Lub Caij Tos Huab Tais, lub Koom Txoos muab 3 leej neeg los coj peb mus ntsib Leej Pleev; yog Yaj Saub His Xais tus tshaj txoj kev vam khom rau sawv daws. Zam Ntxuav Plig tus qhia sawv daws tig los yuav lub siab tshiab. Niam Mab Liab tus zoo siab tos Huab Tais nqes los.
Peb leej neeg hais los ntawd, yog peb leeg coj peb cov ntseeg mus ntsib Huab Tais; tab sis peb yuav coj tus yam ntxwv zoo li cas Huab Tais Yes Xus thiaj los nyob hauv peb? peb yuav coj tus yam ntxwv zoo li no :
1. Peb yuav teev Ntuj zov hmo.
2. Peb yuav hloov siab tshiab taug Tswv Ntuj txoj kev.
3. Peb yuav zoo siab nyiam, khuv leej lwm tus thiab qhib siab mloog lwm tus.
4. Ua tus neeg muaj lub siab pluag thiab nqhis Ntuj Lus tas mus li.
Yog li, nyob hauv lub Caij Tos Huab Tais peb cov ntseeg thiaj yuav coj lub txoos teev Ntuj li no :
1. Peb yuav nyeem tus Yaj Saub His Xais tej zaj hais txog txoj kev tos Huab Tais Yes Xus yuav los nyob ntiaj teb no thiab yuav tsim ib lub Ceeb Tsheej ri mus puv tas lub ntiaj teb. Peb nyeem Ntawv Moo Zoo piav txog tus Ntxuav Plig Zam qhuab qhia sawv daws kom tig los yuav lub siab tshiab tsim nyom txais tus Huab Tais yuav tuaj. peb nyeem Ntawv Moo Zoo piav txog Mab Liab uas nws yog tus yuav yug Huab Tais.
2. Nyob hauv cov zaj hu nkauj, mas peb yuav hais cov zaj Nkauj Paj Nruag cav txog Huab Tais yuav tuaj cawm lub ntiaj teb. Peb hu tej zaj nkauj seev yees tos txog Huab Tais. Peb tsis hais zaj ‘Nyob Pem Ntuj’ los yog cov nkauj Nto Moo, vim yog ib zag zoo siab lom zem uas Tswv Ntuj cov Tshiab muab los cav txog Yes Xus yug los.
3. Nyob hauv Caij Tos Huab Tais, Leej Choj hnav tsoos tsho tsam xem, vim tsho tsam xem yog tsho tsis qab siab. Peb tsis qab siab vim peb yog ib co neeg tos tus yuav tuaj. Cov ntaub vov lub tsev tsam phooj kuj yog tsam xem. Yog peb xav sau duab phim lub Caij Tos Huab Tais, mas peb yuav sau tej yam uas Ntawv Ntshiab hais txog : zoo li lub hnub ziab saum ib lub roob, los lwm yam raws li tus Yaj Saub His Xais hais.
4. Nyob hauv lub Caij Tos Huab Tais mas peb yuav npaj ib lub siab tshiab tsim nyog txais Yes Xus tuaj nyob hauv peb. peb nrog tas lub ntiaj teb neeg tos kom Yes Xus lub Ceeb Tsheej tuaj txog sawv daws. Peb thov kom cov tseem tsis tau paub Yes Xus lawv tau ntsib Yes Xus.
(Cov zaj no thau los ntawm TP. Nyiaj Pov phau ntawv TXOJ TUAM KEV TEEV NTUJ thiab TP. Chedtha Chaided phau ntawv qhia teev Ntuj.)
