ZAJ NYEEM HNUB TIM 13 LUB 12 HLIS 2025
HNUB NCO TXOG LEEJ NTSHIAB LUS XIS AS
COV LUS NYOB HAUV MAS TAIS NTAWV MOO ZOO (MT 17: 9-13)
Kwv tij sawv daws, cov His Xa Lais lawv muaj kev cia siab rau Es Lias, vim nws yog ib tug Yaj Saub loj thiab muaj Tswv Ntuj lub hwj chim nrog nws nyob. Lawv ntseeg tias, ua ntej Leej Pleev yuav nqes los, mas Es Lias yuav tsum xub tuaj ua ntej tso.
Hnub no Zam Ntxuav Plig yog tus Yaj Saub uas Tswv Ntuj xa tuaj ua Yes Xus ntej, nws yog Es Lias tim ob uas xub tuaj npaj kev tos Huab Tais Yes Xus, tiam sis, tsoom His Xas Lais tseem tsis tau ntseeg meej pes tsawg. Li ntawd, hnub no Yes Xus thiaj qhia meej rau cov Thwj Tim tias, Es Lias twb tuaj lawm, tab sis, tsoom pej xeem zeem tsis tau nws. Ces luag yuav ua phem rau nws.
Huab Tais Yes Xus los yeej zoo ib yam li thiab. Nws yog tus vaj Pleev, yog Tswv Ntuj Leej Tub uas xa tuaj cawm qab ntuj neeg, tab sis, neeg kuj zeem tsis tau nws.
Kwv tij sawv daws, hnub no, yog lub caij peb tos Huab Tais, thov kom peb qhib peb lub siab txhua txhia hnub los tos txais Huab Tais Yes Xus tuaj nyob hauv peb, peb yuav nquag teev Ntuj, peb yuav mloog Huab Tais lub suab, mas qhov kawg peb thiaj yuav zeem tau nws.
