Zaj nyeem hnub tim 23 lub 8 hli 2025 (Daily reflection)

ZAJ NYEEM HNUB TIM 23 LUB 8 HLI 2025

HNUB NCO TXOG LEEJ NTSHIAB LOS XAS NYOB LIS MAS

COV LUS NYOB HAUV MAS TAIS NTAWV MOO ZOO (MT 23: 1-12)

Kwv tij Hmoob sawv daws, nyob hauv neeg lub siab mas neeg xav kom lwm tus pom txog neeg lub txiaj ntsim, xav kom lwm tus hwm, lwm tus qhuas. Li ntawd, thaum neeg ua dab tsi mas neeg thiaj nyiam tshaj rau lwm tus paub, thiab neeg thiaj nyiam nrhiav suab npe, hwj chim. Tab sis hnub no Huab Tais Yes Xus kom peb thim xav, peb rov tig los soj ntsuam peb tus kheej saib peb puas ua li hais.

Huab Tais Yes Xus xav kom sawv daws pom tseeb mas nws thiaj muab cov Fas Lis Xais thiab cov Kws Ntawv Ntshiab los ua piv txwv hais, vim tias cov Fas Lis Xais thiab cov Kws Ntawv Ntshiab mas lawv yog cov neeg nto moo thiab muaj hwj chim, lawv nyiam qhia sawv daws kom coj Mais Xes txoj cai, tab sis lawv ntiag tug mas lawv tsis ua raws. Lawv mus qhov twg mas lawv ua tus khav theeb kom sawv daws hwm.

Huab Tais Yes Xus hais ntxiv tias “Nej txhob cia luag tej hu nej ua Xib Hwb, thiab nej txhob hu leej twg ua Leej Txiv; vim nej tsuas muaj ib tug Xib Hwb xwb, thiab nej tsuas muaj ib Leej Txiv xwb.”

Kwv tij Hmoob sawv daws, nyob hauv cov Yus Das, mas lawv hu cov Tuam Leej Choj ua ‘Leej Txiv’ los yog ‘Txiv’ thiab lawv hu cov Kws Ntawv Ntshiab ua ‘Xib Hwb’ vim tus Tuam Leej Choj yog tus cev cov txim rau Tswv Ntuj hauv lub Tuam Tsev Teev Ntuj, cov Kws Ntawv Ntshiab yog cov qhia Mais Xes Txoj Cai rau tsoom sid.

Tab sis Huab Tais Yes Xus pom tias lawv tsis tsim nyog ua sawv daws ‘Txiv’ thiab ‘Xib Hwb’ vim lawv coj tus yam ntxwv tsis phim 2 lo lus ntawd; lawv tsis nyiam tsis hlub zeej tsoom, lawv tsis ua raws li lawv cov lus qhia.

Huab Tais Yes Xus tseem hais tias “Nej txhob cia luag hu nej ua ‘Thawj Tswj’ vim nej tsuas muaj tib tug Thawj Tswj xwb; yog Leej Pleev.”

Huab Tais Yes Xus tsis xav kom peb muab tej txheej txheem neeg tsim los ntawd saib ua qhov loj, ces ua rau yus saib tsis taus lwm tus neeg, qhov Huab Tais Yes Xus xav kom peb ua mas yog ‘kwv tij loj sib luag’, mas peb thiaj yuav tsis saib ib tug loj dua ib tug, peb thiaj yuav txawj sib pab, peb thiaj yuav xav ua sawv daws tus tub txib. Yog muaj neeg hu peb ua ‘Txiv, Xib Hwb, los Thawj Tswj’, mas thov kom peb nco tias qhov ntawd lam yog lub npe xwb, yus yuav tsum saib yus thiab tus hu yus ntawd loj ib yam, yus yuav saib nws yog yus kwv tij, thiab yus tsum tau ua tus piv txwv zoo kom phim lub npe luag hu yus.

Kwv tij Hmoob sawv daws, nyob hauv peb cov ntseeg txog Yes Xus, xav kom peb muab ua tib zoo xav. Muaj tej tus Txiv Plig, Phauj, los Xib Hwb lawv ua zoo li cov Fas Lis Xais; lawv tuav txoj kab xwm Leej Choj, txoj kab xwm tsob hwb tsoom ntseeg, txoj kab xwm qhia Ntuj kev cai, txoj kab xwm tshaj Ntuj Lus; tab sis lawv coj tus yam ntxwv tsis phim lawv txoj kab xwm. Cov ntseeg pom cia ib txhia hais tias kav liam, lawv yog ib tus neeg zoo li peb xwb, peb kawm cov lus lawv qhia tab sis tsis txhob ua li lawwv.

Xav kom peb cov ntseeg hloov dua lub tswv yim tshiab, xav kom cov Leej Choj, cov Phauj, cov Xib Hwb sawv daws hloov dua lub tswv yim tshiab. Sawv daws hais tau, qhia tau, mas sawv daws tsum ua tau. Thov Huab Tais Tswv Ntuj pab hloov kom sawv daws ua tau raws li cov lus sawv daws qhia sawv daws hais. Cov ntseeg pom cov tus tshaj Ntuj Lus ua yuam kev, tsim nyog yuav pab hais qhia kom lawv ras thiab xeev tau. Cov ntseeg pom lawv cov npawg cov phooj ywg ua tej yam yuam kev, lawv kuj yuav sib ntuas.

Huab Tais Yes Xus hais cov lus xaus tias “Tus loj dua cov nyob hauv nej, yuav ua nej tus tub txib.”

Lo lus no yog Huab Tais Yes Xus tab tom qhia peb tias yog peb xav kom lwm tus pom txog peb txiaj ntsim, xav kom lwm tus hwm los qhuas mas peb txhob ua tus neeg muab hlob, taw tes hais kom lwm tus ua raws li peb hais, tab sis peb tsum yog tus nqes tes ua, peb tsum ntaus thawj ua rau sawv daws yoog raws, peb tsum yog tus pib.

Kwv tij Hmoob sawv daws, muaj ib tug phooj ywg hais tias txij thaum pawg ntseeg hauv nws lub zos xaiv nws los ua tus coj mas nws sab kawg li, vim tas ib puas tsav yam los nws tsum yog tus ua. Txawm tias nws sab npaum cas, tsis kav nws zoo siab vim nws xav tias yog nws ua pub rau Tswv Ntuj.

Tus twg xav ua tus loj nyob hauv sawv daws, nws yuav tau ua li tus phooj ywg no hais.

Nyob zoo sawv daws.