Yam koj tsis muaj, koj muab tsis tau. (You can't give what you don't have
Hnub no kuv xav nrog koj tham hais txog phab ntsa thiab choj. Kuv xav tias zim txwv no sawv daws saib phab ntsa thiab choj yog qhov yooj yim thiab tsis ncaj. Phab ntsa tsis zoo, vim nws thaiv thiab kem tib neeg. Cov phab ntsa no nws muab hlob. Kev xov phab ntsa txhais tias yog kev caij tsuj haiv neeg. Choj yog yam zoo, vim choj tuam rau peb thiab lwm tus neeg, kom tau mus los sib cuag. Choj txhais tias peb sawv daws nyob ua ke. Kuv tsis nyiam phab ntsa, kuv nyiam choj. Qhov kuv hais no tsis yog ib sab phab ntsa los yog ib tug choj, tab sis nws yog hais txog lub neej ua neeg ntseeg hauv lub Koom Txoos. Vim kuv xav tias koj yuav tsum muaj phab ntsa thiab muaj choj nyob hauv koj lub neej ua neeg ntseeg xwb.
Tam sim no peb tab tom hais txog dab tsi ? Thawj zaj nyeem yog nyob hauv phau ntawv Nes Hes Mis uas yog ntawv Cog Lus Qub. Phau ntawv Nes Hes Mis peb tsis tshua muab los nyeem nyob hauv tej kab ke, thiab nws nrog phau ntawv Es Nras sib txuas ua ke. Nov yog ntu tseem ceeb kawg nyob hauv kev nthuav tawm ntawv Cog Lus Qub. Peb tab tom hais txog ntu sij hawm hauv His Xas Lais liv xwm. Thaum cov His Xas Lais raug ntiab tawm mus nyob txim nyob Npas Npis Los lawv pib rov qab los, lawv rov los rau lawv tej qub chaw. Feem coob lawv tsis tau hnov dua thiab tsis paub txog Yes Lus Xas Les, tab sis muaj qee leej cov neeg laus kuj tau hnov dua lawm. Thaum lawv rov los txog lawv pom tias lub tuam ceeb uas yav tag los ci ntsa thiab vam meej raug rhuav thiab raug hlawv tas nyob hauv lub caij lawv mus nyob txim nyob Npas Npis Los teb. Thaum lawv rov los koj yuav pom tau nyob hauv tej ntawv ntau caum xyoo cov liv xwm, ces koj yuav paub txog tsoom pej xeem His Xas Lais txoj kev txom nyem thiab kev mob siab. Koj sim xav tias : yog zoo li lub tuam ceeb Pas Lis raug tua puas ntsoog thiab piam sij tas, 70 xyoo tom qab cov neeg Pas Lis uas laus lawm, lawv rov los pom tej tuam tsev hauv lub tuam ceeb puas ntsoog tas, lawv xav li cas ?
70 xyoo tom qab cov neeg Los Mas rov los, lawv pom lub tuam ceeb Los Mas piam sij tas, lawv xav li cas ? Qhov ntawd ua rau koj pom txog cov His Xas Lais tej kev ntxhov siab kev mob siab thaum lawv pom lub tuam ceeb puas ntsoog tas.
Li ntawd, nyob hauv thawj yam uas Nes Hes Mis ua yog txhim tej sab phab ntsa tshiab xov lub nroog. Txheej thaud mas lawv txhim phab ntsa zeb xov lub nroog. Hauv lub nroog yuav kaw tej hom tsiaj nyob hauv thiab yuav kem tej hom tsiaj tawm mus sab nroog nraud. Qhov ntawd txhais tias lub nroog tiv thaiv lawv. Yog tias muaj yeeb ncuab tsoo phab ntsa nroog thiab tho nkag mus tau, mas lub nroog ntawd kawg poob rau cov yeeb ncuab tes. Nes Hes Mis thiaj hais tias : “Yog tias peb rov mus thiab rov txhim Yes Lus Xas Les kom sawv ua lub tuam ceeb, mas thawj yam peb yuav ua yog txhim phab ntsa zeb tshiab.” Ces tas tsoom pej xeem pib ua cov hauj lwm txhim phab ntsa zeb. Tab sis tseem muaj ntau yam uas lawv yuav ua thiab. Vim phab ntsa zeb tsuas yog tus ciam xov lub nroog xwb. Yog tias koj yog ib tug His Xas Lais, koj raug ntiab tawm, koj ncaim ntawm koj lub teb chaws mus, koj lub tuam ceeb poob nyob rau lwm qhov chaw, koj nyob hauv cov neeg txawv thiab tej kab lis kev cai txawv, ces koj yuav xav ntau. Koj yug me nyuam thiab koj tej me nyuam yug tej xeeb ntxwv ib tiam dhau ib tiam, koj cov xeeb ntxwv lawv puas paub txog His Xas Lais teb lawm ? Tej zaum lawv tsuas tau hnov piav tias His Xas Lais teb yog lawv lub teb chaws thiab muaj qee leej thiaj tseem nco tau cov xwm txheej nyob His Xas Lais teb xwb.
Tsis ntev los no kuv nco txog zaj no hauv lub caij thaum kuv tab tom kaw cov lus no. Kuv nyob ntawm ib co tuam tsev nyob Tses Kos teb ob peb lub lis piam tag los. Tej vaj tse thiab tej tuam tsev hauv lub nroog zoo nkauj kawg thiab txhua yam puav leej nyob txhij. Tab sis cov neeg nyob hauv yuav luag txhua leej pom tias : vim kev ntseeg Kav Tos Liv loj hlob, ces thiaj ua rau tej tuam tsev zoo nkauj hauv lub nroog raug rhuav piam sij tas. Vim li cas thiaj zoo li ntawd ? Vim cov koom tshaj nkag tuaj thiab rhuav tshem kev ntseeg, ces thiaj zoo li ntawd ib tiam dhau tiam tiam los txog zim txwv no. Tam sim no tej pog tej yawg thiab cov hluas txheej tshiab tsis muaj kev ntseeg hlo li lawm. Zoo li koj tuaj yeem rhuav tshem tej kab lis kev cai thiab kev ntseeg yooj yim kawg nyob hauv ob peb tiam neeg xwb.
Li ntawd, Nes Hes Mis thiaj nkag siab thiab nws hais tias nws yuav txhim phab ntsa xov lub nroog dua tshiab. Es Nras kuj nkag siab thiab, vim nws yog yaj saub. Nws hais tias nws yuav rov txhim lawv dua tshiab nyob hauv fab ntsuj plig thiab hauv kev ntseeg. Kuv yuav rov muab lawv tus ntsuj plig rau lawv. Yog koj xav thiab hais li no, mas tus phab ntsa fab ntsuj plig hauv cov His Xas Lais kuj yuav raug rhuav tib yam.
Thov caw peb los mloog ua ke. Tus yaj sau Es Nras nqa kauj ntawv tuaj tso nyob ntawm ib tsoom neeg xub ntiag. Nyob ntawd muaj cov poj niam txiv neej thiab cov me nyuam yaus. Es Nras xav kom cov me nyuam yaus tau hnov txog tej ntawd. Es Nras sawv nyob ntawm qhov pom kev thiab nws nyeem kauj ntawv uas yog Ntawv Ntshiab Torah. Yog kauj ntawv tseem ceeb ntawm cov His Xas Lais. Es Nras nyeem txij sawv ntxov mus txog tav su nyob ntawm ib tsoom neeg xub ntiag, thiab nws nthuav kauj ntawv rau sawv daws saib. Koj sim xav seb Es Nras nyeem kauj ntawd ntev cuag ntawd txij sawv ntxov mus txog tav su. Lawv tau hnov zaj hais txog His Xas Lais, ces lawv tu siab lawv quaj. Yog vim li cas lawv thiaj quaj ? Vim lawv rov xav txog tias lawv yog leej twg ? Lawv tab tom rov nrhiav pom lawv tus ntsuj plig dua.
Phab ntsa ntawm tus ntsuj plig raug rhuav. Koj sim xav seb tawv nqaij yog yam qhwv cov ntshav, yog tias daim tawv nqaij lwj los to lawm, cov ntshav kawg tuag xwb. Qhov no yog qhov uas Es Nras thiab Nes Hes Mis ntsia pom. Ntawd yog daim tawv uas vov tus ntsuj plig. Vim li ntawd, lawv thiaj xav txhim dua phab ntsa tshiab. Peb twb tau hais nyob hauv qhov pib lawm tias : phab ntsa tsis zoo, tab sis choj zoo yog qhov peb xav tias tsis muaj qab hau. Choj yog qhov zoo, vim nws coj koj mus txog sab tid. Thiab phab ntsa kuj yog qhov zoo, vim phab ntsa ua kom koj paub tias koj yog leej twg. Peb cov Kav Tos Liv yog leej twg ? Txoj cai, kab lis kev cai, kev ntseeg, kev xav los yog kev ua ncaj ncees ua kom peb paub tias peb yog leej twg.
Yog peb ib yam dab tsi ploj mus lawm, peb kuj zoo li cov His Xas Lais uas lawv rov los hauv Yes Lus Xas Les. Li ntawd, yog phab ntsa vau lawm, peb kuj xav rov txhim dua tshiab. Tam sim no peb los saib nyob hauv ntawv Moo Zoo thiab peb xav txog Es Nras thiab Nes Hes Mis. Nyob hauv Lus Kas ntawv Moo Zoo hais txog Yes Xus rov los ntawm nws lub qub zos. Yes Xus mus hauv lub tsev Txoos hnub Xas Npas Tos. Yes Xus kuj tau txais kauj ntawv ntawd thiab nws nthuav tawm los. Nws pib nyeem nyob hauv tus yaj saub His Xais. “Tswv Ntuj tus plig nyob siab dua kuv. Tswv Ntuj pleev kuv kom mus tshaj lub Moo Zoo rau cov neeg pluag. Tswv Ntuj xa kuv mus tshaj kev thaj yeeb rau cov neeg nyob txim. Yes Xus nyeem kauj ntawv tas thiab nws rov muab cev rau lawv, nws zaum. Tas cov neeg nyob hauv lub tsev Txoos ntsia ntsoov nws.”
Cov His Xas Lais raug hu kom tawm mus tshaj lub Moo Zoo rau ntiaj teb paub. Lub hom phiaj ntawm cov His Xas Lais tsis yog nkaum nyob tom qab ntawm sab phab ntsa xwb. Tom qab Vas Tis Kas Ob lub Koom Txoos tsa los kom tau ua kom tas ntiaj teb yog neeg ntseeg. Coj Yes Xus qhov pom kev mus rau ib tsoom neeg nyob thoob ntiaj teb. Tab sis koj tsis tuaj yeem ua tau, vim koj tsis paub tias koj yog leej twg ?
Kuv tiv phab ntsa, kuv nyiam choj, txhais tias kuv yuam kev. Koj yuav txhawb nqa phab ntsa thiab choj huv si, txhob xav tias choj tsis muaj qab hau thiab phab ntsa yog qhov tiv thaiv koj. Koj yuav paub tias dab tsi yog qhov tsim nyog. Yuav xav txog Es Nras thiab Nes Hes Mis nyob hauv His Xas Lais cov liv xwm, lawv paub tias qhov tsim nyog yog phab ntsa. Choj thiab phab ntsa yog lub Cim uas peb hais txog nyob hauv hnub no. Lub Moo Zoo thiab tam sim no yog lub Moo Zoo uas tshaj mus lawm. Peb yuav txuag qhov zoo ntawm phab ntsa thiab choj, vim qhov ntawd yog qhov tsim nyog.
Kwv tij Hmoob sawv daws ! Hnub no peb tham los xaus li no xwb. Thov peb tus Huab Tais Yes Xus Pleev lub txiaj ntsim nrog nej nyob. Lwm zaus peb mam rov sib ntsib dua ! Nej sawv daws nyob zoo !
