Tus Txiv Plig laus neeg Pas Kis Taas tsuj xeeb nws lub hnub nyoog txwm 90 xyoo, thiab npaj ua hmoov tsuj xeeb txwm 65 xyoos ntawm nws kev ua Txiv Plig.

Hnub tim 20 lub 8 hli no tus Txiv Plig laus hu ua Mendes nyob hauv lub Cheeb Koom Txoos Faisalabad tau tsuj xeeb nws lub hnub nyoog txwm 90 xyoo. Muaj cov thawj coj ntawm lub Koom Txoos, cov Txiv Plig, cov Leej Phauj thiab cov neeg ntseeg tuaj ua kev zoo siab txog qhov nws tau ua Txiv Plig thiab kev ua hauj lwm txhim kho lub neej thiab kev ncaj ncees hauv zej zog los 60 tawm xyoo. Kev tsuj xeeb pib nyob hauv lub thaj txi Ntuj ua Tswv Ntuj tsaug, nyob hauv lub tuam tsev teev Ntuj Faisalabad. Muaj Tswv Qhia Indrias Rehmat ua tus coj lub Txoos. Tswv Qhia hais tias :

“Txiv Plig Mendes cov hauj lwm, yog lub Koom Txoos qhov paj tshab thiab qhuas txog nws kev ua hauj lwm rau cov neeg ntseeg thiab zej zog.”

Dhau ntawd muaj kev noj haus nyob hauv cov Tswv Qhia lub tsev. Tswv Qhia Coutts thiab tus thawj coj lub Koom Txoos, cov Txiv Plig, cov Leej Phauj thiab cov neeg ntseeg tau hawm tus Txiv Plig laus. Lawv qhuas txog Txiv Plig Mendes kev ua neeg me, kev ua raws txoj cai thiab kev ua tub txib tas nws sim neej. Yog lub zog txhawb siab rau cov Kav Tos Liv ntau txheej neeg nyob Pas Kis Taas teb.

Txiv Plig Mendes yug nyob Karachi xyoo 1936, thiab tau txais lub Cim Tiag Tes ua Txiv Plig hnub tim 7 lub 1 hlis xyoo 1962. Tas 60 tawm xyoo, nws tau ua txoj hauj lwm tshaj lub Moo Zoo, txhim kho tib neeg, tsim kev thaj yeeb thiab kev ncaj nces hauv cov zej zog nyob Pas Kis Taas teb thiab nyob thoob As Xias teb. Nws cov hauj lwm yog saib xyuas kev kawm ntawv, kev txhawb nqa cov poj niam thiab txhim kho cov tub ntxhais hluas. Nws tseem txhim tsa 8 lub tsev rau cov yim neeg ntseeg nyob, uas siv lub npe tias : “Bonie Abad los yog nroog Bonnie”. Uas tau txais kev txhim kho los ua meej mom rau nws. Dhau ntawm Pas Kis Taas teb lawm, Txiv Plig Mandes tseem tau ua tus lwm thawj tswj ntawm cov Tswv Qhia As Xias lub pwm tsav txhim kho neeg lub meej mom 2 zaug. Thiab nws raug xaiv ua tus tuav xam ntawm Caritas Asia 2 zaug. Tab txawm nws muaj 90 xyoos lawm, tsis kav Txiv Plig Mandes kuj tshuav ib yam tseem ceeb tseem yuav ua ntxiv. Qhov ntawd yog hnub tsuj xeeb txwm 65 xyoos ntawm nws kev ua Txiv Plig rau lub 1 hlis 2027 tom ntej no. Kev tsuj xeeb nws lub hnub nyoog xaus rau lub Txoos teev Ntuj, hu nkauj cav txog Tswv Ntuj thiab txiav qab zib noj ua ke. Muaj Tswv Qhia Coutts, Tswv Qhia Rehmat thiab cov Txiv Plig tuaj koom.