Lub Koom Txoos nyob Nyab Laj teb, ntsib kev sib cav sib ceg hais txog kev ua Tswv Ntuj tub txib.
Lub Koom Txoos nyob Nyab Laj teb, ntsib kev sib cav sib ceg hais txog kev ua Tswv Ntuj tub txib.
Cov Koom Txoos zej zog muaj neeg ua hauj lwm coob dhau, tab sis tsis muaj tub tshaj Ntuj Lus. Lub sij hawm uas kev ua Tswv Ntuj tub txib ntawm lub Koom Txoos nyob thoob ntiaj teb tab tom tsawg zuj zus, mas lub Koom Txoos nyob Nyab Laj teb ntsib tej yam txawv. Qhov ntawd yog yuav hloov cov Txiv Plig coob leej mus ua tub tshaj Ntuj Lus tseeb tiag, zoo dua qhov cia ua Txiv Plig nyob hauv tsev teev Ntuj.
Lub 1 hlis tag los, lub Koom Txoos Kav Tos Liv nyob Nyab Laj teb tau tos txais cov ua tus pab Txiv Plig 76 leej, uas xav tias lawv yuav tau txais lub Cim Tiag Tes ua Leej Choj ib xyoos tom ntej no. Lawv yog tuaj ntawm 5 lub Cheeb Koom Txoos thiab ib lub Koom Haum Txiv Plig hauv tag nrho 27 lub Cheeb Koom Txoos, thiab 83 lub Koom Haum Txiv Plig hauv lub teb chaws tuaj. Nyab Laj teb kheev kheev raug hais tias yog ‘lub pob tawb hauv kev hu kom ua Tswv Ntuj tub txib’ ntawm lub Koom Txoos As Xias. Vim muaj cov tsev kawm npaj ua Txiv Plig thiab cov Koom Haum Txiv Plig 11 lub uas niaj xyoo lawv tsa ntau pua tus Txiv Plig. Muab xam ua ke lawm cov Txiv Plig yog 6,000 leej. Cov Leej Phauj thiab Leej Tij muaj 31,000 leej, uas lawv ua hauj lwm rau cov neeg ntseeg 7 plhom leej nyob hauv lub teb chaws ntawd. Tsis yog kev zoo siab xwb, nws tseem yog kev txaus siab thiab. Tab sis tom qab ntawm tus zauv txaus poob siab no, nws muaj lus sib cav sib ceg uas ntxhov siab kawg. Qhov ntawd yog muaj cov Txiv Plig ua tej kab ke coob dhau, tab sis tsis muaj cov tub tshaj Ntuj Lus uas yuav mus tshaj Ntuj Lus hauv tej chaw nyob nrug deb. Nyob nruab nrab hauv Nyab Laj teb, yog qhov xwm yeem uas kheev kheev pom 2 tug los 3 tug Txiv Plig nyob hauv tib lub tsev teev Ntuj hauv tej chaw nyab xeeb. Cov Txiv Plig yog hais txog kev ua hauj lwm, ua tej kab ke hauv tsev teev Ntuj, ua tej lub hmoov loj thiab saib kev txhim kho cov tsev teev Ntuj. Sim muab piv rau tej toj siab hauv nruab nrab teb thiab nyob xib fab pej seb ! Cov neeg ntseeg uas lawv yog cov haiv neeg tsawg, lawv tos tsheej lub hlis thiaj mam tau koom thaj txi Ntuj ib zaug. Cov Txiv Plig hauv nroog yuav tsum siv sij hawm mus kev ntau pua kis los mev, hauv tej kev ua qhov taub qhov av kom lawv tau mus txog tej lub tsev teev Ntuj me me vov nqeeb. Kev nyob sib nrug thiab tsis sib luag no, ua kom pom txog teeb meem ntawm tus kheej tob dua ntawd. Ib tug Txiv Plig laus hais tias : “Cov Txiv Plig hluas feem coob yog tuaj ntawm tej tsev neeg me me hauv txheej tshiab, uas lawv loj hlob hauv kev tau zoo nyob tau zoo noj thiab tsis tau ntsib dua kev txom nyem. Ces lawv yuav tsum tiv kev ua lub neej nyob hauv txhua yam nyuab. Hais txog lawv, mas kev xa lawv mus nyob tej qhov chaw nrug deb, kheev kheev xav tias tsis yog koob hmoov. Tab sis yog zoo li ntiab lawv los yog rau txim rau lawv.” Hwm Nyab Laj tej kab ke uas muaj rau cov Txiv Plig hauv ‘thay ca’, txhais tias tus xib hwb loj. Nws yim ua rau cov teeb meem no ntxhov tuaj. Ntawm cov kab lis kev cai no, txhawb mus rau lub hwj chim thiab lub meej mom ntau dua kev ua tub txib hauv kev txo hwj chim ua neeg me. Qhov tau los yog kev xav zoo li nyob hauv tsev, yog xaiv kev nyab xeeb hauv tsev teev Ntuj ntau dua cov hauj lwm tshaj Ntuj Lus uas tsis meej tseeb. Lub ntsiab tseeb tiag ntawm Txiv Plig, tsis yog ua cov kab ke hauv kev ntseeg xwb, tab sis yog kev ua tub tshaj Ntuj Lus. Yes Xus tsis tau txib nws cov Thwj Tim kom nyob hauv tsev teev Ntuj thiab saib nyiaj txiag, nws hais rau lawv tias :
“Nej mus lub qab ntuj thiab nej tshaj lub Moo Zoo rau txhua leej txhua tus.”
Zim txwv no nyob Nyab Laj teb, yog qhov tseeb thiab txaus tu siab uas tsis muaj kev tshwm nyob hauv cov tsis yog neeg ntseeg. Cov Txiv Plig ua hauj lwm ntau rau cov txais kev ntseeg lawm xwb, hos kev sib txuas nrog zej zog kom dav tuaj muaj tsawg kawg. Kev ntseeg Kav Tos Liv uas saib tus kheej zoo li no, tsis tau npaj txhij yuav ntsib tej teeb meem tshiab hauv Nyab Laj cov zej zog. Xws li cov tub ntxhais hluas uas to hau ntsoov rau kev ua hauj lwm hnyav, kev ntseeg tsuag thiab teeb meem hauv zej zog uas yog sib nrauj thiab quav yeeb quav tshuaj. Kev kub ntxhov no tseem yog teeb meem ntawm lub hauv paus. Coob leej Txiv Plig uas xav tawm mus rau cov zej zog pluag txom nyem, tsis kav nws pom tias nws raug teeb nyob hauv lub Cheeb Koom Txoos txoj cai. Ces tsis muaj kev xa tawm mus thiab nyiaj txiag txhawb nqa kuj muaj tsis txaus. Txoj cai uas twb muaj lawm, nws tsis yooj yim txaus qhov lub Koom Txoos yuav tawm rooj tau tiag tiag. Kom tau txuag txhob pub tus zaus no rais ua ‘tus zauv tsis muaj ntsuj plig’, lub Koom Txoos zej zog tsim nyog yuav muaj kev qhuab qhia hais txog kev ntseeg 10 xyoo kom ruaj khov. Nws tseem yog taw mus rau kev txawj ntse thiab kev ntseeg, tab sis ntau zaus piam sij hauv kev kho ‘lub siab hauv kev tshaj Ntuj lub Moo Zoo. Tej zaum cov tub kawm yuav kawm tau zoo, tab sis lawv tsis tau ua dua lub neej nyob xyaw cov neeg pluag txom nyem, los yog kawm kom paub txog cov neeg pluag txoj kev txom nyem. Ces lawv yuav tsis muaj pab yaj tus ntxhiab, uas Vaj Qhia Fas Ntshis Kus thov kom saib kev tshaj lub Moo Zoo ua qhov tseem ceeb. Kev sib xyaws nrog tej kab lis kev cai thiab kev sib tham ntawm cov kev teev hawm tsawg dhau. Kev xyaum hauj lwm fab kev ntseeg kheev kheev ua nyob hauv cov tsev teev Ntuj loj thiab swm. Kom cov qhia kev ntseeg tau ntsib cov neeg ntseeg yooj yim dua kev raug xa tawm mus qhia nyob hauv tej tsev tshav puam, los tej qhov chaw txoj kev ntseeg raug sim thiab tsis ntseeg txog Tswv Ntuj.
Hauv txheej neeg Digital ‘qhov chaw sab nraud’ yog qhov chaw zoo li qhov chaw tiag. Cov kawm kev ntseeg tsim nyog yuav tau txais kev qhuab qhia nyob Online hauv kev tshaj lub Moo Zoo. Lawv yuav tsum xyaum ua lub neej hauv ‘cov tub tshaj Ntuj Lus ntawm kev cia siab.’ Kawm kom paub txog txhua xeem lus thiab muaj feem cuam txog zej zog cov hauj lwm, kom tau ua kev nkag siab txog cov neeg lawv pab qhov mob. Cov Tswv Qhia Nyab Laj tau muab xyoo 2026, ua xyoo ‘cov neeg ntseeg txhua tus yog thwj tim tub tshaj Ntuj Lus.’ Nov yog lub zoo caij uas cov Txiv Plig yuav lees txais kev pauv ntxeev no mus ua tub tshaj Ntuj Lus.
Qhov yuav hloov pauv kom fab ntsuj plig kev ua tub tshaj Ntuj Lus, rais ua qhov tseem ceeb ntawm cov Txiv Plig, mas cov Txiv Plig yuav tsum yog cov raug xa tawm mus, tsis yog ua cov raug khaws tseg. Txhua lub Cheeb Koom Txoos npaj yuav muab rau, tsis yog tias pub rau qiv. Kom cov Txiv Plig tau mus txog cov thaj tsam xav tau kev pab hauv lub teb chaws los yog lwm teb chaws. Xws li Moos Nkos Lias teb, Los Tsuas teb thiab Khas Phus Chas teb. Cov Txiv Plig nyob hauv nroog yuav tsum muaj lub siab hauv kev ua tub tshaj Ntuj Lus, kom tau mus txog cov neeg tsis kam tuaj tsev teev Ntuj thiab muaj feem cuam txog txhua fab. Xws li kev kawm, kab lis kev cai thiab kev sib xa xov. Yog tias lub Koom Txoos vam txog cov Txiv Plig xwb, mas lub Koom Txoos yuav tsis muaj tub tshaj Ntuj Lus. Txiv Plig yuav rais ua tus qhuab qhia uas txhawb lub zog rau cov neeg ntseeg, kom lawv ua pov thawj nyob hauv lawv lub neej niaj hnub. Lub Koom Txoos muaj sia tsis yog yuav ntsuas los ntawm lub tswb qhov siab, thiab cov Txiv Plig coob los tsawg. Tab sis yog ntsuas los ntawm cov ua hauj lwm rau lub Koom Txoos, uas txaus siab yuav mus kom txog cov neeg nyob hauv qhov tsaus ntuj. Tus sau qoob loo tseeb tiag, tsis yog tus nyob nyab xeeb hauv lub txhab nplej. Tab sis yog tus yuav tiv khaub lig cua, kom tau ua hauj lwm nyob hauv nws thaj liaj. Thaum ‘lub pob tawb ntawm lub suab hu’ nyob As Xias teb tsim tau cov tub tshaj Ntuj Lus tseeb tiag, tsis yog tias ua tus saib xyuas kev ntseeg xwb, lub Koom Txoos kuj yuav rais ua lub Koom Txoos ntawm cov tub tshaj Ntuj Lus tiag tiag.
