horeb, thiab 40 hnub yog hnub uas Tswv Ntuj kom lub nroog Nis Nis Vas tig los yuav lub siab tshiab, tom qab Yos Nas tshaj lub Moo Zoo. Nyob hauv Ntawv Cog Lus Tshiab, yog thaum Yes Xus sawv rov qab los nws nrog cov Thwj Tim nyob 40 hnub ua ntej nws nce mus saum Ntuj, thiab tso Leej Ntuj Plig Ntshiab nqes los. Lub Caij Plaub Caug hauv xyoo 2011, Vaj Qhia Npes Nes Dis 16 hais tias : “Nws yog ib qho hauv kev raws Yes Xus qab, thaum Yes Xus mus hauv lub nroog Yes Lus Xas Les. Yog qhov chaw uas nws lub hom phiaj tiav log hauv kev raug txom nyem, kev tuag thiab kev sawv rov los. Thiab yog qhov qhia tias cov neeg ntseeg lub neej yog txoj kev yuav tsum taug, tsis yog txoj cai uas ua raws xwb. Tab sis yog Yes Xus tus kheej uas yuav ntsib, tos txais thiab raws qab.”

Cov tshauv.

Hnub Plaub txais tshauv yog hnub yoo mov thiab yoo nqaij, ib yam li Hnub Rau Ntshiab uas caiv tsis noj nqaij. Lub Caij Plaub Caug qhia peb tias ; vim cov kab ke yoo hauv lub Caij Plaub Caug, mas peb thiaj yeej txhua yam kev phem thiab txhawb nqa tus ntsuj plig tau. Hnub Plaub txais tshauv, Txiv Plig yuav muab cov tshauv Ntshiab pleev cov neeg ntseeg hauv pliaj. Cov tshauv yog tshauv txiv ntoo roj uas foom hmoov zoo hauv Hnub Chiv Hla tsaib no. Cov tshauv uas pleev ntawm hauv pliaj, yog lub Cim qhia tias peb muaj txoj sia thiab txhib kom peb tig los yuav lub siab tshiab.

Hnub Plaub txais tshauv.

Thaum peb txais tshauv, mas kev tig los yuav lub siab tshiab ntawd qhia txog ob yam : yog kev tig los yuav lub siab tshiab thiab ntseeg txog Yes Xus lub Moo Zoo, thiab nco ntsoov tias koj yog av koj yuav rov qab mus ua av. Thawj yam qhia peb yog kev tig los yuav hlub siab tshiab, yog hloov kev ua lub neej thiab zam kev txhaum. Yam ob yog qhia kom peb rov xav txog neeg lub keeb nyob hauv ntawv Hauv Paus. Tom qab As Das ua txhaum, mas Tswv Ntuj hais tias :

“Koj ntsej muag yuav tawm hws lug koj thiaj tau noj, mus txog hnub koj rov qab mus ua av, vim koj yog av puab. Koj yog av luaj ces koj yuav rov mus ua av luaj.”

Tswv Ntuj lo lus ua kom pom txog kev txom nyem. Qhov tseeb tiag nws yog kev tuag. Yog qhov phem tshaj plaws. Yog tias neeg yog av luaj, mas neeg kuj yog cov av uas muaj nqis nyob ntawm Tswv Ntuj lub ntsiab muag, vim Tswv Ntuj tsim neeg los kom nyob mus ib txhis.

Lub Cim, kab ke yoo, pub rau luag thiab kev teev Ntuj.

Kev yoo, kev pub thiab kev teev Ntuj yog lub Cim. Los sis peb hu tias yog kev ua nyob hauv lub Caij Plaug Caug. Kev yoo yog hais txog tsis noj mov tsis noj nqaij kom tau ua lub neej sov siab dua qub. Tsis noj mov tsis noj nqaij, tsis tau txhais tias txwv tu nrho txhob noj. Tab sis yog hais txog noj mov kom tsawg thiab noj lwm yam xwb, tsis txhob noj nqaij. Vaj Qhia Fas Ntshis Kus qhia peb tias :

“Cov kab ke yoo yog lub caij tseem ceeb hauv kev loj hlob, vim nws ua kom peb txawj pom txog cov neeg pluag txom nyem uas lawv tsis muaj dab tsi li. Thiab ua kom peb muab siab rau txog Tswv Ntuj thiab cov neeg nyob ib puag ncig peb ntau dua qub. Yog cog kev muab siab rau mloog Tswv Ntuj tus uas daws peb qhov nqhis.”

Kev yoo kuj txuas nrog kev pub thiab. Leej Ntshiab Leo tus loj qhia peb hais txog lub Caij Plaub Caug tias : “Yam uas cov neeg ntseeg yuav tsum ua, mas lawv yuav muab siab rau ua nyob hauv lawv txoj kev ntseeg ntau dua qub. Kom tau ua raws tus piv txwv ntawm kev ua thwj tim hauv cov kab ke yoo hauv lub Caij Plaub Caug. Tsis yog tias yoo nqaij yoo mov xwb, qhov tseem ceeb tshaj yog zam kev ua txhaum.”

Cov kab ke yoo uas ntshiab huv thiab tsim nyog no, tsis muaj dab tsi yuav muaj txiaj ntsim qab hau tshaj kev pub uas hais tias yog ‘kev khuv leej’, nws yog tas txhua yam uas ua tau zoo. Li ntawd, kab ke yoo thiaj tuaj nrog kev ncaj ncees thiab kev yoo. Tshwj xeeb tshaj yog kev nyiam kev hlub hauv kev ua sib pub ntawm cov neeg pluag txom nyem. Tsis yog qhov uas cov Cheeb Koom Txoos thiab cov tsev teev Ntuj lam ua los txhawb nqa lub Caij Plaub Caug, hauv kev sib koom tes thiab kev nyiam kev hlub. Kom tau pab cov neeg tsis muaj zoo caij raws li Vaj Qhia Fas Ntshis Kus cov lus hais xwb, tab sis kev ua thiab kev pub pab nws daws tso peb lub siab ntshaw thiab pab kom peb txawj pom tias lwm tus yog peb cov kwv tij.”

Lub tsev noj mov nyob Los Mas : kev pub rau luag yog kev saib xyuas cov neeg tsis muaj lub caij.

Lub Caij Plaub Caug kuj yog lub caij tshwj xeeb hauv kev teev Ntuj. Leej Ntshiab Aus Nkus Tis Nus hais tias : “Kev yoo mov thiab kev pub luag noj, yog kev teev Ntuj ob phab tis” uas pab kom kev teev Ntuj muaj zog thiab mus txog Tswv Ntuj yooj yim dua.” Leej Ntshiab Zam Chrysostom hais tias : “Kho nej lub tsev kom zoo nkauj hauv kev ua siab mos siab muag thiab kev txo hwj chim los ntawm kev teev Ntuj. Yog nej ua li no, mas nej yuav tsim tau qhov chaw tsim nyog rau Tswv Ntuj nyob.”

Vaj Qhia Fas Ntshis Kus hais tias : “Hauv kev siv sij hawm ntau rau kev teev Ntuj, peb cia peb lub siab qhia tawm txog cov lus dag uas peb ntxias dag peb tus kheej.”

Kev suav hnub xam nyoog.

Hauv tiam 4, lub Caij Plaub Caug muaj 40 hnub. Yog suav thaub qab txij hnub Rau Ntshiab mus txog thawj Hnub Chiv hauv lub Caij Plaub Caug. Thaum kev sib koom tes ntawm lub Caij Hla qub ploj mus hauv tiam 6, mas lub Caij Plaub Caug muaj 42 hnub. Xam nrog Hnub Rau Ntshiab thiab Hnub Xya Ntshiab uas tus vaj Nqes Nkos Lis pom tias tsis tas yuav suav Hnub Chiv 6 hnub nrog rau Hnub Chiv nqaum nplooj, uas yog hnub nco txog kev txhaum. Li ntawd, ua kom muaj 40 hnub yog tsis suav nrog Hnub Chiv, mas tshuav 36 hnub. Lawv thiaj muab hnub pib ntawm lub Caij Plaub Caug hauv cov kab ke raws Los Mas tus qauv mus ua Hnub Plaub, ces thiaj rais ua Hnub Plaub txais tshauv. Zim txwv no lub Caij Plaub Caug xaus rau lub thaj txi Ntuj uas Yes Xus noj Pluas Hla hauv Hnub Tsib Ntshiab. Tab sis yuav ua kom txwm 40 hnub uas tsis xam cov Hnub Chiv, mas yuav tsum suav cov hnub hauv lub Caij Hla ib yam. Xws li hauv tus vaj Nkes Nkos Lis txheej neeg.

Cov kab ke hauv kev ntseeg.

Xws li lub Caij Tos Huab Tais, mas cov kab ke hauv lub Caij Plaub Caug yuav muaj ntau yam yooj yim dua. Qee yam pab kom peb nkag siab txog lub ntsiab hauv lub caij no zoo tuaj, xws li lub lis piam ua ntej hauv lub Caij Yes Xus Yug Los. Hauv lub Caij Plaub Caug, mas cov Txiv Plig yuav hnav lub tsho tshaj sab tsos tsam xem. Yog tsos txhawb nqa kev tig los yuav lub siab tshiab tiag tiag. Dhau no lawm, hauv lub thaj txi Ntuj yuav tsis muaj paj ntoos nyob ntawm lub rooj ua thaj txi Ntuj. Peb yuav tsis hais zaj cav txog Tswv Ntuj, thiab hais zaj As Les Lus Yas. Txawm li cas kuj xij, Hnub Chiv 4 hauv lub Caij Plaub Caug uas sawv daws paub nyob hauv lub npe Laetare, yog qhia txog kev zoo siab tias lub Caij Hla los yuav txog. Li ntawd, hauv lub thaj txi Ntuj thiaj kheev siv twj paj nruag. Lub rooj ua thaj txi Ntuj yuav muaj paj ntoos zoo nkauj thiab Txiv Plig hnav lub tsho tshaj sab tsos paj yeeb.