ZAJ NYEEM HNUB TIM 25 LUB 4 HLIS, HNUB UA HMOOV LEEJ NTSHIAB MAS KOS, TUS SAU NTAWV MOO ZOO
COV LUS NYOB HAUV MAS KOS NTAWV MOO ZOO (MK 16: 15-20)
Kwv tij Hmoob, hnub no peb lub Koom Txoos ua hmoov cav txog Leej Ntshiab Mas Kos, tus sau ntawv Moo Zoo.
Mas Kos yog leej twg?
Mas Kos yog ib tug neeg Hes Las nyob txawm hauv lub nroog Yes Lus Xas Les. Mas Kos yog tus Hauv Paus Xa Lus Paj Lug ib tug thwj tim. Mas Kos tau nrog Paj Lug mus tshaj lub Moo Zoo nyob pej kum teb thiab tos mus nrog Paj Lug nyob tim Los Mas. Ces thaum Xis Moos Pob Zeb tuaj txog Los Mas, Mas Kos thiaj ua tus txhais lus rau Pob Zeb.
Mas Kos niaj hnub hnov Pob Zeb qhia Yes Xus cov lus thiab cov dej num, Mas Kos thiaj sau Pob Zeb cov lus ua ib phau cia, yog thawj phau ntawv Moo Zoo xeem lus Hes Las.
Kwv tij, hais txog lub Moo Zoo hnub no, mas yog Huab Tais Yes Xus cov lus hais zaum kawg ua ntej nws nce mus saum Ntuj.
Huab Tais Yes Xus hais tias “Nej mus thoob qab ntuj, nej tshaj lub Moo Zoo rau txhua leej txhua tus.”
Tom qab Huab Tais Yes Xus nce mus saum Ntuj lawm, cov thwj tim thiaj ua raws li Huab Tais Yes Xus cov lus hais no, mas lub Moo Zoo thiaj tuaj txog peb sawv daws.
Kwv tij Hmoob, niaj hnub no peb cov tau txais lub Cim Ntxuav lawd, mas peb yog Huab Tais Yes Xus thwj tim, ces peb thiaj tau txais ib txog hauj lwm loj; yog tshaj lub Moo Zoo rau lwm tus.
Peb yuav tshaj lub Moo Zoo tau li cas?
Qhov peb ua tau thiab yooj yim yog ua neej nyob hauv txoj kev sib nyiam sib hlub, sib zam, thiab ua tus qauv zoo rau lwm tus pom xws li nquag teev Ntuj thiab koom thaj txi Ntuj txhua hnub chiv.
