ZAJ NYEEM HNUB TIM 14 LUB 1 HLIS 2025
HNUB PEB THAWJ LUB LIS PIAM, CAIJ NYOB NRUAB XYOO
HN 2: 5-12, MK 1: 21-28
Kwv tij Hmoob zoo nyiam, nej hnov nyob hauv tsab ntawv sau mus rau cov Hes Nplaws sau cov lus ua pov thawj tias txij thaum Tswv Ntuj tso txhua yam zwm rau Leej Tub, thiab hais tias Leej Tub yog tus ntaus thawj ua kom sawv daws ntshiab tuaj.
Hnub no Mas Kos sau nyob hauv nws phau ntawv Moo Zoo, mas kuj yog ib cov lus zeem tseeb tias Huab Tais Yes Xus yog Tswv Ntuj Leej Tub, ces tas txhua yam tsis hais neeg los dab puav leej zwm rau Huab Tais Yes Xus, Huab Tais Yes Xus ua tau kom txhuam yam rov ntshiab thiab huv tuaj.
Mas Kos piav tias thaum Huab Tais Yes Xus qhia tsoom sid nyob hauv lub tsev txoos tas, mas sawv daws qhuas Huab Tais Yes Xus cov lus qhia. Lawv qhuas vim Huab Tais Yes Xus qhia raws li nws lub peev xwm tsis yog qhia xws li cov Kws Ntawv Ntshiab qhia.
Huab Tais Yes Xus qhia raws li neeg lub peev xwm li cas?
Kwv tij, Huab Tais Yes Xus qhia mas nws muab Tswv Ntuj Lo Lus saib ua lub plawv, nws muab nthuav kom sawv daws to taub, nws muab hais ua piv txwv raws li qhov tseeb kom cov mloog xav tawm.
Huab Tais Yes Xus hais tau vim nws ib txwm ua lub neej nyob hauv Tswv Ntuj Lo Lus, ces zoo li Huab Tais Yes Xus rov nthuav nws lub neej ua raws Tswv Ntuj Lo Lus rau sawv daws mloog. Yog li no mas cov neeg tau mloog lawv thiaj nkag siab cov lus qhia zoo.
Cov Kws Ntawv Ntshiab mas lawv tsis zoo li Huab Tais Yes Xus, lawv paub cov lus hauv cov Phau Ntawv tag nrho txhua qib tab sis lawv tsis ua lub neej raws li Tswv Ntuj Lo Lus, lawv ua tsis tau ib tug piv txwv rau sawv daws yoog, ces thaum lawv qhia mas lawv tsuas piav tau daim plhaub sab nraud xwb lawv phua must sis txog lub plawv uas yog lub ntsiab lus, lawv hais tsis tau tej zaj ua piv txwv rau sawv daws xav tswv yim raws.
Yes Xus lub Moo Zoo hnub no thiaj yog ib zag zoo ntuas thiab txhib peb tsoom ntseeg tswj xeeb rau cov tub tshaj Ntuj Lus kom coj mus xav saib:
yuav ua li cas peb thiaj yuav tshaj tau Huab Tais Yes Xus cov lus cawm ntiaj teb neeg rau sawv daws to taub thiab nkag siab, yuav qhia tsoom ntseeg sawv daws tau li cas tias txoj kev ntseeg yog zoo li cas tiag!
Kwv tij Hmoob, nyob hauv lub tsev txoos, muaj ib tug neeg raug ib tug dab tsis huv, nws nthe tias nws paub Huab Tais Yes Xus tab sis Huab Tais Yes Xus txwv nws kom ua twj ywm.
Ua cas Huab Tais Yes Xus thiaj tsis pub tus dab tsis huv hais lus txog Huab Tais Yes Xus?
Raws li muab xav mas pom tias dab tsis huv tsis nyob Tswv Ntuj tog, nws tsis nyiam Tswv Ntuj, nws tiv Tswv Ntuj, yog li thiaj tsis yog cov dab tej kab xwm yuav mus tshaj txog Tswv Ntuj rau neeg paub. Cov dab mas lawv tsuas muab Tswv Ntuj los hais kom tau ntxias neeg yuam kev xwb.
Nyob hauv peb lub neej mas muaj ntau zaus peb yeej pom tej tus neeg hais tias lawv mas paub txoj kev ntseeg zoo, lawv twb pom kiag Tswv Ntuj, twb tau nrog Huab Tais Yes Xus hais lus lawm; kom peb ntseeg lawv. Cov li no mas peb yuav tau ceev faj.
Huab Tais Yes Xus tsuas pub cov thwj tim ‘raws’ Huab Tais Yes Xus xwb ua cov tshaj txog Huab Tais Yes Xus yog tus Cawm Seej rau lwm tus.
Li ntawd, tus yuav tshaj txog Huab Tais Yes Xus kev cawm neeg tau zoo mas nws yuav yog tus ‘nyiam’ Huab Tais Yes Xus tas siab tas ntsws, ‘paub’ Huab Tais Yes Xus zoo, ‘ntseeg txog’ Huab Tais Yes Xus tiag tiag; mas nws thiaj yuav tshaj tau Huab Tais Yes Xus rau lwm tus to taub tau zoo.
Yog peb nyiam, ntseeg, thiab tso siab rau tus twg, mas peb yuav hais txog nws ntev npaum cas los peb yeej muaj lus hais. Yog peb ntseeg txog tus twg, mas peb yim hais luag tej yim nyiam mloog. Lawv pom peb lub siab ntseeg ces lawv kuj yuav muaj lub siab ntseeg xws li peb lub. Peb yim tshaj txog tus neeg peb nyiam, ntseeg thiab tso siab rau; mas peb lub siab ntseeg txog nws yim loj tuaj.
