Cov tub rog Mias Mas cheb ntxuav lub tsev ntxias dag, lawv ntes tau 350 tus neeg, tab sis tus thawj coj khiav dim lawm
Cov tub rog thiab cov neeg tuav riam phom BGF uas txhawb nqa tseem hwv, tau mus tshawb lub tuam tsev Shwe Kokko. Ntawv xov xwm zej zog tshaj tias ; GBF xub coj tus thawj coj khiav tawm ua ntej yuav nkag mus tshawb lawm. Thiab cov neeg ua hauj lwm ntau txhiab leej tau khiav tawm tom qab hnov tias yuav muaj neeg mus tshawb.
Washington thiab Pej Ceeb tau pib cov hauj lwm no ua ke, kom tau tiv cov hauj lwm txhawb nqa peev nyiaj txiag rau cov hauj lwm phem no. Tab sis coob leej tub soj ntsuam tseem ua xyem xyav tias, yog tsis xub rhuav tshem cov Koom Haum txuas nrog cov tub rog, cov neeg tuav riam phom thiab cov neeg ua txhaum cai, mas kev nkag mus tshawb tsuas yog lam ua txuj ua kom dhau mus xwb.
Cov tseem hwv tub rog hauv lub teb chaws raug iab hiam los ntev lawm tias ; lawv txhawb nqa cov tsev ntxias dag uas ri mus thoob As Xias toob fab naj, txij thaum muaj tus kab mob COVID-19 sib kis xyoo 2019 los lawm.
Txawm li cas kuj xij, cov tseem hwv tab tom ntsib kev nyuab siab los ntawm ntau pab neeg tiv heev zuj zus. Yog qhov laij thawj uas ua rau cov tub rog rhuav ntau lub tsev ntxias dag. Tab sis lawv kheev kheev raug liam tias; qhov ntawd yog lam ua txuj ua xwb. Lawv tsis muaj lub siab yuav daws teeb meem tiag tiag.
