Desai Linggi, leej niam uas raug tso tseg.
Desai Linggi muaj 47 xyoo. Nws rais ua qhov pom kev hauv kev nyiam kev hlub, xws li Yes Xus muaj rau cov me nyuam raug tso pov tseg thiab cov tsis muaj vaj tse nyob hauv lub xeev Arunachal Pradesh, nyob Is Ntias teb.
Nws txoj kev mus kev muaj kev sim tus kheej thiab kev ntseeg nyob puv nkaus. Ua kom pom txog lub suab hu hauv ntawv Moo Zoo, kom peb saib xyuas cov neeg txom nyem tshaj plaws nyob hauv peb.
Kev pom dej siab ntawm Linggi uas muaj rau cov neeg raug hnov qab ntawd, yog tshwm sim los ntawm nws tej kev txom nyem yav tag. Nws yug nyob hauv tsev neeg sib tawg thiab nws tsis tau txais kev sov siab hauv tsev neeg li. Tab txawm nws niam ntsib teeb meem nyiaj txiag, tsis kav nws kuj xaiv nrog nws txiv nyob. Vim nws txiv tiv kev txom nyem tu nws thaum nws muaj 6 xyoo los. Txawm li cas kuj xij, kev yuav niam tshiab ntawm nws txiv, ua rau nws poob nyob hauv yim neeg sib tawg. Yog lub zog txhawb kom nws xav tsim ib lub tsev ruaj khov thiab muaj kev nyiam kev hlub nrog tej me nyuam uas raug kev txom nyem ib yam li nws. Kev tsis ruaj khov hauv nws lub neej, ua rau nws plam kev kawm. Tab sis Tswv Ntuj muaj lub hom phiaj zoo kawg rau nws. Vim kev muab siab rau xav tsim kev ruaj khov thiab kev nyiam kev hlub uas nws tsis tau txais pub rau cov me nyuam uas txom nyem, Linggi thiaj nrhiav pom nws txoj kev. Nws ua tus saib xyuas cov me nyuam nyob hauv lub tsev kawm ntawv thiab tau pom txog cov me nyuam txoj kev ntshaw uas tsis muaj tus saib xyuas. Tej no ua kom nws txoj hauj lwm pauv ntxeev lawv lub neej.
Xyoo 2000, vim cov me nyuam lawv tej kev txom nyem, nws thiaj xuas nyiaj ntiav ib qho av kom tau tsim lub tsev Nani Maria. Nws tau txais kev txhawb nqa los ntawm cov neeg siab zoo, ces nws txoj hauj lwm meej tseeb tuaj. Ntawd yog txhim ib lub tsev uas cov me nyuam saib tias yog kev hlub, kev txuag thiab muaj nuj nqis zoo li lawv tau koom nrog Tswv Ntuj. Kev pib tej yam me me li no, nws cov hauj lwm thiab ri mus hauv xyoo 2002. Nws tsim ib lub tsev qhia cov me nyuam yaus hu ua Nani Maria, uas tsheej ua ib lub tsev kawm ntawv nyob hauv xyoo 2006.
Xyoo 2015, nws tau muab cov hauj lwm tso kom raug cai uas yog nce npe ua “lub tsev tu cov me nyuam Nani Maria”, uas muaj cov tseem hwv lees paub. Thiab yog qhov chaw txais cov me nyuam saws nyob hauv xyoo 2029. Xyoo 2010, nws tau qhib lub tsev tiav log ua qhov chaw tos txais cov neeg raug quab yuam thiab cov raug tso tseg. Kom tau ua qhov chaw kho thiab muab lub meej mom rov rau lawv.
Linggi hais tias : “Peb saib xyuas cov me nyuam uas raug niam txiv tso pov tseg, cov me nyuam ntxhais uas dim ntawm kev raug tsim txom, cov me nyuam raug cawm los ntawm kev quab yuam siv dag zog thiab cov me nyuam uas tuaj ntawm cov tsev neeg quav yeeb quav tshuaj thiab cov raug ntaus tuaj.”
Cov tub ceev xwm los cov pej xeem kheev kheev coj cov me nyuam zoo li no tuaj rau nws. Tab sis ntawm Linggi, mas lawv muaj nqis tshaj tej lus kom, lawv yog zoo li nws cov me nyuam. Nws hais tawm hauv tus ua niam lub siab tuaj tias : “Kuv saib xyuas lawv nyob hauv kev kawm, hauv kev tawm tsam thiab mus txog thaum lawv yuav txiv los yuav poj niam.” Nws cov hauj lwm tau hloov lawv lub neej los suav tsis txheeb. Muaj ib tug ntxhais hluas nkauj uas loj hlob nyob hauv nws txoj kev saib xyuas, tam sim no tus ntxhais ntawd ua hauj lwm nyob hauv Nina Maria. Nws tau txais nyiaj ib lub hlis yog 114 US dos las, los yog 9,999 Rupee Is Ntias.
Muaj ib tug me nyuam tub uas nws raug niam qhuav txiv qhuav tso pov tseg thaum tseem yau. Tam sim no nws tab tom kawm ntawv nyob hauv lub tsev kawm txheej siab. Qhia kom pom tias kev nyiam kev hlub thiab kev ntseeg yeej kev txom nyem.
Nws cov hauj lwm tau txais koob hmoov los ntawm coob leej neeg uas muaj lub siab dawb siab zoo, tsis hais leej tib neeg los sis lwm cov Koom Haum. Lawv tau tawm los txhawb nqa nws cov hauj lwm. Lub Koom Haum roj a nyob Is Ntias teb tau pab tsim ib lub tshav rau cov me nyuam ua si, pub ib lub tsheb bus thiab pub ntau yam twj paj nruag. Lub Koom Haum Smile tau pab nyiaj txhim ib kem tsev cia tshawb fawb yam cheem tsum, uas yuav pab hloov cov me nyuam lub neej.
Tseem hwv Is Ntias kuj pab ib leeg 34 dos las rau cov me nyuam txom nyem. Yog qhov pab tau lawv lub neej nyob hauv niaj hnub, tab txawm tias qee zaus tsis txaus kuj xij. Txawm tias yuav ntsib teeb meem fab nyiaj txiag, tsis kav Linggi tseem khov kho. “Tswv Ntuj npaj tseg lawm.” Nws ntseeg tias “tib neeg yuav tuaj pab thiab ntseeg tias Tswv Ntuj yuav ua tus coj txoj hauj lwm no ntxiv mus.”
Nws lub neej yog qhia txog lub zog ntawm kev ntseeg thiab kev ua tub txib, los ntawm lub zog txhawb siab hauv Yes Xus lo lus hais tias : “Nej tau ua npaum li cas rau cov me tshaj hauv kuv tsoom kwv, mas yog nej ua rau kuv.”
Linggi thiaj muab nws txoj kev txom nyem los hloov ua qhov chaw cuab zog, muab kev nyiam kev hlub thiab kev ruaj khov rau tus neeg uas xav tau. Nws txoj kev mus kev yog qhov qhia lub siab ntawm cov neeg Kav Tos Liv nyob As Xias tias : “Hauv kev ua hauj lwm rau cov neeg raug tso pov tseg thiab sib tawg, mas peb tau ntsib Yes Xus.” Thov kom zaj hais txog Linggi no ua lub zog txhawb siab rau coob leej, kom lawv cev tes thiab qhib lawv lub siab rau cov neeg tsis muaj zog, thiab ua lub neej raws lub Moo Zoo nyob hauv kev nqis tes ua
