ZAJ NYEEM HNUB TIM 30 LUB 3 HLIS 2024
HNUB XYA NTSHIAB
COV LUS NYOB HAUV MAS KOS NTAWV MOO ZOO (MK 16: 1-8)
Cov kwv tij Hmoob sawv daws, hnub no yog Hnub Xya Ntshiab, yog hnub tom qab Huab Tais Yes Xus tuag tas. Tab sis Ntawv Moo Zoo hauv hnub no mas yog piav txog hnub tag kis, los yog Hnub Chiv. Ntawv Moo Zoo hais tias thawj hnub pib lub lis piam, cov poj niam nqa tshuaj tsw qab mus tom ntxa ces lawv pom tias lub qhov ntxa qhib, lawv tsis pom Huab Tais Yes Xus lub cev. Yam lawv pom mas yog Tswv Ntuj 2 tug Tshiab tawm los hais qhia lawv tias Huab Tais Yes Xus twb sawv los lawm.
Kwv tij Hmoob sawv daws, yog vim Hnub Chiv, Huab Tais Yes Xus sawv rov los, mas peb cov neeg ntseeg txog Yes Xus thiaj saib Hnub Chiv yog Hnub Ntshiab, yog Tswv Ntuj Hnub, ces peb thiaj muab hnub no ua hnub sawv daws sib txoos ua Ntuj tsaug los yog hais tias ‘ua thaj txi Ntuj’.
Cov ntseeg thiaj tsis coj raws li cov His Xas Lais cov kab lis kev cai caiv Hnub Xas Npas Tos los yog Hnub Xya lawm.
Cov kwv tij, nyob hauv Ntawv Moo Zoo hnub no, ob tug Tshiab tau hais kom cov poj niam muaj lub siab ntseeg, lawv tso siab rau Huab Tais Yes Xus cov lus thiab kom lawv muaj kev vam khom tias lawv yuav rov pom Huab Tais Yes Xus dua. Yog li mas cov kwv tij Hmoob, peb yuav tso siab thiab ntseeg Huab Tais Yes Xus cov lus nws niaj hnub hais rau peb nyob hauv Ntawv Moo Zoo, peb thiaj yuav vam khom tias muaj ib hnub peb yuav rov tau ntsib Huab Tais Yes Xus tim ntsej tim muag xws li cov poj niam muaj lub siab ntseeg no.
Nyob zoo sawv daws.
