ZAJ NYEEM HNUB TIM 4 LUB 3 HLIS 2024
HNUB TSIB LUB LIS PIAM HLA
COV LUS NYOB HAUV LUS KAS NTAWV MOO ZOO (LK 24: 35-48)
Kwv tij Hmoob sawv daws, thaum Huab Tais Yes Xus tawm los rau cov thwj tim pom, Huab Tais Yes Xus hais rau lawv tias “Nej nyob kaj lug”, thiab ntuas lawv tias “Nej yuav ua tim khawv txog kuv kev sawv rov los rau lwm tus, nej qhia lawv kom hloov siab tshiab los ntxub kev txhaum mas Ntuj thiaj yuav zam lawv cov txhaum.”
Kwv tij, qhov ntawd yog lub Moo Zoo peb yuav tau coj mus qhia rau cov neeg tsis tau paub txog Huab Tais Yes Xus, kom lawv to taub mas lawv thiaj yuav hloov siab tshiab tau.
Twb yog Huab Tais Yes Xus paub tias yog nws hais nws xwb mas cov thwj tim tsis ntseeg, ces Huab Tais Yes Xus thiaj kom lawv los tuav nws, kov nws, thiab Huab Tais Yes Xus tseem noj mov li ib tug neeg muaj sia noj thiab, mas cov thwj tim thiaj li ntseeg tias zaum no Huab Tais Yes Xus sawv rov los lawm tiag. Tsis yog dab, tsis yog lawv qhov muag faj pom.
Lawv pom thiab lawv ntseeg mas lawv thiaj muaj lub siab kub lug tshaj txog qhov lawv tau pom thiab ntseeg no rau lwm tus, lawv ua tim khawv txog qhov lawv tau pom, mas ziag no peb cov ntseeg txog Yes Xus thiaj ntseeg ti txhav tias Huab Tais Yes Xus tau sawv rov los tiag, nws tsis yog ib tug ntsuj duab los ib tug dab, los yog xyw, tab sis nws yog tseem neeg thiab yog tseem Tswv Ntuj tiag. Nws yog tus yeej txoj kev tuag, mas peb cov ntseeg txog Yes Xus thiaj vam khom tias muaj ib hnub peb yuav sawv rov los muaj txoj sia tshiab xws li Huab Tais Yes Xus thiab.
Huab Tais Yes Xus hais ntxiv tias “Nej yuav ua tim khawv txog kuv kev sawv rov los rau tas txhua haiv neeg.”
Qhov no, mas niaj hnub no peb thiaj yuav tau tawm mus tshaj Yes Xus lub Moo Zoo rau peb cov kwv tij. Nej mus piav txog Huab Tais Yes Xus rau nej cov swm neeg mog.
