Zaj nyeem hnub tim 23 lub 3 hlis 2026
Hnub nco txog Leej Ntshiab Tus Lis Npis Us
Cov lus nyob hauv Zam Ntawv Moo Zoo (Z 8: 12-20)
Kwv tij sawv daws, nyob rau hauv zaj no, peb yuav pom tias, cov Fas Lis Xais xav nrhiav lus hiam Huab Tais Yes Xus thiaj ntes Yes Xus coj mus tua, tab sis, lawv tsis pom qab yuav hiam Yes Xus li cas. Hnub no lawv thiaj txhob txwm ntes ib tug poj niam deev hluas coj los rau Yes Xus txiav txim. Vim lawv xav tias, yog Yes Xus txiav txim tso tus poj niam deev hluas no mus, ces Yes Xus yuav ua txhaum Mais Xes Txoj Cai, ces lawv thiaj yuav nog tau lub txim tuag rau Yes Xus. Hos yog Yes Xus tsis hais kom tso, Yes Xus tseem kom lawv xuas pob zeb txawb tus poj niam ntawd kom tuag, raws li Mais Xes txoj cai, ces zoo yam li Yes Xus rov nqos nws tawb qaub ncaug, nws twb qhia sawv daws kom sib hlub, thiab sib zam, uas cas nws ho yuav kom lawv tua tus poj niam ntawd, thaum ces ntawd tsoom pej xeem yuav tsis mloog Yes Xus ntxiv lawm.
Qhov no ib rooj ntxiab uas cov Fas Lis Xais lawv sib ci qos thiab nrhiav lus hiam kom tau Yes Xus.
Tab sis, Tswv Ntuj lub tswv yim nyob puv hauv Huab Tais Yes Xus, nws tsis raug lawv rooj ntxiab.
Huab Tais Yes Xus hais tias, yog leej twg tsis muaj txhaum kom nws xub ua tus xuas pob zeb txawb tus poj niam deev hluas ntawd ua ntej. Ces tsis muaj leej twg kam txawb ua ntej, vim lawv sawv daws yeej paub zoo tias, tsis muaj leej twg dawb huv tiag, tsis muaj ib tug neeg twg tsis muaj txhaum, tsis muaj leej twg tsis tau ua dua txhaum, vim sawv daws puav leej yog neeg txhaum, li ntawd, cov xub rov mus tsev yog cov laus, vim lawv paub zoo tias, tsis muaj leej twg dawb huv, yim yog cov laus yim muaj txhaum ntau, vim lawv ua lub neej los ntev dua.
Kwv tij sawv daws, peb txhua tus neeg, peb yuav tsum ras ntsoov hauv peb nruab siab tias, peb yog neeg txhaum, vim peb sawv daws yeej txawj ua txhaum, thiab txog hnub kawg peb yuav tau txais peb lub txim txhaum no. yog vim li ntawd Huab Tais Yes Xus thiaj tuaj pab kom peb dim ntawd peb cov txhaum. Huab Tais Yes Xus tib leeg xwb thiaj yuav zam txhaum tau rau peb, yog li no, thov kom peb tsis txhob muab txim rau leej twg, Huab Tais Tswv Ntuj thiaj tsis muab txim rau peb.
Nyob zoo sawv daws.
